Read Papiamento Numbernan 21 Bible Online

Numbernan 21 - Papiamento bible

Numbernan 21

¹Rei kanaanita di Arad, den desierto di Neguèb, a tende ku pueblo di Israel tabata biniendo via e kaminda di bai Atarim. El a ataká nan i a kohe un kantidat di nan prezu.

²E ora ei e israelitanan a hasi e siguiente promesa na SEÑOR: ‘Si Bo laga e pueblo akí kai den nos man, nos lo destruí nan siudatnan.’

³SEÑOR a hasi loke nan a pidi i a laga e kanaanitanan kai den man di e israelitanan. E israelitanan a mata nan i a destruí nan siudatnan. P'esei nan a yama e lugá Horma.[6]

⁴E israelitanan a baha nan tèntnan i a sali for di seru di Hor bai den direkshon di Laman Kòrá pa evitá teritorio di Edom. Na kaminda pueblo a bira impasiente.

⁵Nan a kuminsá keha kontra SEÑOR i kontra Moises: ‘Pakiko boso a saka nos for di Egipto? Pa nos muri den desierto? Nos no tin pan ni awa. Nos a kome mana te fada.’

⁶E ora ei SEÑOR a manda kolebra venenoso riba e pueblo. E kolebranan a morde hopi israelita mata.

⁷E pueblo a bai serka Moises i bisa: ‘Nos a peka dor di keha kontra SEÑOR i kontra bo. Ai, resa pidi SEÑOR pa E kita e kolebranan ei for di nos.’ E ora ei Moises a resa pa e pueblo.

⁸SEÑOR a bis'é: ‘Traha un kolebra di bròns i peg'é na un palu. Tur esnan ku e kolebranan venenoso morde i ku hisa kara wak e kolebra di bròns, lo keda na bida.’

⁹E ora ei Moises a traha un kolebra di bròns i a peg'é na un palu. Esnan ku e kolebranan venenoso a morde i ku a hisa kara wak e kolebra di bròns, a keda na bida.

¹⁰E israelitanan a sigui biaha i lanta nan kampamentu na Obot.

¹¹Fo'i djei nan a sigui i lanta nan kampamentu na Iye-Haabarim, den desierto na ost di Moab.

¹²Fo'i djei nan a sigui i lanta nan kampamentu na riu Zèrèd.

¹³Fo'i djei nan a sigui i lanta nan kampamentu na kantu di riu Arnon, ku ta kore dor di desierto i ta sali for di teritorio di e amoritanan; Arnon ta forma frontera entre Moab i e amoritanan.

¹⁴P'esei nan ta bisa den e buki ‘Gueranan di SEÑOR’: ‘E siudat Waheb den teritorio di Sufa, e vayenan di Arnon,

¹⁵e sabana ku ta ekstendé te e siudat Ar i ku ta forma frontera ku Moab.’

¹⁶Fo'i djei e israelitanan a bai Beer.[7] Esei ta e pos kaminda SEÑOR a bisa Moises: ‘Yama e pueblo huntu, e ora ei Mi ta duna nan awa.’

¹⁷E ora ei Israel a kanta e kantika akí: ‘Brota awa, pos! Laga nos kanta di dje.

¹⁸E pos, ku prínsipenan a koba, ku hefenan a koba habri ku bastòn di rei i ku staf.’ For di e desierto nan a bai Matana,

¹⁹di Matana pa Nahaliel, di Nahaliel pa Bamot,

²⁰di Bamot pa e vaye den sabana di Moab, riba kabes di Pisga, ku bista riba desierto.

²¹E israelitanan a manda mensahero pa rei Sihon, rei di e amoritanan, ku e siguiente rospondi:

²²‘Pèrmití nos pasa dor di bo pais. Nos lo no pasa dor di bo kunukunan, ni dor di bo hòfinan di wendrùif, ni nos lo no bebe awa for di bo posnan. Nos lo sigui kaminda grandi sin kita na man drechi ni na man robes te ora nos kaba di pasa bo teritorio.’

²³Pero Sihon no a duna e israelitanan pèrmit. El a yama su ehérsito huntu i a bai Yahas den desierto. Aya el a ataká e israelitanan.

²⁴Pero e israelitanan a derot'é i a konkistá su pais, for di riu Arnon te na riu Yabok i te na e frontera reforsá di e amonitanan.

²⁵Israel a okupá tur siudat di e amoritanan i a keda biba aya, tambe na Hèshbon i na tur e siudatnan ku tabata pertenesé n'e.

²⁶Hèshbon tabata e siudat di Sihon, rei di e amoritanan, ku a bringa ku e rei anterior di Moab i a kita tur su pais te na Arnon for di dje.

²⁷P'esei e poetanan ta bisa: ‘Bin Hèshbon, ban rekonstruí i reforsá siudat di Sihon.

²⁸Pasobra un kandela a sali for di Hèshbon, un vlam for di siudat di Sihon; el a destruí e siudat Ar na Moab i e gobernantenan di sabana di Arnon.

²⁹Ai di bo, Moab! Pèrdí boso ta, pueblo di Kemosh! Nan yu hòmbernan mester a hui, i Sihon, rei di e amoritanan, a bai ku nan yu muhénan.

³⁰Ora nos a tira nan ku flecha, tur kos a bai pèrdí, for di Hèshbon te Dibon. Nos a kousa destrukshon te na Nofag, den henter e region te Medba.’

³¹Asina pueblo di Israel a keda biba na pais di e amoritanan.

³²Moises a laga eksplorá Yazer. Nan a okupá e siudatnan ku tabata pertenesé n'e i a kore ku e amoritanan ku tabata biba aya.

³³Despues di esei nan a bira bèk den direkshon di Bashan. Pero Og, rei di Bashan, a sali ku henter su ehérsito bin bringa ku nan na Edrei.

³⁴SEÑOR a bisa Moises: ‘No tene miedu di dje, pasobra Mi ta entreg'é ku su pais i ku henter su ehérsito den bo poder. Hasi kuné manera bo a hasi ku Sihon, rei di e amoritanan, ku tabata biba na Hèshbon.’

³⁵Nan a derotá é ku su yu hòmbernan ku henter su ehérsito sin laga ningun hende na bida i a tuma su pais pa nan.