Read Papiamento Deuteronomio 34 Bible Online

Deuteronomio 34 - Papiamento bible

Deuteronomio 34

¹For di vaye di Moab Moises a subi Nebo, un di e tòpnan di e serunan di Pisga, ku ta keda na altura di Yériko. Fo'i djei SEÑOR a lag'é mira henter e pais: e region di Guilead te Dan,

²henter e teritorio di Naftali, e teritorio di Efraim ku Manase, e teritorio di Huda te na Laman Mediteráneo,

³desierto di Neguèb i e region di Yordan na e siudat di palma Yériko te na Soar.

⁴SEÑOR a bis'é: ‘Esaki awor ta e pais di kua Mi a primintí Abraham, Isak i Yakob solemnemente: “Lo Mi duna boso desendientenan e pais akí.” Mi a laga bo mir'é ku bo mes wowo, pero lo bo no drent'é.’

⁵Aya na Moab, Moises, sirbidó di SEÑOR, a muri, manera SEÑOR a bisa.

⁶SEÑOR a der'é den un vaye na Moab enfrente di Bet-Peor. Te awe ningun hende no sa e lugá kaminda e ta derá.

⁷Moises tabatin 120 aña dia el a muri; su wowonan no a bira skur ni su forsa no a mengua.

⁸Den vaye di Moab e israelitanan a tene rou trinta dia largu pa Moises, te ora e tempu a pasa.

⁹Yozue, yu di Nun, tabata yená ku spiritu di sabiduria for di dia ku Moises a pone man riba su kabes. E israelitanan tabata obedes'é i hasi loke SEÑOR a ordená Moises.

¹⁰Nunka mas no a lanta un profeta na Israel manera Moises, ku a konosé SEÑOR kara kara.

¹¹Òf ku a hasi tur señal i milager, ku SEÑOR a mand'é hasi na Egipto kontra fárao, su funshonarionan i henter e pais.

¹²Òf ku a igual'é ku poder i ku kos grandi i impreshonante ku el a hasi pa henter Israel mira.