Read Papiamento Nahum 3 Bible Online

Nahum 3 - Papiamento bible

Nahum 3

¹Ai di e siudat, tur na sanger, yená ku engaño i mentira, stiwá ku botin, ku niun ora so no a laga hòrtamentu.

²Tende: zuipnan ta klap, wilnan ta borotá, kabainan ta galopiá, garoshinan ta lora.

³Hòmbernan riba kabai ta ataká, spadanan ta lombra, flechanan ta kòrta kandela. Tin hopi hende heridá, monton di morto, kadaver sin fin, bo ta kana trompeká riba nan.

⁴Kousante di esaki ta e inmoralidat ku e prostituta Nínive a montoná. Di beyesa tentadó, gran maestra den bruheria. Pueblo- i nashonnan a kai den su tentashon. Ku mal maña el a logra sklavisá nan.

⁵SEÑOR, Dios Soberano, ta deklará: ‘Nínive, awor Mi ta bai lanta kontra bo. Mi ta bai hisa bo saya, tapa bo kabes kuné, pa bo keda manera bo mama a pari bo i lo Mi mustra tur pueblo i henter mundu, bo sunú.

⁶Lo Mi tira bo ku lodo, pil di bo i brongosá bo públikamente.

⁷Ken ku mira bo lo kore limpi bai. Nan lo bisa: “Nínive ta destruí. Ken lo yor'é? No tin konsuelo p'e.” ’

⁸Akaso abo, Nínive, ta mihó ku Tebe, e siudat na Riu Nilo, rondoná di awa, ku riu pa su muraya i awa pa su defensa?

⁹For di Etiopia i Egipto, na kantidat inkontabel hende a bin refors'é, Put i Libia a bira su aliado.

¹⁰Sinembargo su habitantenan a bai den eksilio, a kohe nan prezu i bai ku nan. A dal su yunan plèchè na tur skina di kaya. A bui tur su lidernan, a tira lòt riba kabes di su noblenan i a parti nan pa e konkistadónan.

¹¹Nínive, awor miedu ta poderá di bo, manera bibida ta dominá un buraché. Abo tambe lo bai kore skonde pa e enemigu.

¹²E fòrtinan den bo pais, fásilmente lo kai den man enemigu. Nan ta frutanan hechu, kologá na un palu di figo. Si djis sakudí e palu un tiki, e frutanan ta kita kai den boka di hende.

¹³Bo sòldánan ta manera muhé. Kandela lo kome bo rèndunan di porta, sin fòrti bo pais lo ta hanchu habrí pa enemigu.

¹⁴Nínive, buska awa pa ora sitia bo; fortifiká bo murayanan di defensa. Machiká klei i tera, yena forma pa traha klenku.

¹⁵Lo bo ta derotá tòg, den kandela o pa medio di spada. Enemigu lo guli bo, manera dalakochi ta devorá kosecha. Nínive, bo habitantenan ta numeroso manera dalakochi,

¹⁶bo negosiantenan mes tantu ku strea na shelu. Pero dalakochi sa kria ala i bula bai.

¹⁷Bo lider- i funshonarionan ta un trupa di dalakochi: miéntras ta friu nan ta pegá riba muraya, pero manera solo sali, nan ta bula limpi bai i niun hende n' sa na unda.

¹⁸Rei di Asiria, bo gobernantenan a bai sosegá, bo komandantenan a drumi pa semper. Bo pueblo ta plamá manera karné den seru; no tin wardadó pa trese nan huntu.

¹⁹Nínive, no tin remedi pa bo herida, bo yaga no tin kura. Ken ku tende di bo destrukshon ta bati man di alegria. Pasobra ken no a yega di sinti nunka bo krueldat inmenso?