Read Papiamento Lukas 22 Bible Online

Lukas 22 - Papiamento bible

Lukas 22

¹Fiesta di pan sin zürdeg, ku nan ta yama Pésag, tabata serka di yega.

²E saserdotenan importante i e dòktornan di lei tabata buska un manera pa kaba ku Hesus, pasobra nan tabatin miedu di e pueblo.

³Satanas a drenta Hudas, esun ku nan tabata yama Iskariot; e tabata un di e diesdos disipelnan.

⁴Anto el a bai serka e saserdotenan importante i e ofisialnan di tèmpel i a palabrá ku nan kon lo e por a entregá nan Hesus.

⁵Nan a bira mashá kontentu i a ofres'é plaka.

⁶Hudas a bai di akuerdo i el a buska un bon oportunidat pa entregá nan Hesus sin e multitut sa.

⁷Temporada di fiesta di Pésag, dia ku ta mata e lamchinan pa sena di Pésag, a yega.

⁸Hesus a manda Pedro i Huan ku e enkargo akí: ‘Bai i prepará sena di Pésag pa nos kome.’

⁹Nan a puntr'É: ‘Unda bo ke pa nos prepar'é?’

¹⁰E ora ei El a bisa nan: ‘Manera boso drenta siudat, boso ta topa ku un hòmber, ku ta karga un tinashi di awa. Siguié te na e kas kaminda e drenta i

¹¹bisa doño di kas: “Maestro ta puntra: Unda e kamber kaminda Mi por tene e komementu di Pésag ku mi disipelnan ta?”

¹²E ora ei lo e mustra boso un kamber grandi mueblá ariba; ei boso mester prepará tur kos.’

¹³Nan a bai i haña tur kos manera El a bisa nan i nan a prepará sena di Pésag.

¹⁴Ora e momento a yega, Hesus a sinta pa kome huntu ku e apòstelnan.

¹⁵El a bisa nan: ‘Mi tabatin mashá gana di selebrá e sena di Pésag akí huntu ku boso, promé ku Mi sufri.

¹⁶Pasobra laga Mi bisa boso: Lo Mi no tuma parti n'e atrobe, sino te ora e haña su nifikashon kompleto den reino di Dios.’

¹⁷E ora ei El a kohe un kopa di biña, yama Dios danki i bisa nan: ‘Tuma i kompartí ku otro.

¹⁸Pasobra laga mi bisa boso: lo Mi no bebe biña mas, te dia reino di Dios bini.’

¹⁹Despues Hesus a kohe pan, gradisí Dios, kibr'é, duna nan i bisa: ‘Esaki ta Mi kurpa ku ta entregá pa boso. Hasié pa boso kòrda riba Mi.’

²⁰Di mesun forma, El a kohe e kopa despues di sena i bisa: ‘Esaki ta e kopa di e aliansa nobo konfirmá ku mi sanger, ku lo ta dramá pa boso.

²¹Pero ata esun ku ta bai traishoná Mi, ta huntu ku Mi na mesa.

²²Sí, Yu di hende lo bai riba e kaminda ku ta determiná kaba, ma ai di e hende ku traishon'É.’

²³E disipelnan a kuminsá diskutí ku otro, ta kua di nan E tabata ke men.

²⁴Disipelnan a kuminsá pleita tambe tokante kua di nan tabata mas importante.

²⁵Hesus a bisa nan: ‘Boso sa ku rei di e pueblo paganonan ta dominá nan i esnan ku tin ku goberná nan ta yama nan mes “bienechor”.

²⁶Ma no laga esei sosodé serka boso; laga esun ku ta mas importante, sea manera esun mas hóben i laga esun ku ta lider, ta manera un sirbidó.

²⁷Pasobra ken ta mas importante? Esun ku ta sintá na mesa òf esun ku ta sirbié? Akaso no ta esun sintá na mesa? Ma Mi ta serka boso manera un sirbidó.

²⁸Boso a keda huntu ku Mi durante mi tribulashonnan.

²⁹Manera mi Tata a duna Mi outoridat pa goberná komo rei, asina Mi ta duna boso e mesun outoridat ei.

³⁰Boso lo kome i bebe na mi mesa den mi reino, i boso lo sinta riba trono pa husga e diesdos tribunan di Israel.

³¹Simon,[27] Simon! Tende, Satanas a haña pèrmit pa pone boso na prueba manera ta bencha trigo i separ'é di bagas.

³²Ma Mi a resa pa bo, pa bo no pèrdè bo fe den Mi. I ora bo bini bei, fortifiká bo rumannan.’

³³Pedro a kontest'É: ‘Señor, mi ta kla pa bai prizòn i muri huntu ku Bo!’

³⁴Hesus a rospond'é: ‘Laga Mi bisa bo Pedro, promé ku gai kanta awe nochi, lo bo a nenga tres be ku bo konosé Mi!’

³⁵E ora ei Hesus a bisa su disipelnan: ‘Dia Mi a manda boso sali sin saku di plaka, mochila i sandalia, boso a sinti falta di algu?’ Nan a kontestá: ‘Nò, di nada!’

³⁶El a sigui bisa: ‘Wèl, awor sí, laga esun ku tin un saku di plaka òf mochila, bai kuné numa. Esun ku no tin spada mester bende su mantel i kumpra un!

