Read Papiamento Mateo 17 Bible Online

Mateo 17 - Papiamento bible

Mateo 17

¹Seis dia despues Hesus a kohe Pedro, Hakobo i Huan, ruman di Hakobo, i hiba nan riba un seru altu kaminda nan tabata nan so.

²Ei nan dilanti, El a kambia di aparensia. Su kara a kuminsá bria manera solo i su paña a bira briante manera lus.

³Diripiente nan a mira Moises i Elías ta papia ku Hesus.

⁴Pedro a bisa Hesus: ‘Señor, ta bon ku nos t'aki! Si Bo ke, mi ta traha tres tènt: un pa Bo, un pa Moises i un pa Elías.’

⁵Segun Pedro tabata papia, diripiente un nubia luminoso a bin para riba nan. Nan a tende un stèm for di den e nubia bisa: ‘Esaki ta mi Yu stimá, legria di mi kurason; tende di djE.’,

⁶Ora e disipelnan a tende e stèm, nan a kai abou na suela, morto spantá.

⁷Hesus a aserká nan, mishi ku nan i bisa: ‘Lanta ariba, no tene miedu.’

⁸Ora e disipelnan a hisa kara, nan no a mira niun hende mas; Hesus so tabata serka nan.

⁹Ora nan tabata baha for di e seru, Hesus a ordená nan pa no konta niun hende nada di loke nan a mira, te dia Yu di hende, lanta for di morto.

¹⁰E disipelnan a puntra Hesus: ‘Di kon e dòktornan di lei ta bisa ku Elías mester bini promé?’

¹¹Hesus a kontestá: ‘Enberdat Elías ta bini promé i restourá tur kos promé.

¹²Pero Ami ta bisa boso: Elías a bini kaba, ma nan no a rekonosé; nan a hasi kuné manera nan a haña ta bon i asin'ei Yu di hende tambe lo sufri na nan man.’

¹³E ora ei e disipelnan a bin komprondé, ku ta di Huan Boutista E tabata papia.

¹⁴Ora nan a yega serka e multitut, un hòmber a aserká Hesus, hinka rudia su dilanti

¹⁵i bisa: ‘Señor, tene mizerikòrdia ku mi yu hòmber, e ta sufri hopi; e ta kai djimpi i vários be el a yega di kai den kandela i den awa.

¹⁶Awor mi a tres'é pa bo disipelnan, ma nan no por a kur'é.’

¹⁷E ora ei, Hesus a bisa: ‘Esta un generashon sin fe! Esta un generashon perverso! Ta kuantu tempu mas Mi tin ku keda huntu ku boso? Pa kuantu tempu mas Mi tin ku sigui soportá boso? Trese e mucha pa Mi!’

¹⁸Hesus a skual e demoño seriamente i el a sali for di e mucha. E mucha a kura for di e momento ei.

¹⁹E disipelnan a bin puntra Hesus den privá kon bini nan no por a saka e spiritu for di e mucha hòmber.

²⁰Hesus a kontestá nan: ‘Pasobra boso ta hende di poko fe. Mi ta sigurá boso: si boso fe tabata mes chikí ku un pipita di mòster, boso lo a bisa e seru ei: “kita bai for di aki i bai aya!”, i e seru lo a hasié tambe. Nada lo no ta imposibel pa boso.’ [

²¹Ta solamente orashon i ayuno ta saka e sorto di spiritu akí for di hende.]

²²Ora e disipelnan a bini huntu na Galilea, Hesus a bisa nan: ‘Yu di Hende lo keda entregá den man di hende

²³i nan lo mat'É, ma riba e di tres dia lo E lanta for di morto.’ E disipelnan a bira mashá tristu.

²⁴Hesus a bai Kafárnao huntu ku su disipelnan. Ora nan tabata aya, e kobradónan di belasting di tèmpel a bini serka Pedro i puntr'é: ‘Bo maestro no ta paga belasting di tèmpel?’

²⁵Pedro a kontestá: ‘Kómpolaga!’ Ora Pedro a yega kas, Hesus a puntr'é, promé ku e mes por a bisa algu: ‘Kiko bo ta opiná, Simon: ken mester paga belasting na e reinan di e mundu akí? Nan yunan òf e strañeronan?’

²⁶‘E strañeronan,’ Pedro a kontestá. E ora ei Hesus a bis'é: ‘Wèl, esei ta nifiká antó ku e yunan mes ta liber.

²⁷Ma pa nos no ofendé e hendenan akí, bai lago i tira un liña. Saka e promé piská ku kome i habri su boka. Lo bo haña un moneda di plata ku ta sufisiente pa paga nos belasting. Koh'é i paga belasting pa nos tur dos.’