Read Papiamento Numbernan 25 Bible Online

Numbernan 25 - Papiamento bible

Numbernan 25

¹Tempu e israelitanan tabatin nan kampamentu na Shitim, nan a drenta ku e muhénan moabita.

²E muhénan tabata invitá pueblo di israel pa asistí na e sakrifisionan ofresé na nan diosnan. E israelitanan tabata kome karni di e sakrifisionan i adorá e diosnan ei.

³Di e manera ei Israel a drenta ku e dios Baal-Peor. E ora ei un rabia a drenta SEÑOR

⁴i El a bisa Moises: ‘Laga ehekutá e hefenan di pueblo públikamente dilanti di santuario. Asina mi rabia riba Israel lo baha.’

⁵E ora ei Moises a bisa e huesnan di Israel: ‘Boso kada un mester mata e hòmbernan di boso tribu ku a mòrs ku Baal-Peor.’

⁶Nèt e momento ei a yega un israelita ku tabata bai tènt di su famia ku un muhé midianita. Moises i henter komunidat di Israel, ku tabata para yora dilanti di tènt di enkuentro, a mira e kos sosodé.

⁷Ora Pinhas, yu hòmber di Eleazar i ñetu di saserdote Aaron, a mira e kos akí, el a bai laga e otronan, kohe un lansa,

⁸i a sigui e israelita te den e tènt, kaminda e tabata drumi ku e muhé. Den un hinká el a bora nan tur dos ku su lansa pasa dor di e hòmber yega te bou dje barika di e muhé. E ora ei e plaga ku a kuminsá reina bou di e israelitanan a stòp.

⁹Konsekuensia di e plaga ei tabata 24.000 morto.

¹⁰SEÑOR a bisa Moises:

¹¹‘Pinhas, yu hòmber di Eleazar i ñetu di saserdote Aaron, a hasi ku mi rabia riba Israel a baha, pa motibu ku el a lanta defendé mi honor. Sino Mi mes lo a lanta defendé mi honor i lo Mi a kaba ku e israelitanan.

¹²P'esei bisa Pinhas ku Mi ta sera un pakto di amistat kuné.

¹³E pakto ei ta konta p'e i pa su desendientenan, i ta hasi nan saserdote pa semper, pasobra el a lanta defendé honor di su Dios i a drecha tur kos entre e israelitanan i Ami.’

¹⁴E israelita ku a muri huntu ku e muhé midianita, tabata yama Zimri. E tabata yu hòmber di Salú, kabes di un famia di tribu di Simeon.

¹⁵E muhé midianita ku a muri, tabata yama Kozbi; e tabata yu muhé di Sur, un hefe di tribu di e midianitanan.

¹⁶SEÑOR a bisa Moises:

¹⁷‘Ataká e midianitanan i mata nan,

¹⁸pasobra nan a trata boso manera enemigu. Nan a lòk boso den trampa den e kaso di Baal-Peor i den e kaso di nan miembro di tribu Kozbi, yu muhé di un hefe di tribu midianita, ku nan a mata tempu tabata reina un plaga bou di boso pa motibu di Baal-Peor.’