Read Papiamento Mateo 11 Bible Online

Mateo 11 - Papiamento bible

Mateo 11

¹Ora Hesus a kaba di duna su diesdos disipelnan instrukshon, El a bai for di ei pa bai duna siñansa i prediká den e siudatnan di e region ei.

²Ora Huan Boutista, ku tabata den prizòn, a tende loke e Mesias tabata hasi, el a manda rospondi ku algun[17] di su disipelnan p'E.

³Nan a puntra Hesus: ‘Ta Abo ta esun ku mester bini òf nos mester spera un otro?’

⁴Hesus a kontestá nan: ‘Bai konta Huan loke boso ta tende i mira:

⁵siegu ta mira, hende lam ta kana, leproso ta kura, surdu ta tende, morto ta lanta i e bon notisia ta prediká na e pobernan.

⁶Felis ta esun ku no ta sintié ofendí dor di Mi.’

⁷Ora e disipelnan di Huan tabata bai, Hesus a kuminsá papia ku e hendenan tokante Huan; El a bisa nan: ‘Ken boso a bai mira den desierto? Un pida kaña sakudí pa bientu?

⁸Ma si boso bisa Mi: “Nò”, ken boso a bai mira antó? Un hòmber bistí na paña di luho fini? Tende, hende ku ta bisti asina ei no, ta den palasio bo ta haña nan.

⁹Ta ken boso a bai mira antó? Un profeta? Mi ta bisa boso enberdat ta un profeta i asta mas ku un profeta!

¹⁰Ta di e hòmber akí Dios ta bisa den Skritura: Mira, Mi ta manda mi mensahero Bo dilanti pa E prepará kaminda pa Bo.

¹¹Mi ta sigurá boso: di tur hende ku a nase riba mundu, niun no ta mas altu ku Huan Boutista, ma tòg esun ku ta di ménos importansia den reino di shelu, ta mas kuné.

¹²For di tempu ku Huan Boutista tabata prediká te awor akí, reino di shelu a sufri di violensia[18] i hende violento ta buska moda di gar'é.

¹³Lei di Moises i tur profeta te na tempu di Huan a bisa esaki di antemano.

¹⁴I si boso ke kere Mi, aseptá ku Huan ta Elías ku mester a bini!

¹⁵Esun ku tin orea skucha!

¹⁶Awor ta ku kiko lo Mi por kompará e hendenan di e generashon akí? Wèl, nan ta manera mucha ku ta sinta riba plenchi. Nan ta yama otro mucha

¹⁷i bisa nan: “Nos a toka kantika kontentu riba flùit ma boso no a balia; nos a kanta kantika di entiero ma boso no a yora.”

¹⁸Huan a bini i no ker a kome ni bebe i hende a laga sa ku e ta poseé pa demoño.

¹⁹E Yu di hende a bini i e sí ta kome i bebe i hende a laga sa: “Mira un hòmber golos i buraché ei, amigu di kobradó di belasting i di hende ku no ta kumpli ku lei.” Ma sabiduria di Dios ta proba su mes ku echo.’

²⁰E ora ei Hesus a kuminsá skual e siudatnan kaminda El a hasi mayoria di su milagernan i ku tòg no ker a kombertí.

²¹El a sklama: ‘Ai di bo, Korazin; Ai di bo, Betsaida! Si e mesun milagernan ku a tuma lugá serka boso, a tuma lugá na Tiro i Sidon, dia bieu e hendenan ei lo a bisti paña di rou i stroi shinishi riba nan kabes komo señal di kombershon!

²²Ma Ami ta bisa boso: dia di huisio e kastigu pa e hendenan di Tiro i Sidon lo ta ménos pisá ku boso kastigu!

²³I abo Kafárnao: N' ta subi bo ker a subi yega te shelu? Ta te den fièrnu lo bo kai awor! Pasobra si e mesun milagernan ku a tuma lugá serka bo hendenan, a tuma lugá na Sódoma, e siudat ei lo tabata eksistí te dia djawe.

²⁴Ma Ami ta bisa boso: riba dia di huisio Sódoma lo pasa ménos kastigu ku boso.’

²⁵Den e tempu ei Hesus a bisa: ‘Tata, Señor di shelu i di tera! Mi ta gradisí Bo ku Bo a duna esnan simpel konosementu di e kosnan ku Bo a skonde pa esnan sabí i inteligente.

²⁶Sí, Tata, esei Bo a haña ta bon.

²⁷Tur kos mi Tata a duna Mi. Niun hende no konosé e Yu, sino ta Tata so; ni niun hende no konosé e Tata, sino e Yu so i esnan ku e Yu ke laga konosé e Tata.

²⁸Tur ku ta kansá i kargá, bini serka Mi i Ami lo duna boso sosiegu.

²⁹Tuma mi yugo riba boso skouder i siña di Mi, pasobra Mi ta mansu i humilde; i boso lo haña sosiegu.

³⁰Pasobra mi yugo ta suave i mi karga ta lihé.’