Read Papiamento Mateo 23 Bible Online

Mateo 23 - Papiamento bible

Mateo 23

¹Hesus a bisa e multitut i su disipelnan:

²‘E dòktornan di lei i e fariseonan ta sinta riba stul di Moises; nan tin outoridat ofisial pa splika lei di Moises.

³P'esei obedesé i sigui tur kos ku nan bisa, ma no hasi manera nan ta hasi sí! Pasobra nan mes no ta hasi loke nan ta bisa.

⁴Nan ta pone karga pisá i difísil riba lomba di hende, ma nan no ke saka niun dede pa yuda ku e karga.

⁵Nan ta hasi tur kos pa hende mira; mira kon hanchu nan kahitanan di orashon i kon largu e kuashinan di nan paña ta.

⁶Nan gusta haña e mihó lugánan na fiesta i e lugánan di honor den snoa;

⁷nan gusta pa hende kumindá nan ku rèspèt riba plasa i tambe pa hende yama nan “maestro”.

⁸No laga niun hende yama boso sí “maestro”; ta ún maestro so boso tin i boso tur ta ruman.

⁹No ta yama niun hende riba mundu boso “tata” tampoko, pasobra ta e Tata den shelu so boso tin.

¹⁰Tampoko no laga niun hende yama boso “guia”, pasobra ta e Mesias so ta boso guia.

¹¹Esun di mas importante meimei di boso, lo ta boso sirbidó.

¹²Ken ku alsa su mes, lo ta humiliá i ken ku humiliá su mes, lo ta alsá.

¹³Ai di boso, dòktornan di lei i fariseonan! Hipókritanan! Boso ta dal porta di reino di Dios sera den kara di hende. Boso mes no ta drenta paden, ma ora otro hende ta bai drenta, boso no ta pèrmití nan. [

¹⁴Ai di boso, dòktornan di lei i fariseonan! Hipókritanan! Boso ta hòrta propiedat di biudanan i boso ta hasi orashonnan largu djis pa bista di hende. Ma boso sentensia lo ta hopi mas pisá!]

¹⁵Ai di boso, dòktornan di lei i fariseonan! Hipókritanan! Boso ta krusa laman i biaha rònt mundu pa gana un alma, ma ora boso hañ'é, boso ta dañ'é di moda ku e ta meresé di bai fièrnu dos be mas tantu ku boso!

¹⁶Ai di boso, guianan siegu ku boso ta! Boso ta siña: “Si un hende hura pa tèmpel, e no ta mará na loke el a bisa. Ma si e hura pa e oro den tèmpel, sí e ta mará na loke el a bisa.”

¹⁷Siegunan sin sintí! Kiko ta mas importante: e oro òf e tèmpel ku ta santifiká e oro?

¹⁸Tambe boso ta bisa: “Si un hende hura pa altá, e no ta mará na loke el a bisa. Ma si e hura pa e ofrenda ku ta riba altá, sí e ta mará.”

¹⁹Siegunan![29] Kiko ta mas importante: e ofrenda riba altá òf e altá ku ta santifiká e ofrenda?

²⁰Wèl, es ku hura pa altá, ta hura pa tur kos ku tin riba e altá.

²¹Es ku hura pa tèmpel, ta hura pa tèmpel i tambe pa Dios ku ta biba ei den.

²²Es ku hura pa shelu, ta hura pa trono di Dios i pa Dios ku ta sintá riba e trono.

²³Ai di boso, dòktornan di lei i fariseonan! Hipókritanan! Boso ta duna Dios un désimo parti di speserei manera menta, anis i komino, ma boso ta neglishá e kosnan mas importante den lei: hustisia, mizerikòrdia i fieldat. Bèrdat ta ku boso mester kumpli ku e kosnan akí, ma sin neglishá e kosnan di ménos importansia.

²⁴Guianan siegu! Boso ta kola muskita chikí saka for di loke boso ta bebe, ma ta guli kamel grandi manda abou!

²⁵Ai di boso, dòktornan di lei i fariseonan! Hipókritanan! Parti pafó di e tayó ku e kòpi sí boso ta limpia, ma parti paden ta yen di loke boso a haña pa medio di violensia i libertinahe.

²⁶Fariseonan siegu, limpia parti paden di e kòpi promé, anto di mes parti pafó ta bira limpi!

²⁷Ai di boso dòktornan di lei i fariseonan! Hipókritanan! Boso parse e grafnan blanchá blanku, bunita di pafó, ma ku paden ta yen di wesu di hende morto i kos putrí.

²⁸Meskos asina di pafó boso ta mustra di ta hende hustu, ma di paden boso ta yen di hipokresia i piká.

²⁹Ai di boso, dòktornan di lei i fariseonan! Hipókritanan! Boso ta traha graf mashá bunita pa e profetanan i boso ta dekorá Monumento na honor di esnan ku a biba hustu.

³⁰Boso ta bisa: “Si nos a biba den tempu di nos antepasadonan, nos lo no a koperá ku matamentu di e profetanan.”

³¹Ke men, boso mes ta atmití di ta desendiente di e hendenan ku a mata e profetanan.

³²Wèl, kaba e trabou ku boso antepasadonan a kuminsá!

³³Víboranan! Rasa di kolebra, kon boso ta spera di por skapa e sentensia ku ta kondená boso pa bai fièrnu?

³⁴Skucha bon! P'esei Mi ta manda profeta, hòmber sabí i hende vèrsá den lei pa boso. Algun boso lo mata, algun boso lo krusifiká, otro boso lo suta ku zuip den snoa i persiguí di siudat pa siudat.

³⁵Asina e kastigu pa morto di tur hende inosente lo kai riba boso, for di morto di e hòmber hustu Abel, te ku morto di Zakarías, yu di Bèrèkías. E Zakarías ku boso a mata entre altá i santuario den tèmpel.

³⁶Mi ta sigurá boso: e kastigu pa tur e kosnan akí, lo kai riba e generashon akí.

³⁷Herusalèm, o Herusalèm! Abo ku ta mata e profetanan i piedra e mensaheronan ku Dios manda serka bo. Kuantu be Mi no a deseá di hunta bo hendenan, manera un mama galiña ta hala su puitunan bou di su ala. Ma bo no a laga Mi.

³⁸Mira! Boso tèmpel lo keda bandoná i bashí.

³⁹Pasobra Mi ta bisa boso: boso lo no mira Mi mas, te ora e tempu yega ku boso lo bisa: “Bendishoná ta esun ku ta bini den nòmber di Señor!” ’