Read Papiamento Marko 4 Bible Online

Marko 4 - Papiamento bible

Marko 4

¹Hesus a bolbe bai siña e hendenan kantu di lago. Komo un grupo grandi di hende a bini huntu pa tende su siñansa, El a drenta un boto ku tabata drif riba awa i a kai sinta. Henter e multitut tabata pará na kantu.

²Asina E tabata siña nan hopi kos pa medio di parábola i durante e siñansa El a bisa nan:

³‘Tende, un sembradó a sali bai sembra.

⁴Ora e tabata sembra, un parti di e simia a kai riba kaminda. Para a pasa kome nan.

⁵Un otro parti a kai meimei di piedra, kaminda no tin muchu tera. E simia a sali umbe pasobra einan e tera no tabata hundu.

⁶Ora solo a sali, el a kima e mata i e mata, ku no tabatin bon rais, a seka.

⁷Un otro parti di e simia a kai meimei di sumpiña. Ora e sumpiñanan a krese, nan a stek e mata ku a spreit i esaki no a duna fruta.

⁸Ma un otro parti di e simia a kai den bon tera. Nan a spreit, krese i duna fruta. Algun a duna trinta be, otro sesenta be i algun otro a duna shen be mas tantu fruta ku loke a sembra.’

⁹Hesus a terminá bisando: ‘Esun ku tin orea, tende!’

¹⁰Ora Hesus tabata E so huntu ku e diesdos disipelnan i su otro siguidónan, nan a puntr'É pakiko E ta usa parábola.

¹¹El a kontestá nan: ‘Boso sí a haña komprondementu di e sekreto di reino di Dios, ma e otronan ta haña tur kos den parábola.

¹²Pa asina maske nan wak bon, nan no mira nada; i maske nan skucha bon, nan no komprondé nada. Ya nan no ta kambia nan bida i haña pordon.’

¹³El a bisa nan: ‘Si boso no ta komprondé e parábola akí, kon antó boso ta hasi komprondé tur otro parábola?

¹⁴E sembradó ta sembra palabra di Dios.

¹⁵E simia ku a kai riba kaminda, ta e hendenan ku ta tende e palabra di Dios, ma mesora satanas ta kore bin kita e palabra for di den nan kurason.

¹⁶E parti ku a kai meimei di piedra ta esnan ku kontentu ta risibí e palabra ora nan tend'é.

¹⁷Ma djis pa un sierto tempu; nan no ta saka bon rais. Ora ku pa motibu di e palabra nan haña nan ku persekushon i tribulashon, nan ta stòp di kere mesora.

¹⁸Otro hende ta manera e simia ku a kai meimei di sumpiña. Nan ta tende e palabra,

¹⁹ma e kosnan di mundu ta preokupá nan hopi, rikesa ta blèndu nan i nan tin muchu gana di kos. Tur e kosnan akí ta stek e palabra. Ta p'esei nan no ta karga fruta.

²⁰Pero tambe tin hende ku sí ta manera e simia ku a kai den bon tera; nan ta skucha e palabra i asept'é. Algun di nan ta duna trinta be mas tantu fruta, algun sesenta be mas tantu i algun di nan shen be mas tantu.’

²¹Hesus a sigui bisa nan: ‘Ken ta bai kohe un lampi bini kuné paden pa e pon'é bou di un hèmber òf bou di kama? No ta riba un standart sa pone lampi?

²²No ta skonde nada, sino ta pa e sali na kla, tampoko no ta tene nada sekreto ku no ta pa e sali den publisidat.

²³Esun ku tin orea, tende!’

²⁴Hesus a bisa nan: ‘Paga bon tinu na loke boso ta tende. Ku e mesun midí ku boso tende, Dios ta duna boso komprondementu. Sí, asta mas lo E duna boso.

²⁵Ke men esun ku tin kaba, lo haña mas tantu ainda i esun ku no tin, asta e tiki ku e tin lo kita for di dje.’

²⁶Tambe Hesus a bisa nan: ‘Bo por kompará reino di Dios ku un hòmber ku a sembra simia den su kunuku.

²⁷E hòmber ta drumi i lanta tur dia; e simia ta spreit, e mata ta krese i bona sin e hòmber sa ta kon esei a bai.

²⁸Sin ningun hende hasi nada tera ta duna fruta. Promé e blachinan manera yerba ta sali, despues e tapushi ta forma i yena i porfin bo ta haña trigo.

²⁹Manera e trigo hecha, e hòmber ta bai kòrt'é, pasobra tempu di kosecha a yega.’

³⁰Hesus a sigui bisa nan: ‘Kiko reino di Dios parse? Ku kiko lo Mi kompar'é?

³¹E ta manera un simia di mòster. Ora plant'é, ta e simia di mas chikí na mundu.

³²Despues e ta sali krese bira un di e matanan di mas grandi ku tin. E ta haña taki largu di moda ku para por traha nèshi den e takinan i biba den su sombra.’

³³Ku hopi sorto di komparashon manera esun akí, Hesus tabata prediká e palabra na e hendenan segun nan por a komprondé.

³⁴E no tabata keda sin usa komparashon ora E tabata prediká pa nan, ma ora E tabata E so ku e disipelnan, E tabata splika nan tur kos.

³⁵Anochi, riba e mesun dia ei, Hesus a bisa su disipelnan pa krusa bai na e otro banda di e lago.

³⁶Nan a bandoná e multitut i bai huntu ku Hesus ku ya tabata sintá den boto. Tabatin mas boto ku a kompañá nan.

³⁷A lanta un bientu fuerte; ola tabata bati den e boto di manera ku el a kuminsá yena ku awa.

³⁸Hesus tabata drumí na soño parti patras den e boto, ku su kabes riba un kusinchi. Nan a lant'É fo'i soño i bis'É: ‘Maestro, no ta importá Bo ku nos ta bai senk i muri?’

³⁹Hesus a spièrta papia severamente ku bientu. El a ordená laman: ‘Kalma; keda ketu!’ Bientu a obedes'É. A reina un silensio profundo.

⁴⁰El a bisa nan: ‘Pakiko boso tin tantu miedu asina? Ainda boso no tin fe?’

⁴¹E disipelnan a sinti hopi miedu i un a bisa otro: ‘Ta ken e hòmber akí ta? Asta bientu i laman ta tende di djE!’