Read Papiamento Marko 6 Bible Online

Marko 6 - Papiamento bible

Marko 6

¹Hesus a bai su mes pueblo bèk. Su disipelnan a kompañ'É.

²Ora a bira sabat, El a bai duna siñansa den snoa i hopi di e hendenan ku tabata skuch'É, a puntra asombrá: ‘Di unda el a sali ku tur e kosnan akí? Ki mishié ku tantu sabiduria asina i ku poder pa hasi milager?

³No ta Hesus, e karpinté, yu di Maria i ruman hòmber di Hakobo, Yoses,[11] Hudas i Simon esei? No ta serka nos aki su ruman muhénan tambe ta biba?’ Nan a sinti nan mes ofendí pa su motibu.

⁴El a deklará: ‘Ta honra un profeta tur kaminda, ménos den su mes stat, serka su mes hendenan i den su mes kas.’

⁵P'esei Hesus no por a hasi niun milager einan; riba un par di hende malu so El a pone man i kura nan.

⁶Nan falta di fe a strañ'É. Hesus a hasi un rekorido serka e pueblonan den bisindario i tabata siña e hendenan.

⁷El a yama e diesdos disipelnan i kuminsá manda nan bai dos dos, ku poder pa saka demoño for di hende.

⁸El a ordená nan: ‘Mira pa boso no biaha ni ku pan ni ku saku di biahe ni ku plaka; bai ku un garoti so.

⁹Bisti sandalia na boso pia, ma no bisti dos paña riba otro.’

¹⁰Hesus a sigui bisa: ‘Unabes boso drenta un kas, keda einan te ora boso bai for di e lugá ei.

¹¹Si boso bai un kaminda i nan rechasá boso einan i no ke tende di boso, sakudí boso pia kita stòf pa atvertí e hendenan di e lugá ei.’

¹²E disipelnan a sali bai prediká pa e hendenan kombertí.

¹³Nan a saka hopi demoño for di e hendenan i nan a hunta hopi hende malu ku zeta i kura nan.

¹⁴Komo Hesus su fama a plama tur kaminda, rei Heródes a bin tende di djE. Tin hende tabata bisa: ‘Huan Boutista a lanta for di morto, ta p'esei e tin poder pa hasi milager!’

¹⁵Otro tabata bisa: ‘Ta profeta Elías esei!’, mientrastantu tabatin un otro grupo ku tabata pensa ku Hesus tabata un profeta manera e profetanan di antaño.

¹⁶Ora Heródes a tende di djE, el a bisa: ‘Ta e Huan ku mi mes a laga kap su kabes kita afó, a lanta bèk!’

¹⁷A sosodé ku Heródes mes a manda kohe Huan prezu pa motibu di Heródias, señora di su ruman hòmber Filipo; t'asina ku Heródes mes a kasa ku Heródias.

¹⁸Huan tabata bisa Heródes kada be: ‘No ta pèrmití biba ku kasá di bo mes ruman.’

¹⁹P'esei Heródias a haña rabia riba Huan; e tabata deseá di laga mat'é, ma e no tabata por,

²⁰pasobra Heródes tabatin rèspèt di Huan. Komo e tabata haña Huan un hòmber santu i hustu, e tabata proteg'é. E tabata gusta tende Huan papia, ounke ku kada be ku e tend'é, e tabata bira hopi inkieto.

²¹Riba un dia Heródias a haña su chèns. Dia Heródes a hasi aña el a tene un komementu pa su dignatario, ofisial altu i e hendenan importante di Galilea.

²²E yu muhé di Heródias[12] a drenta presentá un baile ku a deleitá Heródes i su invitadonan. E ora ei Heródes a bisa e hobensita: ‘Lo mi duna bo kiko ku bo pidi mi.’

²³Ku mashá huramentu Heródes a sigui insistí: ‘Tur loke bo pidi mi, asta si ta mitar di mi reino mes bo ke, lo mi duna bo.’

²⁴E hobensita a sali bai puntra su mama kiko asina lo e por a pidi Heródes. E mama a kontestá: ‘Bis'é bo ke kabes di Huan Boutista.’

²⁵E mucha no a pèrdè pa gana, purá el a bai bisa rei: ‘Mi ke pa awor akí mes bo duna mi kabes di Huan Boutista riba un skalchi.’

²⁶Heródes a bira tristu, ma e ker a kumpli ku su palabra pasobra el a hura dilanti di su invitadonan.

