Read Papiamento Deuteronomio 26 Bible Online

Deuteronomio 26 - Papiamento bible

Deuteronomio 26

¹Pronto boso ta drenta e pais ku SEÑOR, boso Dios, ta bai duna boso komo propiedat. Ora boso tum'é pa boso i ta biba aya,

²skohe e ora ei for di e promé produktonan di kosecha. Yena un makutu i hib'é e lugá ku SEÑOR, boso Dios, a skohe pa manifestá su presensia.

³Ora boso yega serka e saserdote ku ta na warda, bis'é: “Mi ke deklará awe dilanti di SEÑOR, bo Dios, ku mi a yega e pais ku SEÑOR ker a duna nos manera El a primintí nos antepasadonan.”

⁴E saserdote ta tuma e makutu i pon'é dilanti di e altá di SEÑOR, boso Dios.

⁵Despues deklará dilanti di SEÑOR, boso Dios: “Mi antepasado, un arameo, no tabatin paradero. El a biaha bai Egipto ku un grupo chikitu i a keda biba aya komo strañero. Aya nan a krese bira un pueblo grandi i poderoso.

⁶E egipsionan tabata maltratá nos, oprimí nos i obligá nos hasi trabou pisá.

⁷P'esei nos a sklama na SEÑOR, Dios di nos antepasadonan, i El a skucha nos. El a mira kon nos tabata púluwe i kon nan opreshon tabata pone nos pasa den mizeria.

⁸Ku man fuerte i ku man poderoso, ku kos spantoso, señal i milager El a saka nos for di Egipto.

⁹El a guia nos na e lugá akí i a duna nos e pais ku ta mana lechi i miel.

¹⁰P'esei, SEÑOR, ata mi a trese e promé produktonan di e tera ku Abo a duna mi.” Pone despues e makutu dilanti di SEÑOR, boso Dios, i bùig pa ador'É.

¹¹Usa e produktonan ku SEÑOR, boso Dios, a duna boso i boso famia pa un komementu. Kombidá e ora ei e levitanan i strañeronan ku ta biba serka boso tambe.

¹²Apartá kada tres aña e désimo parti di henter boso kosecha i duna e levitanan, strañeronan, wérfanonan i biudanan den boso siudat pa nan por kome barika yen.

¹³Despues deklará dilanti di SEÑOR, boso Dios: “Mi a saka e parti di kosecha ku ta konsagrá na Bo for di kas duna e levitanan, strañeronan, wérfanonan i biudanan presis manera Bo a ordená mi. Mi no a lubidá, ni a falta ku ningun di bo mandamentunan.

¹⁴Tempu mi tabata na rou, mi no a kome nada for di dje, ni mi no a sak'é for di kas tempu mi tabata impuru, tampoko mi no a duna un morto algu for di dje. Mi a obedesé Bo, SEÑOR, mi Dios, mi a hasi tur loke Bo a ordená nos.

¹⁵Mira riba nos for di shelu, e lugá sagrado kaminda Bo ta biba i bendishoná bo pueblo Israel. Bendishoná e tera ku Bo a duna nos, manera Bo a primintí nos antepasadonan, e tera ku ta mana lechi i miel.”

¹⁶Awe SEÑOR, boso Dios, ta ordená boso biba segun e leinan i mandamentunan akí; kumpli kuidadosamente ku nan ku henter boso alma i henter boso kurason.

¹⁷Awe boso a deklará di aseptá SEÑOR komo boso Dios. Boso a primintí di sigui e kaminda ku SEÑOR ta mustra boso, di kumpli ku su leinan, mandamentunan i reglanan i di obedes'É.

¹⁸Awe SEÑOR di su banda a aseptá boso komo su mes pueblo, manera El a primintí. I E ke pa boso kumpli ku tur su mandamentunan.

¹⁹Lo E alsa boso riba tur otro nashon ku El a krea. Nan lo elogiá boso, boso lo ta famoso i tur kaminda nan lo gaba boso bon nòmber. Boso lo ta e pueblo konsagrá na SEÑOR, boso Dios, manera El a primintí.’