Read Papiamento Marko 7 Bible Online

Marko 7 - Papiamento bible

Marko 7

¹Algun fariseo i dòktor di lei ku a sali for di Herusalèm a bini huntu serka Hesus.

²Nan a ripará ku algun di su disipelnan tabata kome pan ku man impuru, esta sin laba man promé.

³Ta asina ku ni e fariseo ni e otro hudiunan no tabata kome sin laba man na un manera adekuá promé; nan tabata atené nan na tradishon di nan antepasadonan.

⁴Ora sali marshe, nan no tabata kome sin baña promé i asina tin hopi otro kos mas ku nan tabata atené nan n'e pa motibu di tradishon, manera: labamentu di kòpi, kanika, wea di koper, i labamentu di nan kama di habri abou.[15]

⁵E fariseo i dòktornan di lei a puntra Hesus: ‘Pakiko bo disipelnan no ta tene nan na tradishon di nos antepasadonan? Nan ta kome pan ku man impuru.’

⁶El a kontestá: ‘Hipókritanan, profeta Isaías a deskribí boso bon bon ora el a bisa, manera ta skibí: E pueblo akí, Dios ta bisa, ta alabá Mi ku nan boka so, ma den nan kurason nan ta leu fo'i Mi.

⁷Nan adorashon no ta sirbi pa nada; nan doktrina no ta nada mas ku tradishon di hende.

⁸Boso ta rechasá lei di Dios i ta atené na tradishon di hende.’[16]

⁹El a sigui bisa: ‘Boso ta bon den rebahá lei di Dios pa mantené boso mes tradishonnan.

¹⁰Moises a bisa: “Honra bo mama i bo tata” i tambe: “Es ku maldishoná su mama i su tata ta haña kastigu di morto.”

¹¹Ma boso ta bisa: Si un hende bisa su mama i tata ku algu ku lo e por a yuda nan kuné ta “korban”, esta e kos ei ta un ofrenda dediká na Dios,

¹²e ora ei e no mag yuda su mama òf tata mas.

¹³Boso ta kita tur outoridat for di palabra di Dios pa medio di boso tradishonnan ku boso mes ta keda pasa di generashon pa generashon. Asina boso tin hopi di e kosnan akí mas ta hasi.’

¹⁴Hesus a bolbe yama e hendenan huntu i bisa nan: ‘Boso tur skucha Mi i komprondé Mi.

¹⁵Nada ku drenta kurpa di un hende no por hasié impuru, ma loke ta hasié impuru ta loke ta sali for di dje.’ [

¹⁶Esun ku tin orea, tende!]

¹⁷Despues ku Hesus a laga e multitut i drenta kas, su disipelnan a bin puntr'É ta kiko e komparashon ku El a hasi, ta nifiká.

¹⁸El a kontestá: ‘Asina tiki komprondementu boso tambe tin? Boso no ta komprondé ku nada ku drenta kurpa di hende no por hasié impuru?

¹⁹Pasobra loke drenta no ta bai den su kurason ma den su barika i despues e ta sali bèk.’ Di e manera akí Hesus a deklará ku tur kuminda ta puru.

²⁰Hesus a sigui bisa: ‘Ta loke ta sali for di un hende ta hasié impuru.

²¹Ta for di paden, for di kurason di hende ta sali: pensamentu malu, inmoralidat, ladronisia, matamentu,

²²kibramentu di fidelidat di matrimonio, avarisia, malisia, engaño, un bida parotin, envidia, papia riba hende, orguyo, i falta di sabiduria.

²³Tur e kos malunan akí ta sali for di paden di un hende i ta nan ta hasié impuru.’

²⁴For di einan Hesus a kohe kaminda pa region di Tiro.[17] Aya El a bai keda na un kas i E no tabata ke pa ningun hende sa unda E ta. Ma E no por a keda skondí.

²⁵Asina un señora ku tabatin un yu muhé poseé pa mal spiritu, a tende di Hesus, el a bai serka djE i a tira su kurpa abou na suela su dilanti.

²⁶E señora, un pagano nasé na Fenisia den pais Siria, a pidi Hesus pa saka e mal spiritu for di su yu muhé.

²⁷Hesus a kontest'é: ‘No ta bon pa tira pan di e muchanan pa kachó, promé ku e muchanan kome yena nan barika.’

²⁸E señora a rospondé: ‘Señor,[18] e kachónan bou di mesa tambe ta kome wiriwiri ku e muchanan laga kai!’

²⁹Hesus a bis'é: ‘Bo a duna un bon kontesta! Bai kas numa, e demoño a sali for di bo yu kaba.’

³⁰E señora a bai kas i a haña su yu drumí riba kama. E demoño a sali for di e yu.

³¹Hesus a bolbe bai for di region di Tiro; via siudat Sidon El a bolbe bai lago di Galilea, meimei di region di Dekápolis.

³²Nan a trese un hòmber surdu ku no por a papia bon serka djE i rog'É pa E pone man riba e hòmber.

³³Hesus a hala e hòmber na un distansia for di e multitut, hinka dede den e hòmber su orea i mishi ku skupi na e hòmber su lenga.

³⁴Despues Hesus a hisa kara na shelu, hala un rosea profundo i bis'é: ‘Éfata!’, loke ta nifiká: habri!

³⁵Mesora e hòmber su orea a habri; su lenga a lòs i e por a papia sin problema.

³⁶Hesus a ordená e hendenan pa no bisa niun hende nada, pero mas Hesus tabata taha nan, mas nan tabata konta loke a pasa.

³⁷Nan a keda tur asombrá i tabata grita: ‘Ta kos bon so e ta hasi! Surdu e ta laga tende i muda e ta laga papia!’