²⁷Inmediatamente rei a manda un burdugu prizòn pa trese kabes di Huan Boutista. Despues ku e burdugu a kap kabes di Huan kita afó,

²⁸el a trese e kabes riba un skalchi i a pas'é pa e hobensita ku na su turno a duna e mama e.

²⁹Ora e disipelnan di Huan a haña sa kiko a pasa, nan a bai kohe su kadaver i der'é.

³⁰E apòstelnan a regresá serka Hesus i a kont'É tur loke nan a hasi i loke nan a siña e hendenan.

³¹Komo tabatin hopi hende ta kana bai bini, Hesus ku su disipelnan ni sikiera a haña chèns pa kome. P'esei Hesus a bisa e disipelnan: ‘Ban un lugá solitario kaminda nos so por sosegá un poko.’

³²I nan so a sali ku boto pa un lugá solitario.

³³Pero hopi hende a mira nan nabegá i a komprondé na unda nan tabata bai. For di tur siudat e hendenan a sali kore bai e lugá solitario i nan a yega promé ku Hesus ku su disipelnan mes.

³⁴Ora Hesus a sali for di e boto, El a mira un multitut grandi i a haña duele di nan, pasobra nan tabata manera karné sin wardadó. El a kuminsá siña nan mashá hopi kos.

³⁵Ora ku a bira hopi lat kaba, e disipelnan a bin bisa Hesus: ‘E lugá akí ta solitario i ta lat kaba.

³⁶Manda e hendenan bai e pueblo i lugánan aki banda bai kumpra kuminda pa nan kome.’

³⁷Hesus a bisa nan: ‘Boso mes duna nan di kome.’ E disipelnan a kontestá: ‘Kiko? Bai kumpra 200 moneda di plata[13] na pan pa e hendenan akí kome?’

³⁸‘Bai wak kuantu pan boso tin,’ Hesus a sigui bisa. Ora nan a haña sa, nan a bin bis'É: ‘Sinku pan i dos piská.’

³⁹Hesus a manda e disipelnan pone e hendenan sinta den grupo riba e yerba bèrdè.

⁴⁰E multitut a kai sinta den grupo di sinkuenta i di shen hende.

⁴¹E ora ei Hesus a kohe e sinku pannan i e dos piskánan; El a hisa su kara na shelu i gradisí Dios. Despues El a kibra e pannan i duna su disipelnan pa nan parti ku e hendenan. Tambe El a parti e piskánan ku tur hende.

⁴²Tur hende a kome yena barika.

⁴³E disipelnan a yena diesdos makutu yen yen ku loke a sobra na pan i piská.

⁴⁴Un kantidat di sinku mil hòmber a kome di e pan.

⁴⁵Djis despues Hesus a manda su disipelnan drenta boto, krusa lago bai Betsaida promé kunÉ. E mes a keda pa manda e multitut bai kas.

⁴⁶Despues ku El a yama e hendenan ayó, El a bai resa den seru.

⁴⁷Ya tabata anochi kaba ora ku e boto a yega meimei di lago. Hesus ku a keda E so na kantu,

⁴⁸a mira ku e disipelnan tabata bringa duru pa rema, pasobra bientu tabata kontrali. Durante e di kuater warda,[14] Hesus a kana riba awa yega serka nan; E ker a pasa bai.

⁴⁹Ora nan a mira Hesus ta kana riba awa, nan a pensa ku ta un spiritu i nan a kuminsá grita.

⁵⁰Nan tur a bira aríbabou ora nan a mir'É. Mesora Hesus a kuminsá papia ku nan i bisa: ‘Keda trankil, t'Ami, no tene miedu!’

⁵¹El a drenta e boto i bientu a kalma. Nan a keda tur babuká,

⁵²pasobra nan no a komprondé e milager di e pannan. Al kontrario, spiritualmente nan tabata siegu.

⁵³Hesus i su disipelnan a krusa e lago. Nan a subi tera na region di Genesarèt; ei nan a mara nan boto na kantu.

⁵⁴Asina nan a baha for di e boto, e hendenan a rekonosé Hesus.

⁵⁵Purá nan a pasa tur kaminda den bisindario pa kohe hende malu i hiba nan, drumí den hamaka, serka Hesus. Nan tabata hiba hende malu, kaminda ku nan tende ku Hesus tabata bai.

⁵⁶Unda ku Hesus bai, sea ku ta stat, pueblo òf kunuku, nan tabata trese nan hende malunan, pone nan riba plenchi i rog'É pa nan por a djis mishi ku un punta di su paña. Tur esnan ku a mishi kunÉ tabata kura.