Read Papiamento Mateo 24 Bible Online

Mateo 24 - Papiamento bible

Mateo 24

¹Ora Hesus a sali for di tèmpel i tabata bai, su disipelnan a aserk'É pa mustr'É e edifisionan di tèmpel.

²Hesus a bisa nan: ‘Boso ta mira tur e kosnan akí? Mi ta sigurá boso: Niun piedra lo no keda na su lugá; lo basha tur abou!’

³Ora Hesus tabata sintá riba Seru di Oleifi, e disipelnan a bin puntr'É den privá: ‘Bisa nos: ki dia e kosnan akí lo sosodé? Na kua señal nos por mira ku Bo ta serka di bini i ku fin di tempu ta serka di yega?’

⁴Hesus a bisa nan: ‘Tene kuidou, no laga niun hende gaña boso.

⁵Hopi lo bin usa mi nòmber i bisa: “T'ami ta e Mesias!”, i nan lo gaña hopi hende.

⁶Boso lo tende di guera i rumor tokante guera; sòru pa boso no bira sobresaltá, pasobra e kosnan akí mester sosodé, ma lo no ta e fin ainda.

⁷Nashon lo lanta kontra nashon, reino kontra reino; lo tin temporada di mizeria di hamber[30] i temblor na diferente lugá.

⁸Tur e kosnan akí lo ta kuminsamentu di dolónan di parto.

⁹Nan lo entregá boso den man di outoridat, pa boso sufri i mata boso. Hende di tur pueblo lo odia boso pa mi motibu.

¹⁰Den e tempu ei hopi lo stòp di kere: nan lo traishoná otro i odia otro.

¹¹Hopi profeta falsu lo aparesé i nan lo gaña hopi hende.

¹²Maldat lo plama asina tantu ku amor di hopi hende lo fria,

¹³ma esun ku perseverá te na final lo ta salbá!

¹⁴Lo prediká e bon notisia di e reino rònt mundu komo testimonio pa tur nashon. Anto e ora ei, fin lo yega!

¹⁵Ora boso mira e “kos repugnante ku ta trese destrukshon”, ku profeta Daniel a papia di dje, poné den e lugá santu (komprondé bon kiko esaki ke men, lesadó),

¹⁶habitantenan di Hudea, hui e ora ei bai den seru.

¹⁷Esun ku ta riba dak di su kas, no pèrdè tempu baha bai kohe nada den kas.

¹⁸Esun ku ta den kunuku, no bira bèk bai kohe paña.

¹⁹Ai di e muhénan na estado i di e mamanan ku tin yu na lechi den e dianan ei!

²⁰Resa pidi Dios pa boso huimentu no tuma lugá den wenter, tempu di friu òf riba sabat,

²¹pasobra lo tin un mizeria grandi manera nunka mundu no a yega di weta, for di dia el a kuminsá te awor akí! Un mizeria grandi asina lo no bini nunka mas atrobe.

²²Si Dios no a hasi e tempu ei mas kòrtiku, ningun hende lo no skapa, ma pa motibu di esnan ku Dios a skohe, e tempu ei lo ta mas kòrtiku.

²³Anto ora un hende bisa boso: “Mira! Ata e Mesias aki!” òf: “Ata e Mesias aya,” no ker'é.

²⁴Hende ku ta pretendé di ta e Mesias i di ta profeta, lo lanta; nan lo mustra señal grandi i hasi milager pa asina desviá asta e eskohidonan di Dios, si ta posibel.

²⁵Mi a konta boso tur kos di antemano!

²⁶P'esei antó, si nan bisa boso: “Mira, ata e Mesias den desierto”, no bai aya. Òf si nan bisa: “At'É ayaden!”, no kere nan.

²⁷Meskos ku welek ta kòrta den ost i por mir'é te den wèst, asina binida di e Yu di hende lo ta.

²⁸Kaminda tin kadaver, ei warawara ta reuní!

²⁹Mesora despues di e dianan di e gran mizeria ei, skuridat lo tapa solo, i luna lo no bria mas, strea lo kai for di shelu, i e podernan selestial lo tambaliá.

³⁰E ora ei, lo mira señal di e Yu di hende aparesé na shelu; tur pueblo na mundu lo bati riba nan pechu di remordimentu. Nan lo mira e Yu di hende bini riba nubia, ku gran poder i gloria.

³¹Despues ku un tròmpèt grandi resoná, lo E manda su angelnan reuní su eskohidonan for di e kuater skinanan di mundu, for di un ekstremo di mundu te e otro ekstremo.

³²Siña lo siguiente di palu di figo. Ora su takinan bira moli i su blachinan kuminsá spreit, boso sa ku zomer ta na kaminda.

³³Sa antó tambe, ku ora boso mira tur e kosnan akí, ku e ta djis tras di porta.

³⁴Mi ta sigurá boso: E kosnan akí lo pasa promé ku e generashon akí pasa bai.

³⁵Shelu i tera sí lo pasa bai, ma mi palabranan nò!

³⁶Niun hende no sa ki dia ta e dia òf ki ora ta e ora, ni angelnan den shelu ni e Yu[31] no sa; Dios Tata so sa esei.

³⁷Meskos ku a pasa den tempu di Noe, lo pasa dia e Yu di hende bini.

³⁸Den e dianan ei, promé ku diluvio, e hendenan tabata kome, bebe i kasa, te dia Noe a drenta arka.

³⁹Nan no tabata realisá kiko tabata pasa te ora diluvio a bin hisa nan tur bai kuné; asina lo pasa, ora e Yu di hende bini.

⁴⁰Lo tin dos hòmber den kunuku; un ta keda, e otro e Yu di hende ta bai kuné.

⁴¹Lo tin dos muhé ta mula trigo ku un mulina di man; un ta keda, e otro e Yu di hende ta bai kuné.

⁴²P'esei, sea alerta! Pasobra boso no sa ki dia[32] boso Señor ta bini.

⁴³Bo por ta sigur: si doño di kas tabata sa ki ora den anochi ladron ta bini, lo el a keda lantá i lo no a laga ladron kibra drenta su kas.

⁴⁴P'esei boso tambe sea semper prepará antó, pasobra e Yu di hende ta bini un ora ku bo no ta sper'É!

⁴⁵Ken antó lo ta e kriá fiel i sabí ku su shon ta pone na kabes di su kas, pa duna e otro kriánan kuminda na e ora adekuá?

⁴⁶Felis e kriá ei lo ta, si su shon yega hañ'é ta hasi su trabou.

⁴⁷Mi ta sigurá boso: e shon lo dun'é outoridat riba tur su propiedatnan.

⁴⁸Awor, si e ta un mal kriá, lo e pensa den su mes: “Mi señor ta tarda pa bini kas”,

⁴⁹i lo e kuminsá bati e otro kriánan i kome bebe huntu ku buraché.

⁵⁰Su shon lo bolbe un dia ku e kriá no sa ni ta sper'é.

⁵¹Lo e kap e kriá na pida pida i pon'é den e lugá destiná p'e, serka e hipókritanan. Aya hende lo yora i morde djente di doló.