Read Papiamento Mateo 28 Bible Online

Mateo 28 - Papiamento bible

Mateo 28

¹Despues di sabat, na kuminsamentu di e promé dia di siman, Maria Magdalena i e otro Maria a bai wak e graf.

²Diripiente tabatin un temblor pisá, pasobra un angel di Señor a baha for di shelu, lora e piedra kita for di entrada i kai sinta riba dje.

³E angel tabata bria manera ora welek ta kòrta i su paña tabata blanku manera lechi.

⁴E sòldánan ku tabata tene warda, tabata tembla di miedu. Nan a kai abou na suela, drumí manera morto.

⁵Ma e angel a bisa e muhénan: ‘No spanta! Mi sa ku boso ta buska Hesus, Esun ku nan a krusifiká.

⁶E no t'aki; El a resusitá, manera E mes a bisa ku lo sosodé. Bin mira e lugá kaminda su kurpa tabata poné.

⁷Bai lihé bai bisa su disipelnan: “El a lanta for di morto; E ta bai Galilea boso dilanti. Einan boso lo mir'É.” T'esei mi mester a bisa boso.’

⁸E muhénan a bai purá for di e graf, yen di miedu, ma tòg hopi kontentu. Nan a kore bai konta su disipelnan kiko a pasa.

⁹Ma na kaminda, ata Hesus a bin kontra nan i a kumindá nan. E muhénan a hala serka djE, kohe su pia tene i a ador'É.

¹⁰E ora ei Hesus a bisa nan: ‘No tene miedu! Bai bisa mi rumannan ku nan mester bai Galilea; ei nan lo mira Mi.’

¹¹Miéntras e muhénan tabata na kaminda, algun di e sòldánan ku tabata tene warda, a bai siudat bèk i a konta e saserdotenan importante tur kos ku a pasa.

¹²Despues di a reuní ku e ansianonan i a traha un plan, nan a duna e sòldánan un bon kantidat di plaka

¹³i a bisa nan: ‘Bisa e hendenan ku ta su disipelnan a bai hòrta e kurpa den anochi, ora boso tabata na soño.

¹⁴Si e kos akí yega na orea di gobernador, nos lo drecha e asuntu kuné di tal manera ku boso lo no haña boso den problema.’

¹⁵E sòldánan a tuma e sèn i a hasi manera a bisa nan. Asin'ei e kuenta a sigui plama entre e hudiunan te dia djawe.

¹⁶E diesun disipelnan a bai e seru na Galilea, kaminda Hesus a bisa nan pa bai.

¹⁷Ora nan a mira Hesus, nan a hinka rudia ador'É, ounke tabatin algun ku tabata duda.

¹⁸Hesus a aserká nan i bisa: ‘A entregá Mi tur outoridat riba mundu i den shelu.

¹⁹Bai antó i hasi hende den tur nashon mi disipel: batisá nan den nòmber di Tata, di Yu i di Spiritu Santu

²⁰i siña nan kumpli ku tur loke Mi a manda boso. I sa ku Mi ta ku boso tur dia, te na fin di mundu.’[44]