Read Papiamento Mateo 18 Bible Online

Mateo 18 - Papiamento bible

Mateo 18

¹Den e tempu ei, e disipelnan a aserká Hesus i bis'É: ‘Ken ta mas importante den reino di shelu?’

²Hesus a yama un mucha chikí pon'é para meimei di nan,

³i bisa: ‘Mi ta sigurá boso: si boso no kambia bira manera mucha, boso lo no por drenta reino di Dios.

⁴Esun ku ta humilde manera e mucha akí, ta esun di mas importante den reino di Dios.

⁵I es ku risibí un mucha asin'akí den mi nòmber, ta risibí Mi mes.

⁶Pa e hende ku pone un di e chikínan akí ku ta konfia den Mi, kai den piká, ta mihó si mara un piedra grandi di mulina rònt di su garganta i hog'é den laman.

⁷Ta tristu ku den mundu tin kos ku ta pone hende kai den piká. Awor no por evitá ku tin kos ku ta pone hende kai den piká, ma ai di e persona ku ta pone otro hende pèrdè fe.

⁸Si bo man òf bo pia ta pone bo kai den piká, kap e kita afó; mihó drenta bida eterno mankaron òf koho, ku bai tirá den e kandela ku no ta paga nunka mas, ku dos man òf dos pia.

⁹Si ta bo wowo ta pone bo kai den piká, rank'é saka afó; mihó bo drenta bida eterno ku un wowo so, ku bai tirá den kandela di fièrnu ku dos wowo.

¹⁰Sòru pa boso no trata niun di e chikitunan akí ku menospresio. Un kos Mi por bisa boso: e angelnan ku ta enkargá ku nan, ta den presensia di mi Tata den shelu. [

¹¹Yu di hende a bini pa salba esun ku ta pèrdí!]

¹²Kiko ta boso opinion tokante lo siguiente. Suponé ku ún karné di un doño di shen karné pèrdè kaminda. E doño lo no laga e otro 99 karnénan den seru, pa e bai buska esun pèrdí?

¹³Mi ta sigurá boso: lo e ta mas kontentu ku esun ei, ora e hañ'é, ku e ta ku e 99 karnénan ku no a pèrdè kaminda.

¹⁴Meskos asina, boluntat di boso Tata den shelu ta, pa ningun di e chikitunan akí no bai pèrdí.

¹⁵Si un ruman faya ku bo,[24] bai serka dje i skual e, bo so kuné. Si e tende, bo a gana bo ruman bèk.

¹⁶Ma si e no tende di bo, bai ku un òf dos ruman mas, pasobra asina, manera Skritura ta bisa: Tur loke boso papia por keda konfirmá pa testimonio di dos òf mas testigu.

¹⁷Si e ruman nenga di tende, hiba henter e asuntu dilanti di iglesia. I si ainda e no ke tende, trat'é komo si fuera ta un pagano òf kobradó di belasting e ta.

¹⁸Mi ta sigurá boso: Loke boso prohibí na tera, lo ta prohibí den shelu tambe; loke boso pèrmití na tera, lo ta pèrmití den shelu tambe.

¹⁹Mi ta sigurá boso tambe: si dos di boso resa di akuerdo ku otro pa kiko ku ta aki na tera, mi Tata ku ta den shelu, lo hasié pa boso.

²⁰Pasobra kaminda dos òf tres reuní den mi nòmber, Ami lo ta huntu ku nan.’

²¹E ora ei Pedro a aserká Hesus i puntr'É: ‘Señor, kuantu bia mi mester laga mi ruman peka kontra mi i tòg pordon'é? Te shete bia?’

²²Hesus a kontest'é: ‘Nò, no shete bia, ma setentishete bia.[25],

²³P'esei por kompará reino di Dios ku lo siguiente. Tabatin un rei ku a disidí di hasi kuenta ku su kriánan ku tabata deb'é.

²⁴Ora el a kuminsá hasi esaki, nan a trese un hòmber ku tabata deb'é sesenta mion moneda di plata.

²⁵Komo ku e hòmber no por a paga su debe, rei a duna òrdu pa bend'é, ku kasá ku yu, ku tur su propiedat.

²⁶E kriá a kai na rudia dilanti di rei i rog'é: “Tene pasenshi[26] ku mi; lo mi paga bo tur kos bèk!”

²⁷Rei a haña duele di dje; el a lag'é bai i a kanselá e debe.

²⁸E hòmber a sali for di ei, i topa un kriá ku tabata deb'é shen mil moneda di plata. El a kohe e kriá tene, chok'é i bis'é: “Paga mi loke bo debe mi!”

²⁹E otro a tira su kurpa abou na suela i a rog'é: “Tene pasenshi ku mi; lo mi paga bo bèk!”

³⁰Ma e hòmber no tabata ke, el a laga tira esun ku tabata deb'é den prizòn, te dia esaki pag'é tur su plaka.

³¹E otro kriánan ku a mira kiko a pasa, a bira tur aríbabou bai konta rei tur kos.

³²E ora ei rei a manda yama e hòmber i bis'é: “Kriá mal hende! Mi a kanselá henter bo debe, djis pasobra bo a roga mi.

³³Bo mester a tene mizerikòrdia ku bo kompañero kriá meskos ku ami a tene mizerikòrdia ku bo.”

³⁴Rei a rabia mashá pisá i entreg'é na e wardadónan di prezu pa tortur'é te dia e paga tur su debe.

³⁵Meskos asina, mi Tata ku ta den shelu, lo hasi ku kada un di boso, ku no pordoná su ruman di kurason.’