Read Papiamento Lukas 17 Bible Online

Lukas 17 - Papiamento bible

Lukas 17

¹Hesus a bisa su disipelnan: ‘Tin kos ku ta pone hende kai den piká; esei ta inevitabel, ma ai di esun ku ta trese nan!

²Lo tabata mihó p'e, pa mara un piedra grandi di mulina rònt di su garganta i bent'é na laman, ku p'e laga un di e chikitunan akí kai den piká.

³Boso mes, sea alerta! Si boso ruman peka,[23] skual e i si e arepentí, pordon'é.

⁴I si e peka kontra bo shete be riba un dia i bira bisa bo shete be: “Mi tin duele di loke mi a hasi”, bo mester pordon'é!’

⁵E apòstelnan a bisa Señor Hesus: ‘Hasi nos fe krese.’

⁶Anto Señor a bisa nan: ‘Si boso fe tabata mes grandi ku un pipita di mòster, boso lo a bisa e palu grandi akí: “Sali for di tera ku rais ku tur i planta bo mes den laman” e palu lo a tende di boso.

⁷Kua di boso lo bisa boso kriá ku ta plug tera pafó òf kuida karné pa boso, ora e bini kas for di kunuku: “Bini mesora bin sinta na mesa”?

⁸Niun hende! Mas lihé e ta bis'é: “Prepará mi kuminda pa mi; faha bo lomba i sirbi mi, te ora mi kaba di kome i bebe. Despues bo tambe por kome i bebe.”

⁹Akaso e ta yama su kriá danki, pasobra el a hasi loke a mand'é?[24]

¹⁰Meskos asina boso tambe mester bisa, ora boso a hasi tur loke a manda boso hasi: “Nos ta kriá inútil! Nos a djis kumpli ku nos deber!” ’

¹¹Na kaminda pa Herusalèm, Hesus a pasa den e region entre Samaria i Galilea.

¹²Ora El a drenta un pueblo, dies leproso a bin kontr'É i a keda pará na un distansia.

¹³Nan a grita: ‘Hesus, maestro, tene mizerikòrdia ku nos!’

¹⁴Ora Hesus a mira nan, El a bisa: ‘Bai laga e saserdotenan mira boso.’ Segun nan tabata kana bai, nan a kura.

¹⁵Un di nan a bira bèk, ora el a mira ku el a kura. E tabata alabá Dios na bos altu,

¹⁶a tira su kurpa abou na suela dilanti di Hesus i gradisí Hesus. E hòmber ei tabata un samaritano.

¹⁷E ora ei Hesus a bisa: ‘No ta dies a kura? Na unda e nuebe sobránan a keda?

¹⁸Niun no por a bini bèk pa alabá Dios ku no ta e strañero akí?’

¹⁹El a bisa e hòmber: ‘Lanta bai numa; bo fe den Mi a salba bo!’

²⁰E fariseonan a puntra Hesus ki dia reino di Dios lo bini. El a kontestá nan: ‘Reino di Dios no ta bini den un forma ku hende por mira.

²¹Ni tampoko hende lo no por bisa: “At'é aki!” òf “At'é aya!”, pasobra mira, reino di Dios ta meimei di boso!’

²²Hesus a bisa su disipelnan: ‘Lo yega un tempu ku boso tin gana di mira un di e dianan di Yu di hende. Ma boso lo no mir'é.

²³Nan lo bisa boso: “Mira at'é aya!” òf “Mira, at'é aki!” No bai ni kore nan tras,

²⁴pasobra manera welek ta kòrta den shelu di un horizonte pa otro, asina lo ta ku Yu di hende riba su dia.

²⁵Ma promé E mester sufri hopi i keda rechasá pa hende di e generashon akí.

²⁶Manera a sosodé den tempu di Noe, asina lo pasa den dianan di Yu di hende.

²⁷Hende a keda kome i bebe; nan a kasa i a tuma otro pa kasá, te dia Noe a drenta arka i e diluvio, ku a kaba ku nan tur, a kuminsá.

²⁸Òf ta manera den tempu di Lòt; nan a kome i bebe, kumpra i bende, planta i lanta edifisio.

²⁹Ma dia Lòt a sali for di Sódoma, un yobida di kandela i suafel a kaba ku tur.

³⁰Asina lo pasa dia Yu di hende manifestá su mes.

³¹Esun ku ta sintá riba su dak di kas riba e dia ei, no mester baha bin kohe kosnan ku tin den kas abou. Esun ku ta den kunuku tampoko no mester bira bai bèk pa wak loke a keda atras.

³²Kòrda riba kasá di Lòt!

³³Esun ku purba preservá[25] su bida, lo pèrd'é i esun ku pèrd'é lo hañ'é di nobo.

³⁴Mi ta bisa boso, riba e anochi ei, si tin dos hòmber drumí riba kama, lo bai ku un i e otro ta keda atras.

³⁵Dos muhé lo mula maishi huntu, lo bai ku un i e otro ta keda atras.’ [

³⁶Lo tin dos hòmber den kunuku; lo bai ku esun, i e otro ta keda atras.]

³⁷E ora ei e disipelnan a puntra Hesus: ‘Na unda, Señor?’ El a duna nan pa kontesta: ‘Kaminda tin kadaver, ei warawara ta reuní!’