Read Papiamento Mateo 3 Bible Online

Mateo 3 - Papiamento bible

Mateo 3

¹Den e dianan ei Huan Boutista a bini desierto di Hudea pa prediká

²i el a bisa: ‘Bira lomba pa piká, pasobra reino di shelu ta serka.’

³E tabata e hòmber di ken profeta Isaías a bisa: ‘Un hende ta grita den desierto: Prepará kaminda pa Señor, hasi kaminda korkobá règt pa E pasa.’

⁴Huan tabata bisti paña trahá di lana di kamel i e tabatin un faha di kueru na su sintura. E tabata kome dalakochi i miel di abeha di mondi.

⁵For di Herusalèm, for di henter e region di Hudea i for di henter e region rònt di riu di Yordan tur hende tabata bini serka dje.

⁶Nan tabata konfesá públikamente loke nan a hasi malu i e tabata batisá nan den riu di Yordan.

⁷Ora Huan a mira ku hopi fariseo i saduseo tabata bini serka dje pa batisá, el a bisa nan: ‘Rasa di kolebra, ken a atvertí boso pa boso hui pa e huisio benidero di Dios?

⁸Mihó boso produsí fruta adekuá pa mustra ku boso a kombertí.

⁹No pensa den boso mes ku boso ta skapa pasobra boso ta desendiente di Abraham. Ami ta bisa boso: Dios por traha desendiente pa Abraham for di e piedranan ku tin aki.

¹⁰Ya a pone machete kla na pia di e palunan pa kòrta tur palu ku no karga bon fruta tira afó den kandela.

¹¹Ami ta batisá boso ku awa ku mira riba boso kombershon, ma Esun ku ta bini despues di mi lo batisá boso ku Spiritu Santu i kandela. E ta mas importante ku mi; mi no ta sirbi ni pa kita su sandalia for di su pia!

¹²E tin e zefta pa bencha trigo kla den su man i lo E limpia su plenchi di bati trigo. Lo E hunta e trigo den mangasina, ma e bagas E ta kima den kandela ku no ta kaba nunka!’

¹³Den e tempu ei Hesus a bini for di Galilea serka Huan na riu di Yordan pa Huan batis'É.

¹⁴Huan ker a stòp E, p'esei el a bis'É: ‘Ta ami mester laga Abo batisá mi, anto Abo ta bini serka mi?’

¹⁵Ma Hesus a kontest'é: ‘Laga bai asina numa, pasobra ta di e forma akí nos mester kumpli ku tur loke ta boluntat di Dios.’ E ora ei Huan a batisá Hesus numa.

¹⁶Nèt ora Hesus tabata sali for di awa, shelu a habri p'E i El a mira Spiritu di Dios a baha riba djE manera un palomba.

¹⁷A zona un stèm for di shelu: ‘E ta mi Yu stimá; E ta legria di mi kurason.’