Read Papiamento Numbernan 35 Bible Online

Numbernan 35 - Papiamento bible

Numbernan 35

¹SEÑOR a bisa Moises den sabana di Moab kantu di Yordan enfrente di Yériko:

²‘Ordená e israelitanan pa nan sede den e teritorionan ku nan ta poseé, e siudatnan rondoná ku kunuku di yerba, na e levitanan, kaminda e levitanan por biba.

³E levitanan por biba den e siudatnan; e kunukunan di yerba ta pa e bakanan ku nan tin i pa nan sobrá bestianan.

⁴Na tur banda for di e muraya di siudat e kunukunan di yerba mester ekstendé te un distansia di 500 meter.

⁵Midi pida pida di 500 pa 1000 meter komo kunuku di yerba, tantu na banda ost, na banda zùit, na banda wèst, komo na banda nort.

⁶E siudatnan ku boso mester sede na e levitanan, ta e seis siudatnan ku boso mester indiká komo siudat di asilo pa e hendenan ku mata hende sin nan por yuda, i ademas ainda 42 otro siudat.

⁷Na tur anto boso mester sede 48 siudat ku kunuku di yerba na e levitanan.

⁸E kantidat di siudat ku un tribu mester sede na e levitanan ta dependé di grandura di teritorio di e tribu; mas grandi e tribu ta mas siudat i mas chikitu e tribu ta mas tiki siudat.’

⁹SEÑOR a ordená Moises

¹⁰pa bisa e israelitanan lo siguiente: ‘Ora boso krusa Yordan i drenta Kanaan,

¹¹indiká algun siudat komo siudat di asilo. Ei un hende ku sin por yuda mata un otro hende por hui bai.

¹²Den e siudatnan ei boso lo ta seif pa e famia mas yegá ku mester venga morto di e defuntu, di manera ku un hende ku mata un otro hende, no mester muri promé ku husga su kaso dilanti di komunidat.

¹³Indiká seis siudat komo siudat di asilo:

¹⁴tres na otro banda di Yordan i tres na Kanaan.

¹⁵E seis siudatnan ei mester ta lugá di asilo tantu pa e israelitanan komo pa e strañeronan, sea ku nan ta biba temporalmente òf permanentemente serka boso. Tur hende ku sin por yuda mata un otro hende, por hui bai aya.

¹⁶Suponé ku un hende dal un otro hende asina duru ku un opheto di heru, ku e hende ta muri dje sla. E ora ei e hende ku a dal, ta un asesino i mester mat'é.

¹⁷Suponé ku un hende ku tin un piedra den su man, dal un otro hende asina duru ku e piedra, ku e hende ta muri dje sla. E ora ei e hende ku a dal, ta un asesino i mester mat'é.

¹⁸Suponé ku un hende ta dal un otro hende asina duru ku un opheto di palu, ku e hende ta muri dje sla. E ora ei e hende ku a dal, ta un asesino i mester mat'é.

¹⁹E famia mas yegá ku mester venga morto di e defuntu tin obligashon di mata e hende ei, asina e hañ'é.

²⁰Suponé ku un hende ta stot un otro hende pa motibu di odio òf ta mand'é ku un kos pa malu

²¹òf ta dal e ku moketa pa motibu di enemistat, di manera ku e hende ta muri dje sla. E ora ei mester mata e hende kulpabel; e ta un asesino. E famia mas yegá ku mester venga morto di e defuntu tin obligashon di mata e asesino, asina e hañ'é.

²²Pero suponé ku un hende sin ku e por yuda i sin ku tin enemistat entre nan, stot un otro hende òf tira ku un kos ku ta alkansá e otro hende,

²³òf sin wak laga un piedra kai riba e otro hende, miéntras no tabatin nada di enemistat entre nan i e no tabatin intenshon di hasi e otro hende daño, i e otro hende muri dje sla.

²⁴E ora ei komunidat mester husga segun e reglanan akí, entre e hende ku a mata i e famia mas yegá ku mester venga morto di e defuntu.

²⁵Komunidat mester protegé e kulpabel kontra vengansa di e famia mas yegá ku mester venga morto di e defuntu. Mester lag'é bai e siudat di asilo, kaminda el a hui bai, bèk. Ei e mester keda biba te dia gransaserdote, ordená ku zeta sagrado, muri.

²⁶Si e hende ku a mata bandoná teritorio di e siudat di asilo, kaminda el a hui bai,

²⁷i e famia mas yegá ku mester venga morto di e defuntu, top'é pafó di e teritorio, e famia ei mag mat'é sin por kulpa e famia ei di asesinato.

²⁸E n' mester a keda tòg den e siudat di asilo te ora gransaserdote muri? Ta te despues di morto di gransaserdote e mag bai kas bèk.

²⁹E leinan akí ta na vigor pa boso i pa boso desendientenan, na unda ku boso por ta biba.

³⁰Suponé ku un hende mata un otro hende, e ora ei ta riba deklarashon di mas ku un testigu so por mata e asesino; un testigu so no ta sufisiente pa kondená un hende na morto.

³¹No mag aseptá plaka a kambio di bida di un asesino, ku meresé morto; mester mat'é.

³²Tampoko no mag aseptá plaka pa bida di un hende ku mester hui bai un siudat di asilo, ora e hende ei ke bai biba atrobe riba su tereno, promé ku gransaserdote muri.

³³No hasi e pais kaminda boso ta biba impuru. Sanger ta hasi e pais impuru i ora sanger drama no por purifiká e pais, si no ta ku sanger di esun ku a drama e sanger.

³⁴Ke men, no hasi e pais kaminda boso ta biba i kaminda Ami ta biba impuru, pasobra Ami, SEÑOR, ta biba meimei di e israelitanan.’