Read Papiamento Numbernan 28 Bible Online

Numbernan 28 - Papiamento bible

Numbernan 28

¹SEÑOR a bisa Moises:

²‘Ordená e israelitanan lo siguiente den mi nòmber: Perkurá ofresé e sakrifisionan ku ta pertenesé na Mi riba e dianan fihá; e sakrifisionan di kuminda ei, ku un holó agradabel pa Mi, ta mi kuminda.’

³‘Bisa nan: Ofresé SEÑOR tur dia e siguiente sakrifisio di kuminda: dos lamchi chubatu di karné di un aña, sin defekto, komo sakrifisio di kandela;

⁴ofresé esun mainta i e otro ora nochi ta bai sera.

⁵Ofresé huntu ku kada lamchi dos kilo di hariña fini mesklá ku un liter di e mihó zeta di oleifi komo sakrifisio vegetal.

⁶Esei ta e sakrifisio di kandela di tur dia, manera esun ku nan a ofresé Mi e promé bia riba seru di Sinai. Ta un sakrifisio di kandela ku un holó agradabel pa SEÑOR.

⁷Basha huntu ku esun lamchi un liter di biña komo ofrenda na SEÑOR den santuario.

⁸Ofresé e otro lamchi ora nochi ta bai sera, ku e mesun ofrenda vegetal i e mesun ofrenda di biña di mainta. Ta un sakrifisio di kuminda, ku un holó agradabel pa SEÑOR.

⁹Ofresé riba dia di sabat dos lamchi di karné chubatu di un aña, sin defekto, i un ofrenda vegetal di kuater kilo di hariña fini mesklá ku zeta; hasi tambe un ofrenda di biña.

¹⁰Serka e sakrifisio di kandela di sabat ei ta bini e sakrifisio di kandela di tur dia i e ofrenda di biña ku ta pertenesé n'e.

¹¹Ofresé SEÑOR komo sakrifisio di kandela riba e promé dia di tur luna: dos toro yòn, un chubatu di karné, i shete lamchi chubatu di karné di un aña, sin defekto.

¹²Hasi un ofrenda vegetal di seis kilo di hariña fini mesklá ku zeta huntu ku kada toro, huntu ku e chubatu di karné un ofrenda vegetal di kuater kilo di hariña fini mesklá ku zeta,

¹³i huntu ku kada lamchi un ofrenda vegetal di dos kilo di hariña fini mesklá ku zeta. Esaki ta e sakrifisio di kandela, un sakrifisio di kuminda ku un holó agradabel pa SEÑOR.

¹⁴E ofrenda di biña ku mester hasi huntu ku kada toro ta dos liter, huntu ku kada chubatu di karné un liter mas un terser parti i huntu ku kada lamchi un liter. Esaki ta e sakrifisionan ku boso mester ofresé e promé dia di kada luna.

¹⁵Banda di e sakrifisio di kandela di tur dia ku e ofrenda di biña ku ta pertenesé n'e, boso mester ofresé e dia ei na SEÑOR un chubatu komo sakrifisio pa pordon di piká.

¹⁶Selebrá fiesta di Pésag na honor di SEÑOR riba e di dieskuater dia di e promé luna.

¹⁷Riba di diessinku dia di e luna ei ta sigui e fiesta, ku durante shete dia boso ta kome pan prepará sin is.

¹⁸Reuní e promé dia ei pa adorá SEÑOR: no traha e dia ei.

¹⁹Ofresé e ora ei na SEÑOR un sakrifisio di kuminda i un sakrifisio di kandela di dos toro yòn, un chubatu di karné i shete lamchi chubatu di un aña, sin niun defekto.

²⁰Hasi e ofrenda vegetal di hariña fini mesklá ku zeta huntu; seis kilo huntu ku kada toro, kuater kilo huntu ku e chubatu di karné

²¹i dos kilo huntu ku kada un di e shete lamchinan.

²²Ofresé tambe un chubatu komo sakrifisio pa pordon di piká pa drecha tur kos entre boso i SEÑOR.

²³Ofresé tur eseinan banda di e sakrifisio di kandela ku ta ofresé tur mainta.

²⁴Shete dia largu, ofresé asina tur dia, un sakrifisio di kuminda ku un holó agradabel pa SEÑOR, banda di e sakrifisio di kandela di tur dia ku e ofrenda di biña ku ta pertenesé n'e.

²⁵Reuní atrobe riba e di shete dia pa adorá SEÑOR, no traha e dia ei.

²⁶Reuní pa adorá SEÑOR riba e promé dia di fiesta di e di Sinkuenta Dia, ora ta ofresé e promé trigo komo ofrenda vegetal; no traha e dia ei.

²⁷Ofresé e ora ei un sakrifisio di kandela ku un holó agradabel pa SEÑOR di dos toro yòn, un chubatu di karné i shete lamchi chubatu di un aña.

²⁸Hasi huntu e ofrenda vegetal ku ta pertenesé n'e di hariña fini mesklá ku zeta; seis kilo huntu ku kada toro, kuater kilo huntu ku e chubatu di karné

²⁹i dos kilo huntu ku kada un di e shete lamchinan.

³⁰Ofresé tambe un chubatu pa drecha tur kos entre boso i SEÑOR.

³¹Ofresé e sakrifisionan akí banda di e sakrifisio di kandela i e ofrenda vegetal di tur dia ku ta pertenesé n'e; e bestianan pa sakrifisio mester ta sin defekto.