Read Papiamento Numbernan 17 Bible Online

Numbernan 17 - Papiamento bible

Numbernan 17

¹SEÑOR a bisa Moises:

²‘Pidi e israelitanan diesdos bastòn, un bastòn pa kada hefe di e diesdos tribunan. Skibi nòmber di kada hefe riba su bastòn.

³Pone pa e levitanan un bastòn mas aserka i skibi nòmber di Aaron riba dje.

⁴Pone e bastònnan den tènt di enkuentro dilanti di e arka di aliansa, kaminda tin e dokumento di aliansa wardá. Pone nan kaminda Mi sa topa boso.

⁵Bastòn di e hòmber ku Mi skohe lo kuminsá spreit. Asina lo Mi pone un fin na e lantamentu di e israelitanan.’

⁶Despues ku Moises a partisipá e israelitanan e rospondi akí, kada hefe di tribu a trese su bastòn. Tabata diesdos na tur ku e bastòn di Aaron aserka.

⁷Moises a pone nan dilanti di SEÑOR den e tènt.

⁸Ora Moises a bolbe drenta e tènt su manisé, el a mira ku e bastòn di Aaron a kuminsá spreit. E bastòn a saka kònòpi i flor i asta tabatin amandel na dje.

⁹Moises a bai ku tur e bastònnan for di den santuario i pafó el a laga tur e israelitanan mira nan. Nan a mira kiko a pasa i kada hefe a tuma su bastòn bèk.

¹⁰SEÑOR a bisa Moises: ‘Pone e bastòn di Aaron bèk dilanti di e arka di aliansa. Ward'é einan komo atvertensia pa tur hende ku lanta ku Mi. Pone asina un fin na lantamentu di e israelitanan, pa nan no muri.’

¹¹Moises a hasi loke SEÑOR a orden'é.

¹²E israelitanan a bisa Moises: ‘Esaki ta nos pèrdishon! Nos ta pèrdí, nos ta pèrdí.

¹³Tur hende ku yega serka di e tènt sagrado di SEÑOR lo muri. Ta nos tur su pèrdishon esaki ta?’