Read Papiamento Lukas 11 Bible Online

Lukas 11 - Papiamento bible

Lukas 11

¹Un bia Hesus tabata resa na un sierto lugá. Ora El a kaba di resa, un di su disipelnan a bis'É: ‘Señor, siña nos resa, manera Huan a siña su disipelnan.’

²Hesus a bisa nan: ‘Ora boso ta resa, bisa: Tata,[19] bo nòmber sea santifiká; laga bo reino bini.

³Tur dia, duna nos nos pan di kada dia

⁴i pordoná nos nos pikánan, pasobra nos ta pordoná tur hende ku a falta ku nos; i no laga nos kai den tentashon.’

⁵Hesus a sigui bisa nan: ‘Suponé ku un di boso bai kas di un amigu, meimei di anochi, i bis'é: “Mi amigu, fia mi tres pan.

⁶Un amigu di mi a kaba di yega serka mi, for di un biahe, anto mi no tin nada pa ofres'é.”

⁷Awor suponé ku e otro amigu kontestá: “No molestiá mi. Porta ta será na yabi kaba. Ya mi a bai drumi kaba i mi yunan tambe ta drumí riba kama huntu ku mi. Mi no por lanta pa duna bo nada.”

⁸Mi ta bisa boso: E ta lanta duna e otro loke e mester, no pasobra e ta su amigu, sino pasobra e otro tabata asina frepòstu di insistí.

⁹Tambe Mi ta bisa boso: Pidi i boso lo risibí; buska i boso lo haña; bati i porta lo habri pa boso.

¹⁰Pasobra ken ku pidi, lo risibí; ken ku buska, lo haña; i ken ku bati, porta lo habri p'e.

¹¹Òf por tin un di boso ku ta tata, ku lo duna su yu kolebra[20] ora e yu pidi piská?

¹²Òf dun'é un skarpion ora e pidi un webu?

¹³Ke men, si boso mes ku ta mal hende sa di duna boso yunan kos bon, kuantu mas antó boso Tata den shelu lo no duna esnan ku pidiÉ Spiritu Santu?’

¹⁴Un bia Hesus tabata saka un demoño, ku tabata hasi hende muda, i ora e demoño a sali, e hòmber por a papia. E multitut a keda asombrá,

¹⁵pero algun di nan tabata komentá: ‘Ta ku yudansa di hefe di demoño, Belzebul, e ta saka demoño.’

¹⁶Otro hende ker a purba di laga Hesus kai den trampa; p'esei nan a pidiÉ un señal pa mustra nan ku Dios tabata kunÉ.

¹⁷Hesus, ku tabata sa kiko nan tabata pensa, a bisa nan: ‘Kada reino ku ta dividí den su mes lo keda ruiná i kasnan ta kai riba otro.

¹⁸Si satanas ta dividí kontra su mes, kon su reino por keda pará? Boso n' bisa ku Mi ta saka demoño ku yudansa di Belzebul?

¹⁹Si ta asina Mi ta saka demoño, ku ken su yudansa boso mes siguidónan ta hasié antó? Si boso sigui pensa asina, nan mes ta husga boso!

²⁰Ma si ta ku poder di Dios Mi ta saka demoño, esei ke men ku ya kaba reino di Dios a bini serka boso!

²¹Ora un hòmber fuerte, bon armá, ta protegé su kurá, su propiedat ta seif.

²²Ma ora un mas fuerte atak'é i batié, e delaster akí ta kita e armadura ku e hòmber fuerte tabata konfia aden i e ta parti su botin.

²³Esun ku no ta na mi fabor, ta kontra Mi i esun ku no yuda Mi pone huntu ta plama.

²⁴Ora un mal spiritu sali for di un hende, e ta pasa rònt den lugá seku pa buska un lugá di sosiegu. Ma ora e no por haña esei, e ta bisa: “Mi ta bai kas bèk, for di kaminda mi a sali!”

²⁵Anto ora e bai bèk, e ta haña e kas bon limpiá i nèchi drechá.

²⁶E ora ei e ta bai buska shete otro mal spiritu, pió ku e mes i nan ta drenta forma nan bibá einan. E hende su situashon ta bira pió ku e tabata na kuminsamentu!’

²⁷Miéntras Hesus tabata papia e kosnan ei, un muhé den e multitut a alsa bos i grita: ‘Felis ta e muhé ku a karga Bo den su barika i ku a duna Bo lechi.’

²⁸Hesus a rospond'é: ‘Mas felis ainda ta esun ku tende palabra di Dios i obedes'é.’

