Read Papiamento Marko 9 Bible Online

Marko 9 - Papiamento bible

Marko 9

¹Hesus a bisa nan: ‘Mi ta sigurá boso: tin di boso aki ku lo no muri promé nan mira ku reino di Dios a yega ku poder.’

²Seis dia despues Hesus a kohe Pedro, Hakobo i Huan i hiba nan riba un seru altu kaminda nan tabata nan so. Ei, nan dilanti, El a kambia di aparensia.

³Su paña a kambia bira un blanku mashá briante; niun hende na mundu no por blikia un paña hasié dje blanku ei.

⁴Tambe nan a mira Elías i Moises ku tabata papia ku Hesus.

⁵Pedro a bisa Hesus: ‘Maestro, ta bon ku nos t'aki! Laga nos traha tres tènt: un pa Bo, un pa Moises i un pa Elías.’

⁶E disipelnan tabata asina spantá, ku Pedro no tabata sa kiko e tabata papia.

⁷E ora ei un nubia a bin para riba nan. Nan a tende un stèm for di den e nubia bisa: ‘Esaki ta mi Yu stimá: skuch'É.’

⁸Ora e disipelnan a drei wak rònt, diripiente nan no a mira niun hende mas; ta Hesus so tabat'ei serka nan.

⁹Ora nan tabata baha for di e seru, Hesus a ordená pa no konta niun hende nada di loke nan a mira, te dia e Yu di hende lanta for di morto.

¹⁰Nan a keda kòrda Hesus su palabranan i a keda diskutí ku otro kiko ke men ‘lanta for di morto’.

¹¹Nan a puntra Hesus: ‘Di kon e dòktornan di lei ta bisa ku Elías mester bini promé?’

¹²Hesus a kontestá: ‘Enberdat Elías ta bin restourá tur kos promé. Ma ta di kon ta skibí anto ku e Yu di hende lo sufri hopi i ku nan lo maltrat'É?

¹³Pero Ami ta bisa boso: Elías a bini kaba i nan a hasi kuné tur kos ku nan a haña ta bon, manera ta skibí di dje.’

¹⁴Ora nan a bai serka e otro disipelnan, nan[20] a mira un bòshi di hende pará rònt di nan. Algun dòktor di lei tabata diskutí ku e disipelnan.

¹⁵Asina e hendenan a mira Hesus, nan a keda mashá asombrá i kore bai serka djE pa kumind'É.

¹⁶Hesus a puntra su disipelnan: ‘Ta kiko boso ta diskutí ku nan?’

¹⁷Un hòmber for di den e multitut a kontestá: ‘Maestro, mi a trese mi yu hòmber pa Bo. Ta asina ku e ta poseé pa un spiritu ku a hasié muda.

¹⁸Kada be ku e spiritu atak'é, e ta lag'é kai djimpi; e mucha ta skuma, morde djente i bira steif. Awor mi a pidi bo disipelnan pa saka e spiritu, ma nan no tabata por.’

¹⁹E ora ei Hesus a bisa: ‘Esta un generashon sin fe! Ta kuantu tempu mas Mi tin ku keda huntu ku boso? Pa kuantu tempu mas Mi tin ku sigui soportá boso? Trese e mucha pa Mi!’

²⁰Nan a bai ku e mucha serka djE. Asina e mal spiritu a mira Hesus, el a pone e mucha kai djimpi. E mucha a kai abou na suela, keda skuma lora bai bini.

²¹Hesus a puntra e tata: ‘Kuantu tempu e tin ta hasi asin'akí?’ ‘Fo'i chikí,’ e tata a kontestá.

²²‘Hopi bia e spiritu a yega di tir'é den kandela i den awa p'e kaba kuné. Si Bo por, tene mizerikòrdia i yuda nos!’

²³Hesus a kontest'é: ‘Kon bo ke men “si Bo por”? Pa esun ku ta kere nada no ta imposibel.’

²⁴Hesus no a kaba di papia, ku e tata a grita: ‘Mi ta kere, yuda mi ku mi falta di fe!’

