Read Papiamento Lukas 6 Bible Online

Lukas 6 - Papiamento bible

Lukas 6

¹Riba un dia di sabat Hesus tabata kana dor di e kunukunan di trigo. Su disipelnan tabata piki tapushi di trigo, frega den nan planta di man pa kita bagas i nan tabata kome e pipitanan.

²Algun fariseo a bisa: ‘Pakiko boso ta hasi loke no ta pèrmití riba dia di sabat?’

³Hesus a kontestá nan: ‘Boso no a lesa loke David a hasi ora e ku su kompañeronan tabatin hamber?

⁴El a drenta kas di Señor kohe e pan konsagrá ku saserdote so mag kome i kome di dje. El a duna su kompañeronan tambe di e pan ei.’

⁵Hesus a sigui bisa nan: ‘Yu di hende tin outoridat riba sabat.’

⁶Riba un otro dia di sabat, Hesus a bai snoa i siña e hendenan. Den snoa tabatin un hòmber ku su man drechi mankaron.

⁷E fariseonan i e dòktornan di lei tabata blo wak Hesus pa mira si E ta kura un hende riba dia di sabat, pa haña algu pa akus'É di dje.

⁸Hesus, ku tabata sa kiko nan tabata pensa, a bisa e hòmber: ‘Lanta bai para meimei.’ I e hòmber a lanta bai para aya.

⁹Hesus a bisa e hendenan: ‘Mi ke puntra boso: kiko ta pèrmití riba dia di sabat? Hasi bon òf hasi malu? Salba bida di un hende òf akaso mata un hende?’

¹⁰Hesus a drei wak nan tur i bisa e hòmber: ‘Rèk bo man.’ E hòmber a rèk su man i su man a bira bon atrobe.

¹¹E hendenan a bira furioso i kuminsá diskutí kiko nan lo por a hasi ku Hesus.

¹²Un bia den e tempu ei, Hesus a subi seru pa resa. Henter anochi El a pasa den orashon na Dios.

¹³Ora ku di dia a habri, El a yama su disipelnan i skohe diesdos ku El a yama ‘apòstel’.

¹⁴E diesdosnan tabata: Simon, ku El a yama Pedro, i su ruman Andreas; Hakobo i Huan; Filipo i Bartolomeo;

¹⁵Mateo i Tomas, Hakobo, yu di Alfeo, i Simon, yamá e Zeloso;[8]

¹⁶Hudas, yu di Hakobo i Hudas Iskariot, esun ku despues lo traishoná Hesus.

¹⁷Hesus a baha for di seru bai un poko mas abou, na un lugá plat kaminda tabatin un grupo grandi di disipel. Ei tabatin tambe un multitut grandi di hende for di henter region di Hudea, Herusalèm, i di e siudatnan di kosta, Sidon i Tiro.

¹⁸E hendenan a bini pa tende Hesus papia i pa lag'É kura nan di nan enfermedat. Esnan tormentá pa mal spiritu, tambe tabata kura.

¹⁹Tur hende tabata buska moda di mishi kunÉ, pasobra tabatin un forsa ta sali for di djE i E tabata kura tur hende.

²⁰Anto Hesus a fiha su bista riba su disipelnan i bisa: ‘Felis boso ku ta pober; reino di Dios ta pa boso.

²¹Felis boso ku tin hamber awor akí; boso barika lo ta yená. Felis boso ku ta yora awor akí; boso lo hari.

²²Felis boso ta ora hende odia boso, rechasá boso, zundra i papia malu di boso, pa motibu di e Yu di hende.

²³Ora e kosnan akí pasa, bula di legria; den shelu tin un rekompensa grandi pa boso. No ta asin'ei mes nan antepasadonan a trata e profetanan?

²⁴Ma ai di boso, boso ku ta riku, ya boso a haña boso konsuelo!

²⁵Ai di boso ku ta kana ku barika yen, boso lo pasa hamber! Ai di boso ku awor akí ta hari, boso lo tene rou i yora!

