Read Papiamento Marko 1 Bible Online

Marko 1 - Papiamento bible

Marko 1

¹Kuminsamentu di e bon notisia tokante Hesu-Kristu, e Yu di Dios.

²Ta skibí den buki di profeta Isaías ku Dios ta bisa: Ata, Mi ta manda mi mensahero Bo dilanti pa e drecha kaminda pa Bo.

³Un hende ta grita den desierto: ‘Prepará kaminda pa Señor. Hasi kaminda korkobá règt pa E pasa.’

⁴Asina Huan a kuminsá batisá hende den desierto i prediká ku nan mester kombertí i batisá pa Dios pordoná nan piká.

⁵For di henter region di Hudea i for di Herusalèm, tur hende tabata bini serka dje. Nan tabata konfesá nan piká i e tabata batisá nan den riu Yordan.

⁶Huan tabata bisti paña trahá di lana di kamel i e tabatin un faha di kueru mará na su sintura. E tabata kome dalakochi i miel di abeha di mondi.

⁷E tabata proklamá: ‘Despues di mi ta bini Esun ku ta muchu mas poderoso ku mi; mi no ta sirbi ni pa bùk kita su sandalia.

⁸Ami ta batisá boso ku awa ma É lo batisá boso ku Spiritu Santu.’

⁹A sosodé ku den e tempu ei Hesus a sali for di Nazarèt den region di Galilea pa laga Huan batis'É den riu Yordan.

¹⁰Nèt ora E tabata sali for di awa, Hesus a mira shelu sker habri i Spiritu Santu baha riba djE manera un palomba.

¹¹A zona un stèm for di shelu: ‘Abo ta mi Yu stimá, Bo ta legria di mi kurason.’

¹²Djis despues Spiritu Santu a pon'É bai den desierto.

¹³El a keda aya kuarenta dia largu i durante e tempu ei satanas tabata purba di lag'É kai den tentashon. El a biba meimei di bestia feros i angelnan tabata sirbiÉ.

¹⁴Despues ku nan a kohe Huan prezu, Hesus a bai Galilea i E tabata anunsiá e bon notisia di Dios.

¹⁵E tabata bisa: ‘E dia a yega: reino di Dios ta serka! Kombertí i kere e bon notisia akí.’

¹⁶Un bia Hesus tabata kana kantu di lago di Galilea i El a mira Simon i Andreas, dos ruman piskadó. Nan tabata tira reda den lago.

¹⁷Hesus a bisa nan: ‘Sigui Mi i lo Mi hasi boso piskadó di hende.’

¹⁸Nan no a pèrdè pa gana, mesora nan a laga nan reda para i siguiÉ.

¹⁹Hesus a sigui kana un poko mas leu i a mira Hakobo i Huan, dos yu di Zebedeo. Nan tabata sintá den boto ta prepará nan reda.

²⁰Asina Hesus a mira nan, El a yama nan pa nan siguiÉ. Hakobo i Huan a bai laga nan tata Zebedeo ku su trahadónan den e boto i sigui Hesus.

²¹Nan a drenta Kafárnao i asina ku sabat a yega, Hesus a bai snoa. Aya El a instruí e hendenan.

²²Nan a keda babuká di tende kon E tabata siña nan. Pasobra E tabata siña nan ku outoridat i no manera e dòktornan di lei.

²³Nèt e ora ei, tabatin den snoa un hòmber ku tabatin mal spiritu den dje. El a kuminsá grita:

²⁴‘Ta kiko Bo ke di nos, Hesus di Nazarèt? Akaso Bo a bini pa kaba ku nos? Mi sa bon bon ta ken Bo ta; Bo ta e Santu di Dios!’

²⁵E ora ei Hesus a skual e spiritu i El a orden'é: ‘Keda ketu i sali for di e hòmber ei!’

²⁶E spiritu a pone e hòmber kai djimpi, el a dal un gritu duru i sali for di e hòmber.

²⁷Tur hende a keda asina asombrá ku un tabata puntra otro: ‘Ta kiko esaki? Un siñansa nobo, ku outoridat; asta mal spiritu e hòmber akí ta ordená i nan ta obedes'É!’

²⁸No a dura muchu ku su fama a plama rònt region di Galilea.

²⁹Asina nan a sali for di snoa, nan[1] a bai kas di Simon i Andreas huntu ku Huan i Hakobo.

³⁰Suegra di Simon tabata drumí malu ku keintura; for di ora Hesus a yega nan a kont'É dje suegra.

³¹El a bai serka e suegra, kohe su man tene i yud'é lanta riba. Su keintura a kita i el a kuminsá sirbi nan.

³²Anochi, ora solo a kaba di baha, nan a trese tur hende malu i tur hende poseé serka Hesus.

³³Henter e pueblo a bin para dilanti di porta di e kas.

³⁴Hesus a kura hopi hende di tur sorto di malesa i El a saka hopi demoño. E no tabata pèrmití e demoñonan papia, pasobra nan tabata sa ta ken E ta.

³⁵Mardugá grandi, ora tabata skur ainda, Hesus a lanta i sali for di kas pa bai resa na un lugá solitario.

³⁶Simon i e otronan a bai busk'É.

³⁷Ora nan a hañ'É, nan a bis'É: ‘Tur hende ta buska Bo.’

³⁸El a kontestá nan: ‘Ban e otro pueblonan den bisindario pa Mi por prediká einan tambe. Ta pa e motibu ei Mi a bini.’

³⁹Asina Hesus a biaha rònt Galilea; E tabata prediká den snoa i saka demoño.

⁴⁰Un hòmber ku tabata sufri di lepra, a bini serka Hesus, hinka rudia su dilanti i rog'É: ‘Si Bo ke, Bo por kura mi.’

⁴¹Yen di kompashon, Hesus a saka su man mishi kuné i bisa: ‘Mi ke, sea kurá.’

⁴²Mesora e lepra a kita i e hòmber a kura.

⁴³Hesus a mand'é bai pero a atvertié severamente:

⁴⁴‘Mira pa bo no bai konta niun hende kiko a pasa, sino bai sí serka saserdote i lag'é wak bo. Ofresé pa bo purifikashon e sakrifisio ku Moises a ordená. E ora ei tur hende tin prueba ku segun lei bo ta kurá.’

⁴⁵E hòmber a bai i kuminsá konta tur hende loke a pasa; el a plama e historia tur kaminda. P'esei Hesus no por a drenta e siudatnan públikamente mas; E tabata keda pafó di e siudatnan na lugánan solitario. Ma for di tur skina hende tabata bini einan serka djE.