Read Papiamento Marko 2 Bible Online

Marko 2 - Papiamento bible

Marko 2

¹Despues di un par di dia Hesus a regresá Kafárnao i notisia a plama ku E tabata na kas.

²A bini asina hopi hende huntu ku no tabatin mas lugá, ni sikiera na entrada di e kas. E tabata prediká e bon notisia na e hendenan akí.

³Algun hende a bini ku un hòmber lam, ku kuater hòmber tabata karga den un dragbar, serka Hesus.

⁴Komo tabatin muchu hende, nan no por a hib'é te serka Hesus. P'esei nan a habri e dak, traha un buraku kaminda Hesus tabata i laga e dragbar ku e hòmber lam drumí aden, baha.

⁵Ora Hesus a mira nan fe den djE, El a bisa e hòmber lam: ‘Mi yu, bo pikánan ta pordoná.’

⁶Algun dòktor di lei ku tabata einan, a pensa den nan mes:

⁷‘Kon e hòmber akí ta tribi papia asina? Ta blasfemia! No ta Dios so tin poder pa pordoná piká?’

⁸Mesora Hesus a ripará kiko nan tabata pensa. El a bisa nan: ‘Pakiko boso ta pensa asina?

⁹Kiko ta mas fásil? Bisa e hòmber lam akí: Bo pikánan ta pordoná, òf bis'é: Lanta para, kohe bo dragbar i kana bai?

¹⁰Mi ta bai laga boso mira ku e Yu di hende tin outoridat pa pordoná piká riba mundu.’ E ora ei El a bisa e hòmber lam:

¹¹‘Ami ta bisa bo: Lanta para, kohe bo dragbar i bai kas.’

¹²E hòmber lam a lanta para, kohe su dragbar lihé lihé i segun e tabata kana sali, tur hende por a mir'é; nan tur a keda babuká; nan a glorifiká Dios bisando: ‘Nunka nos no a mira algu asina!’

¹³Hesus a bolbe bai kantu di lago. Tur hende tabata bini serka djE i E tabata siña nan.

¹⁴Ora Hesus tabata pasa banda di e lugá di kobra belasting, El a mira Levi, yu di Alfeo, sintá einan. El a bis'é: ‘Sigui Mi.’ Levi a lanta i sigui Hesus.

¹⁵Un dia Hesus a bai kome na kas di Levi. Hopi kobradó di belasting i otro hende ku no tabata kumpli ku lei a sinta kome huntu kunÉ i su disipelnan. Nan hopi tabata siguiÉ.

¹⁶Ora e dòktornan di lei di e grupo di fariseo[2] a mir'É ta kome[3] huntu ku hende ku no ta kumpli ku lei i ku kobradó di belasting, nan a puntra su disipelnan: ‘Pakiko e ta sinta kome huntu ku e tipo di hendenan akí?’

¹⁷Hesus a tende nan i El a kontestá: ‘Hende bon di salú no mester di dòkter, hende malu sí. Mi no a bini pa yama hende hustu sino pa yama pekadó.’

¹⁸Na sierto okashon e disipelnan di Huan i esnan di e fariseonan tabata yuna. Algun hende a bin puntra Hesus: ‘Pakiko disipel di Huan i disipel di e fariseonan ta yuna i bo disipelnan nò?’

¹⁹Hesus a rospondé: ‘Akaso amigu di brùidehòm sa yuna ora e ta huntu ku nan ainda? Miéntras e brùidehòm ta serka nan, nan no por yuna.

²⁰Pero ta yega un dia ku lo kita e brùidehòm for di nan, anto e ora ei nan lo yuna.

²¹No sa usa paña nobo ku no a krem ainda, pa lapi bistí bieu. Pasobra e lapi di paña nobo lo sker e bistí bieu kibra i hasi e buraku mas grandi.

²²Tampoko no sa basha biña nobo den saku di biña bieu. Pasobra e biña nobo lo sker e sakunan habri i e ora ei tantu e biña komo e sakunan[4] lo bai pèrdí. Mester basha biña nobo den saku nobo.’

²³Un dia di sabat Hesus tabata kana den e kunukunan di trigo i na kaminda su disipelnan a kuminsá piki tapushi di trigo.

²⁴E fariseonan a bis'É: ‘Ata, wak nan! Riba dia di sabat no ta pèrmití loke bo disipelnan ta hasiendo.’

²⁵El a kontestá nan: ‘Nunka boso no a lesa kiko David a hasi ora e ku su kompañeronan tabata den nesesidat i tabatin hamber?

²⁶Den tempu di gransaserdote Abyatar, el a drenta kas di Señor i kome e pan konsagrá ku saserdote so mag kome. Tambe el a duna su kompañeronan di e pan ei.’

²⁷Hesus a sigui bisa nan: ‘A traha sabat pa hende i no hende pa sabat.

²⁸Ke men, Yu di hende tin outoridat riba sabat tambe.’