Read Papiamento Deuteronomio 33 Bible Online

Deuteronomio 33 - Papiamento bible

Deuteronomio 33

¹Ata e bendishon ku Moises, e hòmber di Dios, a duna e israelitanan promé ku el a muri.

²El a bisa: ‘SEÑOR, a bini for di Seru Sinai, manera solo El a sali for di e pais Seír. E tabata iluminá su pueblo for di serunan di Paran, kompañá pa míles i míles di angel; rayonan di lus tabata kòrta for di su man drechi.

³SEÑOR ta stima e tribunan di Israel, E ta protegé esnan ku konsagrá nan n'E; nan ta sosegá na su pia i risibí òrdu di djE.

⁴Moises a duna nos un lei, un propiedat pa pueblo di Yakob.

⁵SEÑOR a bira rei di Yeshurun,[10], dia lidernan di e pueblo tabata huntu, ku tur e tribunan di Israel.

⁶Mare tribu di Ruben por keda biba pa semper i no muri kaba nunka, ounke e ta konsistí di tiki hende.’

⁷Di tribu di Huda Moises a bisa: ‘Skucha, SEÑOR, kon Huda ta grita i tres'é bèk serka su pueblo; e ta lucha pa e pueblo, yud'é lucha kontra su atversarionan.’

⁸Di tribu di Levi el a bisa: ‘SEÑOR, Bo a konfia bo Tumim i Urim na Levi, bo sirbidó fiel, ku na Masa Bo a pone na prueba, i a tèst na e awa di Meriba.

⁹E hende hòmbernan di Levi no a tene kuenta ku nan mayornan, nan a kibra tur laso ku nan rumannan, i no ker a tende pa nan yunan. Nan ker a sigui bo òrdunan i atené nan na e aliansa ku Bo.

¹⁰Nan ta siña e pueblo di Yakob bo mandamentunan i Israel nan ta siña bo lei; nan ta hasi ofrenda di sensia pa Bo, ofresé sakrifisio riba bo altá.

¹¹SEÑOR, bendishoná su forsa, sea den tur kos ku e hasi na su fabor, kibra forsa di su atversarionan i stroba su enemigunan di lanta para atrobe!’

¹²Di tribu di Benhamin el a bisa: ‘E dushi di SEÑOR ta biba den seguridat; Dios Altísimo ta proteg'é semper. E ta biba serka dje den su serunan.’

¹³Di tribu di Jozef el a bisa: ‘SEÑOR bendishoná su pais ku serena, ku e regalo ei for di shelu, ku awa for di laman profundo,

¹⁴ku e kos di mas bunita ku ta hecha den solo, i ku ta krese den luna kresiente,

¹⁵ku lo mihó ku ta krese riba e serunan for di tempu di antaño, ku ta sali for di e serunan eterno,

¹⁶ku lo mihó di mundu i di loke ta yena mundu i ku e agrado di Esun ku a aparesé den mata di sumpiña. Mare e bendishon akí baha riba Jozef, esun ku Dios a skohe for di su rumannan.

¹⁷Esta bunita e ta, e promé yu di un toro, ku kachu manera baka: ku nan e ta stot e pueblonan basha abou, nan tur, te na fin di mundu. Su yu Efraim ta hefe di míles i míles, su yu Manase di míles.’

¹⁸Di e tribunan di Zebulon i Isakar el a bisa: ‘Alegrá bo, Zebulon, ora bo sali bai, i abo, Isakar, ora bo keda kas.

¹⁹Nan ta kombidá nashonnan pa bini e seru, kaminda nan ta ofresé sakrifisio segun preskripshon. Nan ta gosa di rikesa di laman, saka e tesoronan skondí for di santu.’

²⁰Di tribu di Gad el a bisa: ‘Bendishoná t'Esun ku ta dun'é teritorio grandi. Gad ta slùip ataká manera un leon, sker brasa ku kabes na pida pida.

²¹El a skohe e mihó parti pa su mes, un tera digno di un lider. El a drenta na kabes di e pueblo, kumpli ku loke SEÑOR tabata eksigí i a aktua ku hustisia na Israel.’

²²Di tribu di Dan el a bisa: ‘Dan ta un yu di leon, ku ta bula sali for di Bashan.’

²³Di tribu di Naftali el a bisa: ‘Naftali ta bon mirá serka SEÑOR, el a haña hopi bendishon serka djE. E ta poseé e lago ku e pais ku ta keda na parti zùit.’

²⁴Di tribu di Asher el a bisa: ‘Asher, esun mas bendishoná di e yunan di Yakob, mare bo ta bon mirá serka bo rumannan. Lo bo tin asina tantu zeta di oleifi, ku bo ta papa bo pianan kuné;

²⁵no por konkistá bo siudatnan pa motibu di e rèndunan di heru i di bròns. Bo prosperidat lo dura henter bo bida largu.

²⁶Yeshurun,[11] no tin ningun hende manera Dios, ku ta kore mahestuosamente riba e nubianan di shelu, kla pa bin yuda bo.

²⁷Dios eterno ta bo refugio, su poder eterno bo apoyo; El a pone enemigu hui for di bo presensia i a ordená abo destruí nan.

²⁸Israel, pueblo di Yakob, boso lo biba den seguridat, i keda ileso, den un pais di trigo ku biña, kaminda serena ta drùp kai for di shelu.

²⁹Esta felis bo ta! Kua pueblo por midi su mes ku bo? Ta SEÑOR mes a liberá bo. E ta e eskudo ku ta protegé bo, E sabla ku ta laga abo triunfá. Enemigu lo gatia pa bo, i abo lo pone pia riba nan garganta.’