²⁵Ora Hesus a nota ku e hendenan tabata basha bini riba nan, El a skual e spiritu seriamente: ‘Spiritu ku ta hasi hende muda i surdu, Ami ta ordená bo: Sali for di e mucha hòmber akí i no drent'é nunka mas.’

²⁶Ku gritamentu i despues di a pone e mucha kai djimpi pisá, e spiritu a bin sali. E mucha a keda manera morto, p'esei hopi hende a bisa: ‘Ata..., el a muri!’

²⁷Ma Hesus a kohe su man lant'é i e mucha a lanta para.

²⁸Ora Hesus a yega kas i tabata so ku su disipelnan, nan a puntr'É ta kon bini nan no por a saka e spiritu for di e mucha hòmber.

²⁹Hesus a kontestá nan: ‘Ta solamente ku orashon[21] por saka e sorto di spiritu akí for di hende.’

³⁰Hesus i su disipelnan a bai for di einan i pasa dor di Galilea. Hesus no tabata ke pa niun hende sa unda E tabata,

³¹pasobra E tabata siña su disipelnan. El a bisa nan: ‘E Yu di hende lo keda entregá den man di hende i nan lo mat'É, ma riba e di tres dia di su morto lo E lanta.’

³²Ma su disipelnan no a komprondé e siñansa i nan tabatin miedu di puntr'É algu.

³³Nan a drenta Kafárnao i ora nan tabata na kas, Hesus a puntra su disipelnan: ‘Kiko boso tabata diskutí na kaminda?’

³⁴Nan a keda ketu, pasobra nan tabata diskutí ta kua di nan tabata esun di mas importante.

³⁵Hesus a kai sinta, yama e diesdos disipelnan i bisa nan: ‘Esun ku ke ta di promé, mester pone su mes te delaster i sirbi tur e otronan.’

³⁶El a kohe un mucha chikí pone meimei di nan, bras'é i bisa:

³⁷‘Esun ku risibí un chikitu asin'akí den mi nòmber, ta risibí Mi mes. Esun ku risibí Mi, no ta risibí Ami, ma Esun ku a manda Mi.’

³⁸Huan a bisa Hesus: ‘Maestro, nos a mira un hende ta saka demoño den bo nòmber; nos a purba stòp e pasobra e no ta pertenesé na nos grupo ku ta sigui Bo.’

³⁹Hesus a kontestá: ‘No stòp e. Niun hende no por hasi milager den mi nòmber i papia malu di Mi djis despues.

⁴⁰Esun ku no ta kontra nos ta na nos fabor!

⁴¹Ken ku duna boso un glas di awa pa bebe, pasobra boso ta pertenesé na Kristu, lo no keda sin haña su rekompensa.

⁴²Esun ku pone un di e chikitunan akí ku ta konfia den Mi kai den piká, lo ta mihó p'e, si mara un piedra di mulina rònt di su garganta i tir'é den laman.

⁴³Si ta bo man ta pone bo kai den piká, kap e kita afó; mihó drenta bida eterno mankaron, ku bai tirá den fièrnu ku dos man, den e kandela ku no ta paga nunka. [

⁴⁴Einan e bichinan ku ta kome kurpa di hende, no ta muri i e kandela no ta paga nunka.]

⁴⁵Si ta bo pia ta pone bo kai den piká, kap e kita afó; mihó bo drenta bida eterno koho, ku bai tirá den fièrnu ku dos pia. [

⁴⁶Einan e bichinan ku ta kome kurpa di hende, no ta muri i e kandela no ta paga nunka.]

⁴⁷Si bo wowo ta pone bo kai den piká, rank'é saka afó; mihó bo drenta reino di Dios ku un wowo so, ku bai tirá den fièrnu ku dos wowo.

⁴⁸Einan e bichinan ku ta kome kurpa di hende, no ta muri i e kandela no ta paga nunka.

⁴⁹Tur hende mester pasa dor di kandela pa asina keda salgá.

⁵⁰Salu ta un kos bon, ma si e pèrdè su stansha[22] ta kiko lo por dun'é su smak atrobe? Wak pa boso ta salgá i biba na pas ku otro.’