²⁹Segun e multitut tabata bòncha rònt di Hesus, Hesus a bisa: ‘E generashon akí ta malbado; nan ta buska un señal. Nan lo no haña ningun otro señal ku no ta esun di Yonas.

³⁰Pasobra manera Yonas tabata un señal pa e hendenan di Nínive, asina Yu di hende lo ta un señal pa e hendenan di e generashon akí.

³¹Reina di Sheba lo lanta riba dia di huisio huntu ku e hendenan di e generashon akí i lo e kondená nan. Pasobra el a sali fo'i un ekstremo di mundu pa bai skucha rei Salomon su palabranan di sabiduria, i mira, aki tin algu superior na Salomon.

³²E hendenan di Nínive tambe lo lanta huntu ku e hendenan di e generashon akí i kondená nan, pasobra nan a arepentí, ora nan a tende predikashi di Yonas. I mira, aki tin algu superior na Yonas.

³³Niun hende no ta sende un lampi pa skond'é òf pa pon'é bou di un hèmber. Ta pone lampi riba un standart pa asina esnan ku drenta mira e lus.

³⁴Bo wowo ta lampi pa bo kurpa, ke men si bo wowo ta salú, henter bo kurpa ta yená ku lus. Si bo wowo ta malu, henter bo kurpa ta den skuridat.

³⁵Paga tinu antó, pa e lus den bo no ta skuridat!

³⁶Si henter bo kurpa ta yen di lus, sin ningun parti den skuridat, e ora ei lo ta komo si fuera un lampi ta iluminá bo ku su lus briante.’

³⁷Ora Hesus a kaba di papia, un fariseo a kombid'É bin kome serka dje; Hesus a drenta paden i kai sinta pa E kome.

³⁸E fariseo a keda sorprendí di mira ku Hesus no a laba man promé ku kome.

³⁹Señor a bis'é: ‘Mira, fariseonan, boso ta laba parti pafó di beker i di tayó, ma di paden boso ta yená ku violensia i maldat!

⁴⁰Hende kèns, esun ku a krea parti pafó, no a krea parti paden tambe?

⁴¹Mihó boso duna loke ta den e beker i e tayó komo limosna, e ora ei tur kos lo bira puru pa boso!

⁴²Ai di boso, fariseonan! Boso ta duna Dios un désimo parti di menta, ruda i tur sorto di speserei, ma boso ta neglishá hustisia i amor pa Dios. Ta e kosnan akí boso mester a kumpli kuné, ma sin neglishá e otronan.

⁴³Ai di boso, fariseonan! Boso gusta sinta riba stul di honor den snoa i boso gusta pa hende kuminda boso ku rèspèt na plasa!

⁴⁴Ai di boso! Boso ta manera graf sin nòmber, hende ta kana pasa riba nan sin sa ku ta graf nan ta!’

⁴⁵Un di e ekspertonan di lei a kontest'É: ‘Maestro, ora bo papia di e forma ei, bo ta insultá asta nos ku ta eksperto di lei tambe!’

⁴⁶Hesus a kontestá: ‘Ai di boso tambe, ekspertonan di lei! Boso ta pusha e hendenan ku peso difísil pa karga. Anto boso mes no ta move niun dede pa yuda nan karg'é!

⁴⁷Ai di boso! Boso ta traha graf pa e profetanan ku boso antepasadonan a mata!

⁴⁸Ke men, boso ta testigu di e echonan di boso antepasadonan i boso ta aprobá nan tambe; pasobra nan a mata e profetanan, anto boso ta traha nan graf!

⁴⁹P'esei sabiduria di Dios a bisa: “Lo Mi manda profeta i apòstel pa nan; nan lo mata algun i otro nan lo persiguí.”

⁵⁰P'esei e hendenan di e generashon akí mester paga pa e sanger dramá di tur profeta ku a muri, for di kuminsamentu di mundu te awor.

⁵¹For di sanger di Abel te ku sanger di Zakarías, ku nan a mata entre altá i santuario. Sí, Mi ta sigurá boso ku e generashon akí lo ta responsabel pa tur e kosnan akí.

⁵²Ai di boso, ekspertonan di lei, pasobra boso a poderá di yabi pa habri e porta pa yega na konosementu. Boso mes no a drenta paden i boso a stroba otro hende di drenta tambe!’

⁵³Ora Hesus a kita bai for di ei, e fariseonan i e dòktornan di lei a bira mashá hostil kontra djE i nan a atak'É ku pregunta,

⁵⁴pa nan gar'É ta bisa algu robes.