³⁷Mi ta bisa boso, e Skritura ku ta bisa: “Nan a tum'É pa un kriminal” mester keda kumplí den mi bida, pasobra loke ta skibí di Mi, ta bira realidat.’

³⁸Nan a bis'É: ‘Ata aki, Señor! Ata dos spada aki!’ El a kontestá nan: ‘Basta awor!’

³⁹Hesus a sali for di siudat i bai riba seru di Oleifi, manera tabata su kustumber; su disipelnan a siguiÉ.

⁴⁰Ora nan a yega einan, El a bisa nan: ‘Resa pa boso no kai den tentashon.’

⁴¹El a apartá su mes for di nan na un distansia kòrtiku, El a hinka rudia i resa:

⁴²‘Tata, si bo ke, tuma e kopa di sufrimentu akí for di Mi. Pero no hasi loke Ami ke, ma loke Abo ke.’ [

⁴³Na e momento ei un angel for di shelu a aparesé i a fortifiká Hesus.

⁴⁴Den ansha profundo, Hesus a resa ku mas fervor ainda; su sodó tabata kai riba suela manera gota di sanger.]

⁴⁵Despues di su orashon, El a lanta bai serka e disipelnan. El a haña nan drumí, di fèrdrit nan a pega soño.

⁴⁶Hesus a bisa nan: ‘Pakiko boso ta drumi? Lanta ariba hasi orashon, pa boso no kai den tentashon!’

⁴⁷Hesus no a kaba di papia, ku ata, un multitut a yega, guiá pa esun ku tabata yama Hudas, un di e diesdos disipelnan. El a yega serka Hesus pa kumind'É ku un sunchi.

⁴⁸Hesus a bis'é: ‘Hudas, ku un sunchi bo ta traishoná Yu di hende?’

⁴⁹Ora Hesus su kompañeronan a mira loke tabata bai pasa, nan a puntr'É: ‘Señor, klaba nan un sabla?’

⁵⁰Anto un di nan a ataká un kriá di gransaserdote i kap su orea drechi.

⁵¹Hesus a bisa nan: ‘Stòp ku e kosnan akí!’ El a mishi ku e hòmber su orea i kur'é.

⁵²Despues El a bisa e saserdotenan importante, e ofisialnan di tèmpel i e ansianonan ku a bini: ‘Boso a sali bini ku sabla i chikoti manera ta un bandidu Mi ta.

⁵³Dia aden dia afó Mi tabata huntu ku boso den tèmpel i boso no a arestá Mi; ma ta boso ora, e momento pa forsa di skuridat hasi su trabou!’

⁵⁴Nan a arestá Hesus i hib'É kas di gransaserdote. Pedro a sigui na un distansia.

⁵⁵E hendenan a sende un kandela meimei dje patio i nan a kai sinta rònt di dje; Pedro tabata sintá den e hendenan.

⁵⁶Un kriá muhé a mir'é sintá banda di e kandela; el a wak e bon i bisa: ‘E hòmber akí tambe tabata huntu ku Hesus!’

⁵⁷Pedro a nenga i bisa: ‘Señora, ami no konosé e hòmber ei!’

⁵⁸Despues di un ratu, un otro hende tambe a mir'é i bisa: ‘Bo tambe ta un di nan!’ Ma Pedro di: ‘Ai nò, hòmber!’

⁵⁹Mas o ménos un ora despues un otro hende a bisa ku mashá siguransa: ‘Sí, bèrdat, e tambe ta un di nan, pasobra ta galileo e ta!’

⁶⁰Pedro a rospondé: ‘Hòmber, mi no sa ki bo ta papia!’ E n' kaba di saka e palabranan akí fo'i su boka, ku un gai a kanta.

⁶¹Hesus a drei keda wak Pedro i Pedro a kòrda ku Señor a bis'é: ‘Promé ku gai kanta awe nochi, ya lo bo nenga Mi tres be!’

⁶²El a kana bai pafó i yora amargamente.

⁶³E hòmbernan ku tabata vigilá Hesus, tabata hasi bofon di djE i nan tabata dal E.

⁶⁴Nan a tapa su wowo i puntr'É: ‘Profetisá ta ken a dal bo!’

⁶⁵I nan a bis'É hopi otro kos mas pa insult'É.

⁶⁶Ora di dia a habri, ansianonan di pueblo, saserdotenan importante i dòktornan di lei a bini huntu i a hiba Hesus dilanti di nan Konseho Supremo.

⁶⁷Nan a bis'É: ‘Bisa nos, si ta abo ta e Mesias.’ Hesus a kontestá: ‘Si Mi bisa boso, boso no ta kere Mi tòg.

⁶⁸Si Ami hasi boso un pregunta, boso no ta kontestá Mi.

⁶⁹Ma di awe padilanti, Yu di hende lo ta sintá na man drechi di Dios, ku tin poder.’

⁷⁰Nan tur a rospond'É: ‘Ke men, ta abo ta Yu di Dios antó?’ Hesus a bisa nan: ‘Ta boso mes ta bisa ku Mi ta!’

⁷¹E ora ei nan di: ‘Nos no tin mester di mas testigu! Ata nos mes a tende loke el a bisa!’