Read Papiamento Numbernan 30 Bible Online

Numbernan 30 - Papiamento bible

Numbernan 30

¹Moises a bisa e hefenan di tribu: ‘Esaki SEÑOR a ordená:

²Si un hende hòmber primintí SEÑOR di hasi algu òf hura di apsten'é di sierto kos, e mester ten'é na su palabra; e mester hasi tur loke el a primintí.

³Pero si ta un muhé hóben, bibá na kas ainda, hasi un promesa òf un huramentu asina,

⁴i su tata no bis'é nada ora e tata tende, e ora ei tur su promesanan i e huramentu di apsten'é di sierto kos ta keda bálido.

⁵Pero si su tata tende i ta kontra, niun di su promesanan ni niun di su huramentunan no ta keda bálido. SEÑOR no ta eksigí di dje p'e kumpli, pasobra su tata ta kontra.

⁶Si un muhé kasa despues ku el a hasi un promesa òf sin pensa hasi un huramentu na SEÑOR

⁷i su esposo no a bis'é nada ora el a tende, e ora ei tur su promesanan i e huramentu di apsten'é di sierto kos ta keda bálido.

⁸Pero si su esposo ta kontra ora e tende, e ta hasi e promesa i e huramentu hasí sin pensa, inbálido. SEÑOR no ta eksigí di e muhé p'e kumpli ku nan.

⁹Un biuda òf muhé divorsiá mester kumpli ku kada promesa i kada huramentu ku e hasi.

¹⁰Si un muhé kasá hasi un promesa òf un huramentu

¹¹i su esposo no a bis'é nada ora e tende, e ora ei tur su promesanan i e huramentu di apsten'é di sierto kos, ta keda bálido.

¹²Pero si su esposo deklará nan inbálido, ora e tende di nan, su promesanan òf huramentu ta bira inbálido. SEÑOR no ta eksigí di e muhé p'e kumpli, komo su esposo a deklará nan inbálido.

¹³Su esposo por konfirmá kada promesa i kada huramentu di apsten'é di algu òf deklará nan inbálido.

¹⁴Si su esposo no bisa nada te su manisé, el a konfirmá tur promesa i tur huramentu ku e muhé a hasi. El a konfirmá nan komo e no a bisa nada, ora el a tende di nan.

¹⁵Pero si despues numa e esposo deklará nan inbálido, e mes ta keda responsabel ku e muhé ta keda sin kumpli ku loke el a primintí òf hura.’

¹⁶Esakinan ta e leinan ku SEÑOR a duna Moises tokante e relashon ku tin entre un esposo i su esposa i entre un tata i su yu muhé, bibá na kas ainda.