²⁶Ai di boso, ora tur hende ta papia bon di boso, pasobra ta asin'ei mes nan antepasadonan tabata papia di e profetanan falsu!’

²⁷Hesus a sigui bisa: ‘Boso ku ta skucha, Mi ta bisa: Stima boso enemigunan; hasi bon na esnan ku ta odia boso.

²⁸Bendishoná esnan ku maldishoná boso; resa pa esnan ku maltratá boso.

²⁹Si un hende dal bo wanta riba un banda di kara, ofres'é e otro banda tambe. Anto si un hende kita bo bachi fo'i bo, dun'é bo kamisa tambe.

³⁰Duna tur hende ku pidi bo algu, loke nan pidi bo; si un hende kohe un kos di bo, no pidiéle bèk.

³¹Trata otro hende manera bo ke pa nan trata bo.

³²Si boso stima solamente hende ku ta stima boso, ki danki boso meresé? Pekadónan tambe ta stima esnan ku ta stima nan.

³³I si boso hasi bon pa esnan ku ta hasi bon pa boso, ki danki boso meresé? Pekadónan ta hasi meskos!

³⁴Anto si boso ta fia sèn na hende ku por paga bèk so, ki danki boso meresé? Pekadónan tambe ta fia otro pekadó pa nan haña bèk loke nan duna komo fiansa.

³⁵Al kontrario! Stima boso enemigunan, hasi bon i fia sin spera nada bèk. E ora ei lo tin un bon rekompensa pa boso: boso lo ta yu di Altísimo. Pasobra E ta bon pa hende ingrato i malbado tambe.

³⁶Sea mizerikordioso, manera boso Tata ta mizerikordioso.

³⁷No husga i Dios lo no husga boso; no kondená i Dios lo no kondená boso. Pordoná i Dios lo pordoná boso.

³⁸Duna i Dios lo duna boso; un bon midí, bon primí, bon sakudí, ku ta basha over, lo kai den boso skochi. Pasobra ku e midí ku boso midi otro hende, ku e mesun midí ei Dios lo midi boso.’

³⁹Tambe Hesus a duna nan un komparashon: ‘Un siegu por guia un otro siegu? N' ta tur dos ta kai huntu den buraku e ora ei?

⁴⁰Un disipel no ta riba su maestro, ma un disipel bon instruí lo bira manera su maestro.

⁴¹Di kon bo ta wak e splenter den wowo di bo ruman i e balki den bo mes wowo sí bo no ta ripará?

⁴²Kon bo por bisa bo ruman: “Ruman, laga mi saka e splenter for di bo wowo”, miéntras bo mes no ta mira e balki den bo wowo? Hipókrita, saka e balki for di bo mes wowo promé, anto e ora ei bo por mira bon pa saka e splenter for di wowo di bo ruman.

⁴³Un bon palu no ta pari mal fruta i un mal palu no ta pari bon fruta.

⁴⁴Bo ta rekonosé kada palu na su mes fruta. No por piki figo for di un mata di sumpiña ni kosechá drùif for di kadushi.

⁴⁵Un bon hende ta saka kos bon for di mangasina di su kurason; un mal hende ta saka kos malu for di mangasina di su kurason. Pasobra boka ta papia loke kurason ta yená kuné.

⁴⁶Pakiko boso ta grita: “Señor, Señor,” sin hasi loke Mi bisa?

⁴⁷Laga Mi mustra boso ken un hende ku bini serka Mi, skucha Mi i hasi loke Mi bisa, parse.

⁴⁸E parse e hende ku pa traha kas a koba un buraku hundu i a basha e fundeshi riba baranka. Ora riunan a subi tera i e koriente di awa a suta kontra di e kas, e no por a sakudí e kas, pasobra e kas tabata bon trahá.

⁴⁹Ma ken ku skucha so sin hasi, ta manera e hende ku a traha kas sin koba fundeshi promé. Riu a suta kontra e kas i e kas a basha aden; su destrukshon tabata inmenso!’