Read Papiamento Mateo 22 Bible Online

Mateo 22 - Papiamento bible

Mateo 22

¹Hesus a sigui ku un otro parábola. El a bisa:

²‘Reino di Dios ta asin'akí. Un dia un rei a prepará un fiesta di kasamentu pa su yu hòmber.

³El a manda su kriánan bai yama e invitadonan, ma e invitadonan a nenga di bini.

⁴El a manda otro kriá ku e mensahe akí pa su invitadonan: “Tur preparashon pa e komementu ta kla. A mata mi toro i bisénan gòrdá kaba. Tur kos ta kla! Bini kasamentu!”

⁵Ma e invitadonan no a hasi kaso i a sigui ku nan asuntunan. Un a bai su kunuku, un otro a bai su negoshi.

⁶E otronan a kohe e kriánan maltratá nan i mata nan.

⁷Rei a bira furioso manda su sòldánan bai mata e asesinonan ei i kima nan siudat.

⁸Despues el a bisa su otro kriánan: “Tur kos ta kla pa kasamentu, ma e hendenan ku mi a invitá, no tabata meresé e invitashon.

⁹P'esei bai na e kamindanan prinsipal pa siudat i invitá tur hende ku boso topa.”

¹⁰E kriánan a sali bai den kaya i a reuní tur hende ku nan a haña, tantu bon hende komo mal hende. E sala di kasamentu a yena yen di invitado.

¹¹Ma ora rei a drenta pa mira e invitadonan, el a mira un hòmber ku no tabata bistí na paña di kasamentu.

¹²El a bis'é: “Amigu, kon bo a hasi drenta aki sin paña di kasamentu bistí?” E hòmber a keda ketu.

¹³E ora ei rei a bisa su kriánan: “Mara su man i pianan i tir'é pafó den skuridat profundo.” Aya, hende lo yora i morde djente di doló.

¹⁴Hopi ta invitá ma poko ta skohí.’

¹⁵E fariseonan a kita bai i nan a traha plan pa kohe Hesus den trampa ku su mes palabranan.

¹⁶Nan a manda nan disipelnan huntu ku algun hende di Heródes serka Hesus. Nan a bis'É: ‘Maestro, nos sa ku bo ta un hende honesto; segun bèrdat bo ta siña hende kon Dios ke pa nan biba. Bo no ta wòri bo kabes ku loke hende ta pensa, pasobra Bo no ta husga segun aparensia.

¹⁷Bisa nos kiko bo ta pensa antó: Ta korekto pa paga belasting na emperador di Roma; sí òf nò?’

¹⁸Hesus tabata sa ki mal intenshon nan tabatin, p'esei El kontestá: ‘Pakiko boso ta buska moda di laga Mi kai den trampa? Hipókritanan!

¹⁹Laga Mi mira un moneda ku ta usa pa paga belasting.’

²⁰Nan a hiba un moneda di plata p'E i Hesus a sigui bisa: ‘Ken su nòmber i su imágen tin aki riba?’

²¹Nan a kontestá: ‘Di emperador.’ E ora ei Hesus a bisa nan: ‘Wèl, duna emperador loke ta di emperador i Dios loke ta di Dios.’

²²Ora nan a tende loke El a bisa, nan a keda asombrá i a kita bai lag'É.

²³E mesun dia ei algun saduseo, esta e hendenan ku tabata bisa ku hende lo no lanta for di morto, a bini serka Hesus

²⁴i bis'É: ‘Maestro, Moises a bisa den lei: “Si un hòmber muri sin laga yu atras, su ruman hòmber mester kasa ku e biuda pa asina duna yu na su ruman ku a muri.”

²⁵Awor, tabatin shete ruman hòmber ta biba aki. E mayó a kasa i a muri. Komo e no tabatin yu, el a laga su kasá pa su ruman.

²⁶Asina a pasa ku e di dos, despues ku e di tres i al fin ku tur shete ruman.

²⁷Por último e muhé mes a muri bai.

²⁸Awor riba dia di resurekshon, ta kasá di kua di e shete rumannan e muhé lo ta? Tur tabata kasá kuné tòg?’

²⁹Hesus a kontestá: ‘Boso ta kibuká komo boso no konosé Skritura ni poder di Dios.

³⁰Pasobra dia hende lanta for di morto, hòmber lo no kasa ni lo no entregá hende muhé pa kasa, pero nan lo ta manera angel den shelu.

³¹Loke ta e asuntu di resurekshon: boso no a lesa ku Dios a bisa boso:

³²Mi ta Dios di Abraham, Dios di Isak i Dios di Yakob? Dios no ta Dios di morto sino di hende bibu.’

³³Ora e multitut a tende loke El a bisa, nan a keda babuká di tende su siñansa.

³⁴Ora e fariseonan a tende ku Hesus a tapa e saduseonan su boka, nan a reuní.

³⁵Un di nan, un eksperto den lei, a purba kohe Hesus den trampa ku un pregunta. El a puntr'É:

³⁶‘Maestro, kua ta e mandamentu di mas importante den lei?’

³⁷Hesus a kontest'é: ‘ “Stima Señor, bo Dios, di henter bo kurason, ku henter bo alma i ku henter bo mente.”

³⁸Esei ta e mandamentu di mas grandi i di mas importante.

³⁹Ma e di dos mandamentu ta mes importante: “Stima bo próhimo manera bo ta stima bo mes.”

⁴⁰Henter e lei di Moises i e siñansa di e profetanan ta dependé di e dos mandamentunan akí.’

⁴¹Miéntras e fariseonan tabata huntu ainda, Hesus a puntra nan: ‘Kiko boso ta pensa di Mesias? Yu di ken E ta?’

⁴²Nan a kontest'É: ‘Yu di David!’

⁴³Hesus a bisa nan: ‘Ta di kon David mes antó, guiá pa Spiritu Santu, ta yam'É Señor, ora e bisa:

⁴⁴“Señor Dios a bisa mi Señor: Sinta Bo na mi man drechi, te ora Mi pone bo enemigunan na bo pia.”

⁴⁵Awor si David mes ta yam'É Señor, kon e Mesias por ta desendiente di David?’

⁴⁶Niun hende no por a kontestá su pregunta i for di e dia ei nan no a tribi puntr'É nada mas.