Read Papiamento Lukas 21 Bible Online

Lukas 21 - Papiamento bible

Lukas 21

¹Hesus tabata wak rònt i a mira kon hende riku tabata tira sèn den kaha di ofrenda.

²El a mira un biuda pober tira dos moneda chikitu di koper.

³E ora ei Hesus a bisa: ‘Enberdat, Mi ta bisa boso ku e biuda pober a tira mas tantu sèn ku tur e otro hendenan,

⁴pasobra nan tur a duna[26] di nan rikesa. Ma e biuda, den nesesidat, a tira tur loke e tabatin pa biba di dje.’

⁵Algun disipel di Hesus tabata papia di tèmpel, kon bunita e piedranan tabata i kon e ofrendanan tabata dòrn'é.

⁶E ora ei Hesus a bisa nan: ‘Lo yega un dia ku di e kosnan ku bo ta mira akí, lo no keda niun piedra na su lugá; lo basha tur abou!’

⁷E disipelnan a puntra Hesus: ‘Maestro, ki dia tur e kosnan akí lo sosodé? Kiko lo ta e señal ku tempu a yega pa tur e kosnan akí tuma lugá?’

⁸Hesus a kuminsá splika nan: ‘Tene kuidou, no laga niun hende gaña boso. Pasobra hopi lo bin usa mi nòmber i bisa: “T'ami t'E!”, i “Tempu a yega.” No sigui nan!

⁹Ora boso tende di guera i rebelion no spanta, pasobra e kosnan ei mester sosodé promé, ma esei no ke men ku ta mesora fin a yega.’

¹⁰El a sigui bisa nan: ‘Nashon lo lanta kontra nashon, reino kontra reino;

¹¹lo tin temblor pisá i lo tin hamber grandi i plaga na diferente lugá. Kosnan teribel lo sosodé i lo tin señal grandi na shelu.

¹²Promé ku tur e kosnan ei tuma lugá, nan lo entregá boso den man di outoridat i persiguí boso. Nan lo entregá boso na snoa i benta boso den prizòn pa mi motibu. Boso lo mester aparesé dilanti di rei i dilanti di gobernante pa mi motibu.

¹³E kosnan akí lo sirbi pa boso duna testimonio di Mi.

¹⁴Sòru pa boso no preokupá di antemano kiko boso tin ku bisa.

¹⁵Pasobra Ami lo duna boso elokuensia i sabiduria di manera ku ningun di boso enemigunan lo no por resistí òf kontradesí boso.

¹⁶Asta boso mes mama, tata, famia i amigu lo entregá boso; tambe lo mata algun di boso.

¹⁷Tur hende lo odia boso pa mi motibu.

¹⁸Ma ni un drachi di boso kabei lo no haña ningun daño.

¹⁹Perseverá i boso lo salba boso alma.

²⁰Ora boso mira Herusalèm rondoná pa ehérsito, komprondé e ora ei, ku e momento di su destrukshon a yega.

²¹E ora ei habitantenan di Hudea mester hui bai buska refugio den seru. Ademas esnan ku ta den siudat mester sali bai i esnan ku ta den kunuku no mester drenta siudat.

²²Pasobra e dianan ei lo ta dianan di kastigu i tur loke Skritura ta bisa lo sosodé.

²³Ai di muhé na estado i e mamanan ku tin yu na lechi. Pasobra den e dianan ei lo tin un mizeria grandi den pais i Dios lo mustra su ira kontra e pueblo akí.

²⁴Algun di nan lo muri morto di spada, lo kohe otro prezu hiba tur nashon, i pagano lo keda trapa Herusalèm, te dia nan tempu pasa.

²⁵Lo por mira señal den solo, luna i strea i na mundu boroto di laman brutu lo pone e nashonnan drenta pániko i tolondrá.

²⁶Hende lo desmayá di spantu i ansha pa loke ta bai pasa riba mundu, pasobra poder selestial lo tambaliá.

²⁷E ora ei nan lo mira Yu di hende bini riba nubia ku gran poder i gloria.

²⁸Ora tur e kosnan akí kuminsá sosodé, para firme i lanta kabes, pasobra boso salbashon ta serka.’

²⁹E ora ei Hesus a konta nan e siguiente parábola: ‘Wak palu di figo i tur otro palu.

³⁰Ora boso mira nan spreit, boso sa di mes ku zomer ta na kaminda.

³¹Meskos tambe, realisá ora boso mira e kosnan akí ta pasando, ku reino di Dios ta serka.

³²Mi ta sigurá boso: E kosnan akí lo pasa promé ku e generashon akí pasa bai.

³³Shelu i tera lo pasa bai, ma mi palabranan sí lo no pasa bai!

³⁴Tene kuidou pa boso no ta okupá ku paranda, bebementu i preokupashon di tur dia, pa e dia ei no sorprendé boso,

³⁵manera un trampa ta sorprendé para. Pasobra e ta bini pa tur hende riba mundu.

³⁶Keda alerta i resa konstantemente pa boso tin forsa pa skapa di tur loke mester sosodé i asina keda para firme dilanti di Yu di hende.’

³⁷Di dia Hesus tabata siña e hendenan den tèmpel, ma E tabata pasa nochi riba un seru ku yama ‘Seru di Oleifi’.

³⁸Henter pueblo tabata lanta mainta trempan bai skuch'É den tèmpel.