Read Papiamento Marko 16 Bible Online

Marko 16 - Papiamento bible

Marko 16

¹Despues di sabat Maria Magdalena, Maria, mama di Hakobo, i Salomé a bai kumpra zeta perfumá pa hunta Hesus su kurpa kuné.

²E promé dia di siman, mainta bon trempan, despues ku solo a sali, nan a bai su graf.

³E baranka di piedra tabata grandi; p'esei nan tabata puntra otro: ‘Ken lo lora e baranka di piedra kita for di boka di e graf pa nos?’ Ma ora nan a hisa kara wak, nan a mira ku e baranka di piedra tabata kitá kaba.

⁵Nan a drenta e graf i mira un mucha hòmber sintá na man drechi den e graf. E tabatin un paña largu koló blanku bistí. E muhénan a spanta nan morto.

⁶Ma e hóben a bisa nan: ‘No spanta! Boso ta buska Hesus di Nazarèt, Esun ku nan a krusifiká, ma E no t'aki. El a resusitá! Ata e lugá kaminda nan a pon'É.

⁷Bai bisa su disipelnan i Pedro tambe: E ta bai Galilea boso dilanti; einan boso lo mir'É, manera E mes a bisa boso!’

⁸E muhénan a hui bai for di e graf; nan tabata tembla i tabata tur aríbabou. Nan no a konta niun hende nada, pasobra nan tabatin miedu.

⁹Despues di a resusitá mainta trempan, e promé dia di siman, Hesus a aparesé promé na Maria Magdalena, for di ken El a yega di saka shete demoño.[30]

¹⁰Maria a bai konta esnan ku a anda ku Hesus i ku awor tabata yora di tristesa.

¹¹Ora nan a tende ku E tabata bibu i ku Maria a mir'É, nan no ker a kere.

¹²Despues Hesus a aparesé den otro forma na dos disipel ku tabata bai kunuku na pia.

¹³Nan a regresá pa konta e otro disipelnan loke a pasa, ma e otronan no a kere nan tampoko.

¹⁴Mas despues, ora e diesun disipelnan tabata sintá ta kome, Hesus a aparesé na nan. El a skual nan pa nan falta di fe i pasobra nan tabata tèrko; nan a keda sin kere esnan ku a mira ku Hesus a resusitá.

¹⁵Hesus a bisa nan: ‘Pasa rònt mundu i prediká e bon notisia na henter humanidat.

¹⁶Esun ku kere i batisá, lo ta salbá, ma esun ku no kere, lo ta kondená!

¹⁷E señalnan akí lo kompañá e kreyentenan: nan lo saka demoño den mi nòmber i nan lo papia den lenganan straño;

¹⁸nan lo no sufri ningun daño, ni maske nan kohe kolebra ku man òf bebe venenu mortal; nan lo pone man riba enfermo i e enfermonan lo bira bon atrobe.’

¹⁹A tuma Hesus den shelu despues ku El a kaba di papia ku nan i El a bai sinta na man drechi di Dios.

²⁰E disipelnan a sali bai prediká tur kaminda. Señor tabata yuda nan; ku señalnan milagroso E tabata konfirmá e palabra ku nan tabata prediká.