Read Papiamento Mateo 7 Bible Online

Mateo 7 - Papiamento bible

Mateo 7

¹No husga pa Dios no husga bo.

²Pasobra manera bo husga otro hende, Dios lo husga bo tambe i e mesun midí ku bo usa pa midi otro hende, Dios lo usa pa midi bo tambe.

³Di kon bo ta mira e splenter den wowo di bo ruman i e balki den bo mes wowo sí bo no ta ripará?

⁴Ku ki derechi bo ta bisa bo ruman: “Laga mi saka e splenter for di bo wowo”, anto ata bo mes ku asina un balki den bo wowo?

⁵Hipókrita, saka e balki for di bo mes wowo promé, anto e ora ei bo por mira bon pa saka e splenter for di wowo di bo ruman.

⁶No duna kachó loke ta sagrado, pa nan no bira sker boso. No tira boso pèrlanan pa porko, pa nan no trapa ku nan pata riba e pèrlanan plèchè nan.

⁷Pidi i boso lo risibí; buska i boso lo haña; bati i porta lo habri pa boso.

⁸Pasobra ken ku pidi, lo risibí; ken ku buska, lo haña; i ken ku bati, porta lo habri p'e.

⁹Òf por tin un di boso ku lo duna su yu piedra ora e yu pidi pan?

¹⁰Òf dun'é un kolebra ora e pidi piská?

¹¹Ke men, si asta boso ku ta mal hende sa di duna boso yunan kos bon, kuantu mas antó boso Tata den shelu lo no duna kos bon na esnan ku pidiÉ?

¹²Wèl, trata otro hende den tur kos meskos ku bo ke pa nan trata bo. Pasobra esaki ta nifikashon di loke lei i e profetanan ta siña.

¹³Drenta di e porta smal, pasobra e porta i e kaminda[14] ku ta guia na pèrdishon ta hanchu, i hopi ta esnan ku ta pasa di e kaminda ei.

¹⁴Ma e porta i e kaminda ku ta guia na bida ta smal i difísil, i poko ta esnan ku ta deskubrié.

¹⁵Tene kuidou ku profeta falsu; nan ta bini serka boso bistí na karné ma di paden nan ta lobo feros.

¹⁶Na nan fruta boso lo konosé nan. No por piki drùif for di mata di sumpiña òf figo for di kadushi, tòg?

¹⁷Un bon palu ta pari bon fruta i un mal palu ta pari mal fruta.

¹⁸Ta imposibel pa un bon palu pari mal fruta òf pa un mal palu pari bon fruta.

¹⁹Ta kap tur palu ku no pari bon fruta, tira den kandela.

²⁰Asina ta, na nan fruta boso lo konos'é nan.

²¹No ta tur hende ku bisa Mi: “Señor, Señor,” lo drenta reino di shelu, ma esun ku kumpli ku boluntat di mi Tata den shelu.

²²Dia di huisio, hopi lo bin bisa Mi: “Señor, Señor! N' ta den bo nòmber nos a profetisá, saka demoño i hasi hopi milager?”

²³Anto e ora ei lo Mi deklará públikamente na nan: “Nunka Mi no a konosé boso! Bai for di Mi, malechornan.”

²⁴P'esei ken ku tende e palabranan di Mi akí i kumpli ku nan ta manera e hòmber sabí ku a traha su kas riba baranka.

²⁵Áwaseru a kai, riu a subi tera i bientu a suta kontra e kas, ma e kas no a basha aden. Pasobra e tabata trahá riba baranka.

²⁶Ma ken ku skucha e palabranan di Mi akí i keda sin kumpli ku nan, ta manera e hòmber bobo ku a traha su kas den santu.

²⁷Áwaseru a kai, riu a subi tera, bientu a suta kontra di e kas. E kas a basha aden. Esta un kaida duru!’

²⁸Ora Hesus a kaba di papia e kosnan akí, e hendenan a keda babuká di tende kon e tabata siña nan.

²⁹Pasobra E tabata siña nan ku outoridat i no manera e dòktornan di lei.