Read Papiamento Mateo 5 Bible Online

Mateo 5 - Papiamento bible

Mateo 5

¹Ora Hesus a mira e multitut akí, El a subi seru kai sinta. E ora ei su disipelnan a bini serka djE.

²El a tuma palabra i siña nan:

³‘Felis esnan humilde di kurason; reino di shelu ta pa nan.

⁴Felis esnan ku ta tristu; Dios lo konsolá nan.

⁵Felis esnan mansu di kurason; nan lo haña mundu komo propiedat.

⁶Felis esnan ku hamber i set pa hustisia; Dios lo satisfasé nan.

⁷Felis esnan ku tene mizerikòrdia ku otro hende; Dios lo tene mizerikòrdia ku nan.

⁸Felis esnan kurason limpi; nan lo mira Dios.

⁹Felis esnan ku ta trese pas; Dios lo yama nan su yu.

¹⁰Felis esnan ku sufri persekushon pa motibu ku nan ta kumpli ku boluntat di Dios; reino di shelu ta pa nan.

¹¹Felis boso ta ora hende zundra boso, persiguí boso i gaña tur sorto di kos malu riba boso pa mi motibu.

¹²Alegrá boso i keda kontentu; den shelu tin un rekompensa grandi pa boso. No ta asina mes nan a trata e profetanan, promé ku boso tempu?

¹³Boso ta salu pa mundu. Si salu pèrdè su stansha, kiko lo dun'é su stansha bèk? E no ta sirbi pa nada mas ku pa tira afó; hende ku pasa por trap'é numa.

¹⁴Boso ta lus pa mundu. No ta posibel skonde un siudat situá riba un seru.

¹⁵Niun hende no ta sende un lampi pa despues pon'é bou di un hèmber, ma ta pon'é riba un standart pa lusa tur hende den kas.

¹⁶Meskos asina, boso mester laga boso lampi bria pa otro hende, pa nan mira boso bon obranan i alabá boso Tata den shelu.

¹⁷No pensa ku Mi a bin pone un fin na siñansa di e bukinan di lei i di e profetanan, al kontrario Mi a bini pa asina Mi laga nan nifikashon berdadero sali na kla.

¹⁸Mi ta sigurá boso: Promé ku shelu i tera pasa bai, niun lèter chikí ni niun pida di un lèter di e lei lo no pasa bai, promé ku tur kos sosodé.

¹⁹P'esei antó, si un hende no mantené asta un di e mandamentunan di ménos importansia na vigor i e siña otro hende hasi mesun kos, lo e ta di ménos importansia den reino di shelu. Pero esun ku kumpli ku nan i siña otro hende kumpli ku nan, lo e ta importante den reino di shelu.

²⁰Ami ta bisa boso: Si boso no kumpli ku lei hopi mas mihó ku e fariseo- i dòktornan di lei, boso no ta drenta reino di shelu.

²¹Boso a tende ku a bisa boso antepasadonan: “No mata. Mester hiba ken ku kometé asesinato dilanti di korte.”

²²Ma Ami ta bisa boso: Mester hiba tur hende ku rabia ku su ruman[5] dilanti di korte. Es ku yama su ruman kabes duru, mester duna kuenta na sanhedrin, e korte supremo. Es ku yama su ruman idiot mester paga p'esei den kandela di fièrnu.

²³P'esei antó, si bo ta bai hiba bo ofrenda altá i bo kòrda einan ku bo ruman tin algu kontra bo,

²⁴laga bo ofrenda para dilanti di altá. Bai hasi bon ku bo ruman promé i despues bini bèk bin hasi bo ofrenda.

²⁵Regla kuenta lihé ku esun ku tin un keho kontra bo, miéntras bo ta na kaminda ainda pa korte, pa e no hiba bo dilanti di hues. Hues lo entregá bo den man di guardia ku lo tira bo den prizòn.

²⁶Mi ta sigurá bo: Lo bo no sali for di ei den promé ku bo kaba di paga e delaster sèn chikí.

²⁷Boso a tende ku a bisa: “No kometé adulterio.”

²⁸Ma Ami ta bisa boso: Ken ku fiha su bista riba un muhé ku deseo, ya a kometé adulterio den su kurason kaba.

²⁹Si bo wowo drechi pone bo kai den piká, sak'é tira afó. Pasobra mihó bo pèrdè un parti di bo kurpa, ku henter bo kurpa bai tirá den fièrnu.

³⁰Si bo man drechi pone bo kai den piká, kòrt'é tira afó. Pasobra mihó bo pèrdè un parti di bo kurpa ku henter bo kurpa bai tirá afó den fièrnu.

³¹A bisa: “Esun ku divorsiá di su kasá mester dun'é un papel di divorsio.”

³²Ma Ami ta bisa boso: Ken ku divorsiá su señora, si no ta pa motibu di inmoralidat seksual, ta pone su señora kometé adulterio si e señora kasa atrobe. Es ku kasa ku e señora divorsiá tambe ta kometé adulterio.

³³Tambe boso a tende ku a bisa: “No kibra e huramentu ku bo a hasi; kumpli ku bo promesanan na Señor.”

³⁴Ma Ami ta bisa boso: No hura mes pa ningun motibu. Ni pa shelu, pasobra shelu ta trono di Dios;

³⁵ni pa tera, pasobra tera ta un banki di pone pia pa Dios; ni pa Herusalèm, pasobra esei ta siudat di e gran rei.

³⁶No hura pa bo mes kabes; bo no por hasi niun drachi di kabei pretu òf blanku.

³⁷Laga bo sí ta sí i bo nò ta nò. Tur loke bo pone aserka ta bini di e malbado.

³⁸Boso a tende ku a bisa: “Wowo pa wowo, djente pa djente.”

³⁹Ma Ami ta bisa boso: No pleita un kaso di inhustisia. Ken ku dal bo na banda drechi di bo kara, bira bo otro band'i kara i lag'é dal bo ei tambe.

⁴⁰I si un hende hiba bo dilanti di korte pa e haña bo paña, lag'é bai ku bo mantel tambe.

⁴¹Si kualke hende fòrsa bo bai un mia kuné, bai dos.

⁴²Esun ku pidi bo algu, dun'é i esun ku ke fia algu serka bo, fi'é.

⁴³Boso a tende ku a bisa: “Stima bo próhimo i odia bo enemigu.”

⁴⁴Ma Ami ta bisa boso: Stima boso enemigunan[6] i resa pa esnan ku ta persiguí[7] boso.

⁴⁵E ora ei boso lo bira yu di boso Tata den shelu, pasobra E ta laga su solo sali tantu riba mal hende komo riba bon hende i ta laga awa kai tantu riba hende hustu komo riba hende inhustu.

⁴⁶Pasobra si bo ta stima solamente esnan ku ta stima bo, kua rekompensa bo por spera e ora ei? E kobradónan di belasting n' ta hasi meskos?

⁴⁷I si ta bo ruman so bo ta kumindá, kiko spesial bo ta hasiendo? Akaso paganonan[8] n' ta hasi meskos?

⁴⁸Sea perfekto antó, manera boso Tata den shelu.