Read Papiamento Mateo 6 Bible Online

Mateo 6 - Papiamento bible

Mateo 6

¹Tene kuidou boso no kumpli ku boso obligashonnan religioso públikamente djis pa hende mira. Sino boso lo no haña rekompensa di boso Tata ku ta den shelu.

²Ora bo ta duna esnan den nesesidat algu, no kana bende grandi pa tur hende mira, manera e hipókritanan ta kana hasi riba kaya i den snoa. Nan ta hasi asina pa hende gaba nan. Mi ta sigurá boso: Ya nan a haña nan pago kaba.

³Ma abo, ora bo ta duna esnan ku ta den nesesidat algu, no laga bo man robes sa kiko bo man drechi ta hasi.

⁴Asina bo dunamentu ta keda sekreto i bo Tata ku ta mira loke ta sekreto lo rekompensá bo.[9]

⁵Ora boso ta resa, no resa manera e hipókritanan; nan gusta para resa den snoa i na skina di kaya pa hende mira nan. Mi ta sigurá boso: Ya nan a haña nan pago kaba.

⁶Ma abo, ora bo ta bai resa, drenta bo kamber sera porta i resa na bo Tata, ku ta den e lugá sekreto akí, i bo Tata ku ta mira loke bo ta hasi den skondí lo rekompensá bo.[10]

⁷Anto ora boso ta resa, no resa ku un lawina di palabra manera pagano; nan ta kere ku Dios ta skucha nan, pasobra nan ta resa ku hopi palabra.

⁸No hasi antó manera nan, pasobra boso Tata sa loke boso mester, promé ku boso pidiÉ.

⁹Resa antó di e forma akí: Nos Tata, ku ta na shelu, bo nòmber sea santifiká;

¹⁰laga bo reino bini; bo boluntat sea hasí na tera meskos ku na shelu.

¹¹Duna nos awe nos pan di kada dia;

¹²i pordoná nos nos faltanan meskos ku nos ta pordoná esnan ku a falta ku nos;

¹³i no laga nos kai den tentashon, ma libra nos di e malbado.[11] [Pasobra di Bo e reino ta, tur poder i gloria, te den eternidat. Amèn.]

¹⁴Si boso pordoná hende nan faltanan, boso Tata ku ta den shelu tambe lo pordoná boso.

¹⁵Ma si boso no pordoná otro hende nan faltanan, boso Tata tampoko no ta pordoná boso faltanan.

¹⁶Ora boso ta yuna, no traha kara fèrdrit manera e hipókritanan; nan ta hasi nan kara mahos pa hende mira ku nan ta yuna. Mi ta sigurá boso: Ya nan a haña nan pago kaba.

¹⁷Ma abo, ora bo ta yuna, laba kara i peña kabei

¹⁸pa asina hende no ripará ku bo ta yuna. Solamente bo Tata, ku ta den skondí, lo mira; i bo Tata ku ta mira loke bo ta hasí na skondí, lo rekompensá bo.[12]

¹⁹No montoná rikesa riba mundu kaminda mòt i frus ta kome nan i ladron ta kibra drenta hòrta nan.

²⁰Montoná rikesa den shelu, einan ni mòt ni frus no por kaba ku nan, ni ladron no por kibra drenta hòrta nan.

²¹Pasobra kaminda bo rikesa ta, einan bo kurason tambe ta.

²²Wowo ta un lampi pa kurpa; ke men si bo wowo ta salú, henter bo kurpa ta yená ku lus.

²³Si bo wowo ta malu, henter bo kurpa ta den skuridat. Anto si e lus den bo ta skuridat, esta un skuridat teribel esei ta!

²⁴Niun hende no por sirbi dos shon, pasobra lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i plaka tambe.

²⁵Mi ta bisa boso: No preokupá pa boso bida, esta si boso tin di kome òf di bebe.[13] Ni tampoko si boso tin paña pa boso bisti. Akaso bo bida no ta bal mas tantu ku kuminda i bo kurpa mas tantu ku paña?

²⁶Wak e paranan den laria; nan no ta sembra ni kosechá, ni nan no ta warda nada den mangasina. Ta boso Tata den shelu ta duna nan di kome! Boso no ta bal mas tantu ku para?

²⁷Ni maske kuantu boso preokupá, ta kua di boso lo por rèk su bida niun krenchi?

²⁸I pakiko boso ta preokupá ku bistimentu? Paga tinu kon e flornan di mondi ta krese. Nan no ta hasi trabou ni traha tela.

²⁹Sinembargo Ami ta bisa boso ku ni rei Salomon den tur su grandesa no tabata bisti mes bon ku un di nan.

³⁰Si Dios ta bisti flor di mondi ku awe t'ei pero mañan ta bai tirá den fòrnu, bunita asina, kuantu mas lo E bisti boso, hende di poko fe.

³¹P'esei no preokupá i puntra: “Kiko nos ta kome? Kiko nos ta bebe? Kiko nos ta bisti?”

³²Pasobra ta e paganonan ta kore tras di tur e kosnan akí. Boso Tata den shelu sa ku boso tin mester di tur e kosnan akí.

³³Buska reino di Dios i buska pa hasi su boluntat promé i boso ta haña tur e sobrá kosnan akí aserka.

³⁴Pues, no preokupá pa e dia di mañan, pasobra e dia di mañan ta preokupá pa su mes problemanan. Kada dia tin sufisiente problema di su mes.