Read Papiamento Lukas 24 Bible Online

Lukas 24 - Papiamento bible

Lukas 24

¹Den kibrá di mainta, riba e promé dia di siman, e muhénan a bishitá graf di Hesus, ku e spesereinan ku nan a prepará.

²Nan a haña e piedra kitá for di boka dje graf

³i ora nan a drenta, nan no a haña kurpa di Señor Hesus.

⁴Miéntras nan a keda para tur turdí pa loke a pasa, diripiente dos hòmber bistí na paña blanku briante a aparesé nan dilanti.

⁵Yen di miedu e muhénan a baha kabes, ma e hòmbernan a dirigí e siguiente palabranan na nan: ‘Pakiko boso ta buska Esun ku ta na bida meimei di e mortonan?

⁶E no ta aki; El a lanta for di morto! Kòrda ku El a bisa boso, tempu E tabata na Galilea ainda:

⁷“Yu di hende mester keda entregá den man di hende pekadó i nan lo krusifik'É, ma riba e di tres dia lo E resusitá.” ’

⁸E ora ei nan a kòrda loke Hesus a bisa.

⁹Nan a bai for di e graf i a konta e diesun apòstelnan i tur sobra hende, tur kos.

¹⁰E muhénan tabata: Maria Magdalena, Huana, i Maria mama di Hakobo. E otro muhénan ku a kompañá nan, tambe a konta e apòstelnan e historia.

¹¹Ma pa e apòstelnan e historia di e muhénan a zona manera kos di loko i nan no a kere nan.

¹²Sinembargo Pedro a kore bai na e graf, bùk wak aden, ma ta e pañanan ku ta lora morto aden so el a mira. El a bai kas bèk, asombrá pa loke a pasa.

¹³E mesun dia ei dos disipel di Hesus tabata na kaminda pa Emaus, un pueblo ku ta keda diesun kilometer for di Herusalèm.

¹⁴Nan tabata kombersá ku otro riba tur e kosnan ku a sosodé.

¹⁵Miéntras nan tabata kombersá i diskutí, Hesus mes a bin djòin nan i a kompañá nan na kaminda.

¹⁶Ma algu tabata stroba nan bista, di moda ku nan no por a rekonos'É.

¹⁷Hesus a puntra nan: ‘Tokante kiko boso ta kombersando ku otro segun boso ta kana?’ Nan a keda para ku kara tristu.

¹⁸Un di nan, Kleopas, a kontest'É: ‘Abo ta e úniko bishitante na Herusalèm ku no sa loke a sosodé aya den e último dianan akí?’

¹⁹El a puntra nan: ‘Kiko, antó?’ E ora ei nan a kont'É: ‘Loke a pasa ku Hesus di Nazarèt. E hòmber ei tabata un profeta i tantu Dios komo henter pueblo tabata konsider'É poderoso den palabra i akshon!

²⁰Nos saserdotenan importante i nos lidernan a laga konden'É na morto i krusifik'É.

²¹Anto nos aki tabata karga speransa ku E tabata Esun ku a bini pa liberá Israel. Pero, ya ta tres dia kaba ku e kosnan ei a pasa.

²²Awor algun señora di nos grupo a sorprendé nos. Mainta trempan nan a bai su graf

²³i no a haña su kurpa einan. Nan a bini bèk bin konta ku nan a mira vishon di angelnan ku a bisa nan ku E ta bibu.

²⁴Algun di nos a bai bishitá e graf i a haña tur kos manera e muhénan a bisa, ma E mes nan no a mira.’

²⁵E ora ei Hesus a bisa nan: ‘Esta bobo boso ta! Esta pokopoko pa kere tur kos ku e profetanan a bisa!

²⁶E Mesias n' mester a sufri di e forma akí i despues drenta den su gloria?’

²⁷Hesus a splika nan tur kos ku Skritura ta bisa di djE mes; El a kuminsá na e bukinan di Moises i a sigui te na e bukinan di e profetanan.

²⁸Ora nan a aserká e pueblo kaminda nan tabata bai, Hesus a hasi komo si fuera E ker a sigui bai poko mas leu.

²⁹Ma nan a insistí pa E no bai i a bis'É: ‘Keda huntu ku nos, dia ta yegando na su fin; nochi ta sera.’ Hesus a drenta paden i keda huntu ku nan.

³⁰Miéntras E tabata kome huntu ku nan, El a kohe e pan, gradisí Dios, kibr'é i duna nan.

³¹Nan bista a habri i nan a rekonos'É, ma na mes momento El a disparsé.

³²Un a bisa otro: ‘Nos kurason no tabata kima, ora E tabata papia ku nos na kaminda i mustra nos nifikashon di Skritura?’

³³Nan a lanta mesora bai Herusalèm bèk. Aya nan a haña e diesun apòstelnan huntu ku e otro disipelnan.

³⁴E apòstelnan di nan parti a konta e dos disipelnan ku a yega: ‘Ta di bèrdè mes, Señor a lanta for di morto! Pedro a mir'É!’

³⁵E ora ei e dos disipelnan a konta tur kos ku a pasa ku nan na kaminda. Kon nan a rekonosé Hesus, ora El a kibra pan.

³⁶Miéntras e dos disipelnan tabata papia, diripiente Hesus mes a bin para meimei di nan i bisa nan: ‘Pas sea ku boso.’

³⁷Nan a spanta nan morto i a haña miedu, pasobra nan a kere ku ta un spiritu nan a mira.

³⁸E ora ei Hesus a bisa nan: ‘Pakiko boso ta drenta pániko asina? Pakiko boso mente ta yená ku duda?

³⁹Mira mi man i mi pia, t'Ami mes! Mishi ku Mi pa boso sa ku t'Ami. Pasobra spiritu no tin karni i wesu manera boso ta mira ku Ami sí tin!’

⁴⁰Despues ku El a bisa nan e kosnan akí, El a mustra nan su man i su pia.

⁴¹Te ainda nan no por a ker'É, dje kontentu i asombrá ei nan tabata, p'esei El a bisa nan: ‘Boso tin algu di kome aki?’

⁴²Nan a dun'É un pida piská hasá

⁴³i El a kom'é nan dilanti.

⁴⁴E ora ei El a bisa nan: ‘Ta esaki ta e kosnan ku Mi a konta boso, tempu Mi tabata ainda huntu ku boso: Tur kos di Mi, ku ta skibí den Lei di Moises, den profetanan i den Salmonan mester bira realidat.’

⁴⁵Na e momento ei El a habri nan mente pa nan por a komprondé Skritura

⁴⁶i bisa nan: ‘Esaki ta skibí: Mesias mester sufri i lanta for di morto riba e di tres dia.

⁴⁷Mester prediká, den su nòmber, pa tur nashon e mensahe ku hende mester kombertí pa haña pordon di piká. Boso ta testigu di e kosnan akí, kuminsando na Herusalèm.

⁴⁸

⁴⁹Ami mes lo manda pa boso loke Tata a primintí. Ma boso mester warda den siudat te ora boso haña poder djariba.’

⁵⁰Hesus a hiba nan pafó di siudat te serka Betania, kaminda El a hisa man na laria bendishoná nan.

⁵¹Segun E tabata bendishoná nan, El a kita for di nan i a keda tumá den shelu.

⁵²Nan a ador'É i a regresá Herusalèm, yen di legria.

⁵³Nan tabata kontinuamente den tèmpel, kaminda nan tabata alabá Dios.