Read Papiamento Numbernan 8 Bible Online

Numbernan 8 - Papiamento bible

Numbernan 8

¹SEÑOR a bisa Moises:

²‘Bisa Aaron pone e shete lampinan di tal manera riba e kandelar, ku e lus ta tira pa parti dilanti.’

³Aaron a sigui e òrdu ku SEÑOR a duna Moises.

⁴E kandelar tabata tur na un, trahá di oro batí; tantu e bara komo e adornonan den forma di blachi, segun e modelo ku SEÑOR a duna Moises.

⁵SEÑOR a bisa Moises:

⁶‘Apartá e levitanan for di e otro israelitanan i purifiká nan.

⁷Purifiká nan di siguiente manera: sprengu nan ku awa di purifikashon, laga nan feita henter nan kurpa i laga nan laba nan pañanan. Asina nan kaba nan ta puru.

⁸Despues nan ta kohe un toro yòn i e ofrenda vegetal di hariña fini mesklá ku zeta ku ta pertenesé n'e, miéntras abo mes ta kohe un di dos toro pa e sakrifisio pa pordon di piká.

⁹Laga e levitanan bai tènt di enkuentro e ora ei i yama henter komunidat di Israel huntu.

¹⁰Despues ku e levitanan bin para Mi dilanti na e tènt di enkuentro, e israelitanan mester pone man riba kabes di e levitanan.

¹¹Aaron ta ofresé nan na Mi ku e rito di presentashon na nòmber di e israelitanan, di manera ku nan por tene sirbishi den santuario.

¹²Despues e levitanan ta pone man riba kabes di e dos toronan. Ofresé esun toro na Mi komo sakrifisio pa pordon di piká i e otro komo sakrifisio di kandela pa asina drecha tur kos entre e levitanan i Ami.

¹³Kaba laga e levitanan bai para dilanti di Aaron ku su yunan i ofresé nan na Mi ku e rito di presentashon.

¹⁴Asina bo mester apartá e levitanan for di e otro israelitanan pa nan pertenesé na Mi.

¹⁵Despues ku bo purifiká e levitanan i ofresé nan na Mi ku e rito di presentashon, nan por bai tene sirbishi den tènt di enkuentro,

¹⁶pasobra nan ta kompletamente na Mi disposishon. Mi a apartá e levitanan for di e israelitanan komo remplasante di tur yu hòmber promé nasí;

¹⁷pasobra tur promé nasí ta pertenesé na Mi. Dia Mi a mata tur promé nasí na Egipto Mi a destiná nan pa Mi.

¹⁸Mi a apartá nan komo remplasante di tur promé nasí di Israel

¹⁹i a pone nan na disposishon di Aaron ku su yunan. Komo representante di e israelitanan nan mester tene sirbishi den tènt di enkuentro i drecha tur kos entre e israelitanan i SEÑOR; ya e israelitanan no tin nodi di aserká e santuario pa no resultá nan fatal.’

²⁰Moises ku Aaron i henter komunidat di Israel a ehekutá loke SEÑOR a ordená Moises pa hasi ku e levitanan.

²¹E levitanan a purifiká nan mes i a laba nan pañanan. Aaron a ofresé nan na SEÑOR ku e rito di presentashon i a drecha tur kos entre nan i SEÑOR. Asina el a purifiká nan.

²²Kaba e levitanan a bai tènt di enkuentro pa tene sirbishi bou di guia di Aaron ku su yunan. A hasi ku e levitanan manera SEÑOR a ordená Moises.

²³SEÑOR a bisa Moises:

²⁴‘Lo siguiente ta konta pa e levitanan. Es ku tin bintisinku aña òf mas mester bin tene sirbishi den tènt di enkuentro.

²⁵Es ku tin sinkuenta aña mester retirá. E no tin nodi di tene sirbishi mas.

²⁶Wèl e mag yuda e otro levitanan den tènt di enkuentro ku nan tarea, ma obligashon e no tin mas. Organisá tenementu di sirbishi dor di e levitanan asin'ei.’