Read Papiamento Mateo 15 Bible Online

Mateo 15 - Papiamento bible

Mateo 15

¹Algun fariseo i dòktor di lei for di Herusalèm a aserká Hesus.

²Nan a puntr'É: ‘Pakiko bo disipelnan ta kibra ku tradishon di nos antepasadonan? Nan no ta laba man promé ku nan kome pan.’

³El a kontestá: ‘Pakiko antó boso ta kibra ku mandamentu di Dios pa boso tradishonnan?

⁴Dios a bisa: “Honra bo mama i bo tata” i tambe: “Es ku maldishoná su mama òf su tata ta haña kastigu di morto.”

⁵Ma boso ta bisa: “Si un hende bisa su mama òf tata ku algu ku lo e por a yuda nan kuné ta un ofrenda dediká na Dios,

⁶e ora ei, e no tin nod'i sostené i honra nan.” Asin'ei boso a kita tur outoridat for di palabra[22] di Dios pa boso sigui boso tradishonnan.

⁷Hipókritanan, profeta Isaías a deskribí boso bon bon ora el a bisa:

⁸E pueblo akí, Dios ta bisa, ta alabá mi ku nan boka so, ma den nan kurason nan ta leu fo'i Mi.

⁹Nan adorashon no ta sirbi pa nada; Nan doktrina no ta nada mas ku tradishon di hende.’

¹⁰Hesus a yama e hendenan huntu i a bisa nan: ‘Skucha Mi i komprondé Mi.

¹¹No ta loke ta drenta boka di un hende ta hasié impuru, ma loke ta sali for di su boka.’

¹²E disipelnan a bin puntr'É: ‘Bo tabata sa ku e fariseonan a sinti nan mes ofendí ora nan a tende loke Bo a bisa?’

¹³Hesus a kontestá nan: ‘Mi Tata ku ta den shelu, lo ranka tur mata ku E mes no a planta ku rais ku tur!

¹⁴No preokupá boso ku e fariseonan. Nan ta lider siegu ku ta guia otro siegu. Ma si un siegu guia un otro siegu, nan tur dos ta kai den buraku.’

¹⁵E ora ei, Pedro a pidiÉ: ‘Splika nos e komparashon ku Bo a konta e fariseonan.’

¹⁶Hesus a bisa nan: ‘Asina tiki komprondementu boso tambe tin ainda?

¹⁷Boso no ta komprondé ku tur loke drenta den boka di un hende ta bai den su barika i e ta sak'é bèk?

¹⁸Loke sali for di boka di un hende, ta sali for di su kurason i ta e kosnan ei ta hasié impuru.

¹⁹For di kurason di hende ta sali: pensamentu malu, matamentu, kibramentu di fidelidat di matrimonio, inmoralidat, ladronisia, testimonio falsu i papiamentu riba hende.

²⁰Ta tur e kosnan akí ta hasi hende impuru; kome sin laba man promé no ta hasié impuru.’

²¹For di einan Hesus a kohe kaminda pa region di Tiro i Sidon.

²²Awor un señora kanaanita, ku tabata biba den e region ei, a aserká Hesus gritando: ‘Tene piedat di mi, Señor, Yu di David! Mi yu muhé ta poseé: e ta hopi malu.’

²³Ma Hesus no a kontest'é niun pia di palabra. Su disipelnan a bai serka Hesus i a bis'É: ‘Manda e muhé akí bai; e ta kana grita nos tras.’

²⁴Awor Hesus a kontestá e señora i bisa: ‘Ta serka e karnénan pèrdí di pueblo di Israel so a manda Mi.’

²⁵E muhé a bai serka djE, hinka rudia su dilanti i bisa: ‘Señor, yuda mi!’

²⁶Ma Hesus a kontest'é: ‘No ta bon pa tira pan di e muchanan pa kachó.’

²⁷E señora a rospondé: ‘Bèrdat, Señor, pero e kachónan bou di mesa tambe ta kome wiriwiri ku nan doño laga kai!’

²⁸E ora ei Hesus a bis'é: ‘Señora, bo fe ta grandi. Sosodé ku bo manera bo ke.’ I na e mes momento ei su yu muhé a bira bon atrobe.

²⁹Hesus a bai for di einan; El a yega banda di lago di Galilea, subi seru i kai sinta.

³⁰Un multitut grandi a trese nan hendenan lam, mankaron, siegu, muda i hopi otro enfermo i pone e hendenan akí na pia di Hesus. I El a kura nan.

³¹E multitut a keda asombrá, ora nan a mira muda papia, hende mankaron kura, hende lam kana i siegu mira. I nan a alabá e Dios di Israel.

³²Hesus a yama su disipelnan i bisa: ‘Mi tin duele di e hendenan akí, pasobra nan tin tres dia kaba serka Mi i nan no tin nada di kome. Mi no ke manda nan bai kas stoma bashí pa nan no kai flou na kaminda.’

³³Su disipelnan a kontest'É: ‘Unda por haña tantu pan asina na e lugá solitario akí pa asina tantu hende kome yena nan barika?’

³⁴‘Kuantu pan boso tin?’ Hesus a puntra i nan a kontestá: ‘Shete i algun piská chikí.’

³⁵Hesus a manda tur hende sinta abou na suela.

³⁶Despues El a kohe e shete pan- ku e piskánan, gradisí Dios, kibra nan i duna su disipelnan i nan a parti pa e hendenan.

³⁷Tur hende a kome yena nan barika. Tambe e disipelnan a yena shete makutu grandi ku pida pida pan ku a sobra.

³⁸Na tur kuater mil hòmber a kome di e kuminda, ke men sin konta e muhénan i e muchanan.

³⁹Despues ku Hesus a laga e hendenan bai, El a drenta boto i a sigui pa region di Magadan.