Read Papiamento Numbernan 26 Bible Online

Numbernan 26 - Papiamento bible

Numbernan 26

¹ Ora e plaga a pasa, SEÑOR a bisa Moises ku Eleazar, yu di saserdote Aaron:

²‘Konta henter e komunidat di Israel. Registrá tur hende hòmber di binti aña bai ariba ku ta apto pa bai guera. Selektá nan segun nan famia.’

³Den vaye di Moab, na riu di Yordan pegá ku Yériko, Moises ku saserdote Eleazar a yama e pueblo huntu i a bisa nan

⁴ku SEÑOR a ordená Moises pa konta tur hende hòmber di binti aña bai ariba. Ata lista di e famianan israelita ku a sali for di Egipto:

⁵promé a konta tribu di Ruben, yu hòmber mayó di Yakob. Tribu di Ruben tabata konsistí di famianan di Hanok, Palú, Hèsron i Karmi; huntu nan tabata 43.730 hende hòmber. E desendientenan di Palú tabata Eliab

⁹i su yu hòmbernan Nemuel, Datan ku Abiram. E Datan ku Abiram akí e pueblo a skohe komo hefe. Nan a lanta kontra Moises ku Aaron dor di djòin e siguidónan di Korag, ku a lanta ku SEÑOR.

¹⁰Tera a habri guli nan huntu ku Korag, miéntras e 250 siguidónan di Korag a muri den kandela. Esei tabata un atvertensia pa e pueblo.

¹¹Pero e yu hòmbernan di Korag no a muri.

¹²Tribu di Simeon tabata konsistí di e famianan di Nemuel, Yamin, Yakin, Zèrag i Saul; huntu nan tabata 22.200 hende hòmber.

¹⁵Tribu di Gad tabata konsistí di e famianan di Sifion, Hagui, Shuni, Ozni, Eri, Arod i Areli; huntu nan tabata 40.500 hende hòmber.

¹⁹Tribu di Huda tabata konsistí di e famianan di Shèla, Pèrès i Zèrag i di e famianan di Hèsron i Hamul, dos yu hòmber di Pèrès. Dos yu hòmber di Huda, Er ku Onan, a muri kaba na Kanaan. Tribu di Huda tabata konsistí di 76.500 hende hòmber.

²³Tribu di Isakar tabata konsistí di e famianan di Tola, Puwa, Yashub i Shimron; huntu nan tabata 64.300 hende hòmber.

²⁶Tribu di Zebulon tabata konsistí di e famianan di Sèrèd, Elon i Yagleel; huntu nan tabata 60.500 hende hòmber.

²⁸E tribunan di Manase i Efraim tabata desendiente di Jozef. Tribu di Manase tabata konsistí di e famianan di Ièzèr, Helèk, Asriel, Shèkèm, Shemida i Hefèr; huntu nan tabata 52.700 hende hòmber. Nan tabata desendiente di Guilead, yu hòmber di Makir i ñetu di Manase. Selofhat, yu hòmber di Hefèr, tabatin yu muhé so; nan tabata yama: Magla, Noa, Hogla, Milka i Tirsa.

³⁵Tribu di Efraim tabata konsistí di e famianan di Shutelag, Bèkèr i Tahan i e desendientenan di Eran, ku tabata pertenesé na famia di Shutelag; huntu nan tabata 32.500 hende hòmber. Esakinan tabata e tribunan di Manase i Efraim, desendiente di Jozef.

³⁸Tribu di Benhamin tabata konsistí di e famianan di Bèla, Ashbel, Ahiram, Shefufam i Hufam i e desendientenan di Arad ku Naaman, ku tabata pertenesé na famia di Bèla; huntu nan tabata 45.600 hende hòmber.

⁴²Tribu di Dan tabata konsistí di famia di Shuham; huntu nan tabata 64.400 hende hòmber.

⁴⁴Tribu di Asher tabata konsistí di e famianan di Yimna, Yishui i Berías i e desendientenan di Hèbèr i Malkiel, ku tabata pertenesé na famia di Berías; huntu nan tabata 53.400 hende hòmber. E yu muhé di Asher tabata yama Serag.

⁴⁸Tribu di Naftali tabata konsistí di e famianan di Yagseel, Guni, Yesèr i Shilem; huntu nan tabata 45.400 hende hòmber.

⁵¹Na total tabatin anto 601.730 hende hòmber di binti aña bai ariba.

⁵²SEÑOR a bisa Moises:

⁵³‘Parti e pais entre e tribunan akí segun nan grandura.

⁵⁴Kada tribu mester haña un pida tera segun e kantidat di hende ku e tin; un tribu grandi ta haña un pida tera grandi; un tribu chikitu ta haña un pida tera chikitu.

⁵⁵Mester tira lòt ora ta parti e tera.

⁵⁶Ora tira lòt e tribunan grandi i chikitu lo haña e pida tera ku nan tin derechi riba dje.’

⁵⁷Tribu di Levi tabata konsistí di e famianan di Guershon, Kehat ku Merari.

⁵⁸E famianan di Libni, Gebron, Magli, Mushi i Korag tambe tabata pertenesé na nan desendientenan. Kehat tabata tata di Amram.

⁵⁹Kasá di Amram tabata yu muhé di Levi, yamá Yokebèd. Su mama a hañ'é na Egipto. E yunan ku Yokebèd a haña ku Amram tabata Aaron, Moises i nan ruman muhé Miriam.

⁶⁰E yu hòmbernan di Aaron tabata Nadab, Abihu, Eleazar i Itamar.

⁶¹Nadab i Abihu a muri, ora nan a usa kandela ku nan no a kohe for di altá pa ofresé sakrifisio na SEÑOR.

⁶²E kantidat di desendiente maskulino di Levi di un luna bieu bai ariba tabata 23.000. No a konta tribu di Levi huntu ku e otro israelitanan, pasobra nan no a haña teritorio.

⁶³Eseinan ta e israelitanan ku Moises i saserdote Eleazar a registrá den vaye di Moab, na riu di Yordan pegá ku Yériko.

⁶⁴Entre nan no tabatin ningun di e israelitanan mas ku Moises i saserdote Aaron a registrá den desierto Sinai,

⁶⁵pasobra SEÑOR a bisa di nan: ‘Den desierto nan lo muri!’ Niun di nan no tabata na bida mas, ku eksepshon di Kaleb, yu hòmber di Yefune, i Yozue, yu hòmber di Nun.