Read Papiamento Deuteronomio 3 Bible Online

Deuteronomio 3 - Papiamento bible

Deuteronomio 3

¹Despues di esei nos a bira bai direkshon di Bashan. Og, rei di Bashan, a sali ku henter su ehérsito bin bringa ku nos na Edrei.

²Pero SEÑOR a bisa mi: “No tene miedu, pasobra Mi ta entreg'é ku su pais i ku henter su ehérsito den bo poder. Hasi kuné manera bo a hasi ku Sihon, rei di e amoritanan, ku tabata biba na Hèshbon.”

³I SEÑOR, nos Dios, a entregá Og, rei di Bashan, i henter su ehérsito den nos poder i nos a derot'é sin laga ningun hende keda na bida.

⁴Den e tempu ei nos a okupá tur su siudatnan; den henter region di Argob, reino di Og na Bashan, no a keda ni un di e sesenta siudatnan; nos a kita tur for di su hendenan.

⁵Tur e siudatnan akí tabata reforsá ku muraya altu i ku porta ku tabata sera ku balki; sin konta e lugánan ku no tabatin muraya.

⁶Nos a kaba ku nan kompletamente, manera nos a hasi ku e siudatnan na Hèshbon, reino di rei Sihon. Niun hòmber, ni muhé, ni mucha no a keda na bida.

⁷Sinembargo nos a bai ku tur nan bestianan i a sakia nan siudatnan.

⁸Asina nos a kita teritorio for di e dos reinan di e amoritanan, esta e region na parti ost di Yordan, for di riu Arnon te na Seru Hermon.

⁹(E habitantenan di Sidon ta yama e seru akí Sirion i e amoritanan ta yam'é Senir.)

¹⁰Nos a kita tantu e siudatnan den e sabana nort di riu Arnon, komo henter Guilead i henter Bashan te Salka ku Edrei, esta tur e siudatnan di reino di Og na Bashan.

¹¹Og, rei di Bashan, tabata e úniko refaíta ku a sobra. E tabatin un sarkofag di basalt,[1] ku tabata dos meter hanchu i mas ku kuater meter largu. Te ainda por mira e sarkofag akí na Raba, kapital di Amon.

¹²Unabes ku nos a okupá e region akí, mi a duna e tribunan di Ruben i di Gad e teritorio na nort di siudat Aroer na riu Arnon i mitar di e serunan di Guilead ku tur e siudatnan den e serunan.

¹³E otro mitar di Guilead ku henter Bashan, pais di rei Og, esta henter region di Argob, mi a duna e mitar tribu di Manase. Ta yama henter e parti akí di Bashan pais di e refaítanan.

¹⁴Yair di tribu di Manase a tuma henter region di Argob te na teritorio di Gueshur i Maaka p'e. El a duna region Bashan su mes nòmber, esta pueblo di Yair. Te ainda nan a keda ku e nòmber akí.

¹⁵E desendientenan di Makir mi a duna region di Guilead.

¹⁶Tribu di Ruben i tribu di Gad tambe mi a duna un parti di Guilead te na riu Arnon. E frontera na zùit tabata pasa dor di e riu akí. Na parti nort riu Yabok tabata forma e frontera, kaminda teritorio di e amonitanan tabata kuminsá.

¹⁷Tambe e tribunan di Ruben i di Gad a haña vaye di Yordan i riu Yordan ku e teritorio ku ta pertenesé n'e for di Kinerèt na nort te na Laman Morto na zùit, esta te na pia di e serunan di Pisga na parti ost di Laman Morto.

¹⁸Na e okashon ei mi a ordená e miembronan di e tribunan di Ruben i di Gad i di e mitar tribu di Manase: “SEÑOR, boso Dios, a duna boso e pais akí komo propiedat; pero arma boso hòmbernan ku por bringa i laga nan krusa Yordan, na kabes di e otro israelitanan.

¹⁹Solamente boso hende muhénan, boso yu- i boso bestianan — boso tin hopi bestia tòg — por keda den e siudatnan ku mi a duna boso.

²⁰Ora SEÑOR duna boso rumannan e trankilidat ku El a duna boso, i nan tambe okupá e pais ku SEÑOR, boso Dios, duna nan na e otro banda di Yordan, e ora ei numa boso por bolbe e teritorio ku Mi a duna boso.”

²¹E tempu ei mi a bisa Yozue: “Bo a mira ku bo mes wowo kiko SEÑOR, boso Dios, a hasi ku e dos reinan, Og i Sihon; meskos asina SEÑOR ta hasi ku e reinonan kaminda boso ta bai pasa.

²²No tene miedu di nan, pasobra ta SEÑOR, boso Dios, ta bringa pa boso.”

²³Na e okashon ei mi a roga SEÑOR:

²⁴“SEÑOR, mi Dios, bo a kuminsá mustra ami, bo sirbidó, bo grandesa i bo gran poder; por tin un dios na shelu òf na tera ku ta kapas di hasi kos asina grandi?

²⁵Por fabor, laga mi krusa bai e otro banda di Yordan pa mi mira e tera bunita ku tin einan, esta e serunan bunita i Libanon.”

²⁶Pero SEÑOR a rabia mashá ku mi i pa boso falta E no ker a skucha mi orashon. SEÑOR a bisa mi: “Basta awor. Mi no ke tende nada mas di e kos ei!

²⁷Subi bai riba kabes di Pisga i bira kara pa wèst, pa nort, pa zùit i pa ost. Wak bon, pasobra e riu Yordan akí bo no ta krusa nunka.

²⁸Prepará Yozue pa su tarea, anim'é i kurash'é, pasobra t'e ta krusa Yordan na kabes di e pueblo akí. I t'e lo guia Israel ora nan tuma e pais, ku bo ta bai mira, pa nan.”

²⁹Asin'ei nos a keda den e vaye dilanti di Bet-Peor.