Read Papiamento Lukas 16 Bible Online

Lukas 16 - Papiamento bible

Lukas 16

¹Tambe Hesus a bisa su disipelnan lo siguiente: ‘Tabatin un sierto hòmber riku ku tabatin un atministradó. A sosodé ku nan a denunsiá e atministradó serka su shon, pasobra e tabata dispidí su propiedat.

²E shon a yama su atministradó i bis'é: “Ta ki e kos ku mi a tende di bo ei? Duna mi kuenta i rason di bo maneho, pasobra asin'akí bo no por sigui traha pa mi.”

³E atministradó a pensa den su mes: “Kiko mi mester hasi, awor ku mi shon ta bai kita mi for di mi trabou di atministrashon? Kohe un piki koba buraku? Mi n' tin forsa pa hasi e kos ei! Òf mi mester kana pidi limosna? Mi tin bèrgwensa!

⁴Ahan! Mi sa kiko mi tin ku hasi pa sigurá ku ora e kita mi for di mi posishon, algun hende lo risibí mi den nan kas.”

⁵El a bai yama e hendenan ku debe su shon un pa un. E promé el a bisa: “Kuantu bo debe mi shon?”

⁶E kontesta tabata: “Shen barí di zeta di oleifi.” E atministradó a bis'é: “Tuma e resibu i kambi'é lihé, pone sinkuenta!”

⁷Despues el a informá serka un otro: “Abo ei, kuantu bo debe?” E kontesta tabata: “Shen saku di trigo.” E atministradó a bisa: “Tuma e resibu akí ku bo a traha, kambi'é pone ochenta!”

⁸E shon a elogiá astusia di e atministradó inhustu. Sí, asina ta: Hende ku ta sigui e mundu akí ta trata otro ku mas sabiduria ku hende ku ta sigui e lus.

⁹Tambe Mi ta bisa boso: sera amistat ku yudansa di plaka deshonesto, pasobra ora esei faya boso, nan lo risibí boso den kas eterno.

¹⁰Esun ku ta fiel ku kos chikí, lo ta fiel ku kos grandi i esun ku ta deshonesto ku kos chikí lo ta deshonesto ku kos grandi tambe.

¹¹Si boso no tabata di konfia ku rikesa deshonesto di e mundu akí, ken por konfia boso ku e rikesa berdadero?

¹²Anto si boso no tabata di konfia ku loke ta pertenesé na otro, ken lo a duna boso loke ta pertenesé na boso?

¹³Niun katibu di kas no por sirbi dos shon, pasobra òf e ta odia esun i stima e otro, òf e ta pega un na su kurason i menospresiá e otro. Boso no por sirbi Dios i plaka pareu.’

¹⁴Ora e fariseonan a tende loke El a bisa, nan a hasi bofon di djE, pasobra nan tabata stima plaka.

¹⁵Hesus a bisa nan: ‘Boso ta hasi pa boso keda hustu den bista di hende, ma Dios konosé boso kurason; loke hende ta duna mashá balor, ta abominabel den bista di Dios!

¹⁶Lei i profetanan ta konta te tempu di Huan Boutista. For di e tempu ei ta prediká reino di Dios i tur hende ta forsa drenta aden.

¹⁷Ta mas fásil pa shelu i tera pasa bai ku pa un pida chikí di un lèter ku ta den lei pasa bai.

¹⁸Si un hòmber divorsiá su señora i kasa ku un otro hende, e ta kometé adulterio; i e hòmber ku kasa ku un muhé divorsiá, e hòmber ei tambe ta kometé adulterio.

¹⁹Un dia tabatin un hòmber riku. Su pañanan tabata di púrpura i di lenen fini; e tabata tene fiesta ku kosnan luhoso tur dia.

²⁰Na porta di su kas, tabatin un hòmber pober, yamá Lázaro, drumí. Lázaro su kurpa tabata habrí na yaga.

²¹E tabatin gana di mata su hamber ku loke[22] tabata kai for di e hòmber riku su mesa, ma ta kachó tabata bin lembe su yaganan.

²²Dia e hòmber pober a muri, angelnan a karg'é hiba banda di Abraham. E riku tambe a muri i nan a der'é.

²³For di den reino di morto, kaminda e tabata sufri hopi doló, e riku a hisa kara wak ariba, mira Abraham leu aya, ku Lázaro banda di dje.

²⁴El a yam'é bisa: “Tata Abraham, tene mizerikòrdia ku mi i manda Lázaro dòp su punta di dede den awa i freska mi lenga, pasobra mi ta den agonia den e kandela akí.”

²⁵Ma Abraham a bis'é: “Mi yu, kòrda kuantu kos bon bo a haña tempu bo tabata na bida i kon malu Lázaro a pasa. Ma awor e ta risibí konsuelo aki i abo ta den agonia.

²⁶En todo kaso, tin un klof hundu ta separá nos fo'i bo, ke men si un hende di aki banda ke bai bo banda, e no por hasié; i niun hende di bo banda no por pasa bini aki serka nos.”

²⁷E hòmber riku a bisa: “Tata, mi ta roga bo anto, manda Lázaro kas di mi tata.

²⁸Mi tin sinku ruman hòmber; lag'é atvertí nan seriamente, pa nan tambe no bin haña nan den e lugá di tormento akí!”

²⁹Abraham a kontest'é: “Nan tin Moises i e Profetanan, laga nan tende di nan.”

³⁰Ma el a bolbe kontestá: “Nò, tata Abraham; si un hende ku lanta for di morto bai serka nan, e ora ei nan lo kombertí!”

³¹Abraham a dun'é pa kontesta: “Si nan no ta tende ni di Moises ni dje profetanan, asta si un hende lanta for di morto esei tampoko lo no konvensé nan!” ’