Read Papiamento Mateo 4 Bible Online

Mateo 4 - Papiamento bible

Mateo 4

¹Spiritu di Dios a hiba Hesus den desierto pa diabel purba lag'É kai den tentashon.

²Despues di a yuna kuarenta dia largu, Hesus a haña hamber.

³E tentadó a bini serka djE i bis'É: ‘Si Bo ta Yu di Dios, manda e piedranan ei bira pan!’

⁴Hesus a kontest'é: ‘Skritura ta bisa: “Hende no ta keda na bida dor di kome pan so; pa tur kos e ta dependé di palabra di Dios.” ’

⁵Despues diabel a bai e siudat santu kunÉ i a pon'É riba e punta di mas altu di tèmpel.

⁶El a bisa Hesus: ‘Si Bo ta Yu di Dios, benta bo kurpa abou, pasobra tòg Skritura ta bisa: “Lo E duna su angelnan òrdu tokante Bo; nan lo karga Bo den nan man, pa Bo no dal bo pia kontra piedra.” ’

⁷Hesus a kontest'é: ‘Ma Skritura ta bisa tambe: No pone Señor bo Dios na prueba.’

⁸Tambe diabel a bai ku Hesus riba un seru mashá altu mes kaminda el a mustr'É tur e reinonan di mundu den tur nan grandesa.

⁹El a bisa Hesus: ‘Si Bo kai na rudia adorá mi, Bo ta haña tur e kosnan akí serka mi.’

¹⁰Hesus a kontest'é: ‘Kita for di mi bista, satanas! Pasobra Skritura ta bisa: “Señor, bo Dios, so bo mester adorá i t'E so bo mester sirbi.” ’

¹¹E ora ei diabel a bai lag'É i angelnan a bin sirbiÉ.

¹²Ora Hesus a tende ku nan a entregá Huan i a koh'é prezu, El a retirá bai Galilea.

¹³E no a keda Nazarèt, ma a bai biba na Kafárnao kant'i lago di Galilea, den region di Zebulon i Naftali.

¹⁴Asina e siguiente palabranan di profeta Isaías a keda kumplí:

¹⁵‘Tera di Zebulon i Naftali, ruta kant'i laman, region n'e otro banda di Yordan, Galilea, distrito di pagano.

¹⁶E pueblo ku tabata biba den tiniebla ta mira un lus grandi. Nan tabata biba den un tera ku skuridat profundo, pero un lus ta bria riba nan.’

¹⁷For di e momento ei Hesus a kuminsá proklamá: ‘Bira lomba pa piká, pasobra reino di shelu ta serka.’

¹⁸Hesus tabata kana un bia kantu di lago di Galilea. El a mira dos ruman piskadó, esta Simon, tambe yamá Pedro, i Andreas. Nan tabata tira reda den lago.

¹⁹Hesus a bisa nan: ‘Sigui Mi i Mi ta hasi boso piskadó di hende.’

²⁰Nan no a pèrdè pa gana, mesora nan a laga nan reda para siguiÉ.

²¹Hesus a sigui kana un poko mas leu i a mira dos otro ruman, Hakobo i Huan, yu di Zebedeo. Nan tabata sintá den boto ta prepará nan reda huntu ku nan tata. Hesus a yama nan i a bisa nan siguiÉ.

²²Mesora nan a bandoná e boto i nan tata Zebedeo pa sigui Hesus.

²³Hesus a biaha rònt Galilea. E tabata duna siñansa den nan snoa, prediká e bon notisia tokante e reino i kura tur enfermedat i malesa ku e pueblo tabatin.

²⁴Su fama a plama rònt Siria; nan tabata trese tur hende malu serka djE, tur ku tabata sufri di kualke enfermedat, ku tabata poseé pa demoño, ku tabata kai djimpi i hende ku tabata lam, i E tabata kura nan.

²⁵Mashá hopi hende di Galilea, Dekápolis, Herusalèm, Hudea i e region na otro banda di Yordan tabata sigui Hesus.