Read Papiamento Deuteronomio 4 Bible Online

Deuteronomio 4 - Papiamento bible

Deuteronomio 4

¹Israel, skucha e leinan i e reglanan ku mi ta bai siña boso i kumpli ku nan. E ora ei boso ta keda na bida i boso ta drenta i tuma e pais ku SEÑOR, Dios di boso antepasadonan, ta bai duna boso.

²No kita nada afó, ni pone nada aserka. Kumpli ku e mandamentunan di SEÑOR, boso Dios, ku mi ta bai ordená boso.

³Ku boso propio wowo boso a mira kiko SEÑOR a hasi na Seru Peor, kon SEÑOR, boso Dios, a kaba ku tur hende ku tabata sirbi e dios Baal-Peor,

⁴miéntras boso ku a keda fiel na SEÑOR, boso Dios, ta na bida ainda.

⁵Awèl, mi a siña boso e leinan i e reglanan manera SEÑOR, boso Dios, a ordená mi, pa boso kumpli ku nan na e pais ku boso ta bai tuma pa boso.

⁶Kumpli ku nan kuidadosamente. E nashonnan ku tende di e leinan akí lo haña boso sabí i huisioso. E ora ei nan lo bisa: “Esta sabí i huisioso e pueblo grandi akí ta!”

⁷Tin un nashon, kon grandi ku e por ta, ku tin un dios ku ta serka di nan asina manera SEÑOR, nos Dios, ta? Tur ora ku nos mester di djE, E t'ei.

⁸Tin un nashon, kon grandi ku e por ta, ku tin lei i regla ku ta hustu manera henter e lei akí ku mi ta presentá na boso?

⁹Asina ta, tene mashá kuidou. Warda rekuerdo di tur loke boso mes a mira den boso kurason tanten boso ta na bida i konta boso yunan i boso ñetunan despues.

¹⁰Konta nan di e dia ku boso a para dilanti di SEÑOR, boso Dios, na Horeb, ora SEÑOR a bisa mi: “Yama e pueblo huntu pa Mi bisa nan loke Mi ke bisa nan. Mi ke pa nan tin rèspèt di Mi henter nan bida largu i pa nan siña nan yunan pa nan tambe tin rèspèt di Mi.”

¹¹Boso a yega serka i boso a para na pia di e seru ku tabata na kandela; e vlamnan tabata yega te na shelu. E tabata rondoná pa skuridat i nubia pretu.

¹²E ora ei SEÑOR, boso Dios, a papia ku boso for di den e kandela; boso por a tend'É papia, pero boso no por a mir'É. Ta su stèm so boso tabata tende.

¹³El a anunsiá boso loke ta stipulá den e aliansa ku El a ordená boso pa kumpli kuné, esta e dies mandamentunan ku El a skibi riba dos tabla di piedra.

¹⁴I SEÑOR a ordená mi pa siña boso e leinan i e reglanan, pa boso kumpli ku nan na e pais ku boso ta bai tuma pa boso.

¹⁵Dia SEÑOR for di riba seru di Horeb a papia ku boso for di den kandela, boso no a mira ningun figura. P'esei tene mashá kuidou,

¹⁶pa boso no kai den pèrdishon, traha imágen den ki forma ku ta. Sea ta imágen den forma di un hòmber òf den forma di un muhé,

¹⁷òf den forma di un bestia di riba tera, òf di un para di den laria,

¹⁸òf di un bestia ku ta lastra abou òf di un piská den awa bou di tera.

¹⁹Ora boso hisa kara wak shelu i boso mira tur e astronan: solo, luna i strea, no kai den pèrdishon hinka rudia adorá nan, pasobra SEÑOR, boso Dios, a duna nan na tur nashon di mundu.

²⁰Pero boso, SEÑOR a saka for di e fièrnu, Egipto, pa hasi boso su mes pueblo, su propiedat, loke boso ta te dia djawe.

²¹Pero pa boso falta SEÑOR a rabia ku mi i El a hura ku mi no ta krusa Yordan yega e tera bunita ku SEÑOR, boso Dios, ta duna boso komo propiedat.

²²Ke men, lo mi muri na e banda akí di Yordan, boso sí lo krus'é i tuma e pais pa boso.

²³Tene mashá kuidou pa boso no lubidá e aliansa ku SEÑOR, boso Dios, a sera ku boso i bai traha imágen, den ki forma ku ta, di algu ku SEÑOR, boso Dios, a prohibí boso.

²⁴Pasobra ira di SEÑOR, boso Dios, lo ta mas insoportabel ku kandela. E ta un Dios ku no ta tolerá niun otro dios banda di djE.

²⁵Ora boso haña yu i boso haña ñetu i boso kustumbrá den e pais, no kai den pèrdishon traha imágen di ki forma ku ta. E ora ei boso ta hasi loke ta malu den bista di SEÑOR i boso ta proboká ira di SEÑOR.

²⁶Awe mi ta yama shelu i tera pa nan para komo testigu kontra boso ku e ora ei sigur boso lo disparsé for di den e pais ku boso a tuma pa boso, despues di a krusa Yordan; boso lo no biba einan hopi tempu pasobra kaba ta kaba ku boso sigur.

²⁷SEÑOR lo plama boso for di otro, hiba boso nashon straño; ta dos pipita di hende so lo sobrebibí aya.

²⁸Aya boso lo mester adorá dios ku hende a traha, imágen di palu i di piedra; nan no por mira ni tende, ni kome ni hole.

²⁹Aya boso lo buska SEÑOR, boso Dios. Si boso busk'É ku henter boso alma i ku henter boso kurason, boso lo hañ'É.

³⁰Ora boso ta den apuro, pasobra e kosnan akí ta pasa boso, e ora ei boso lo bolbe serka SEÑOR, boso Dios, i obedes'É.

³¹Pasobra SEÑOR, boso Dios, ta un Dios mizerikordioso. E no ta laga boso na kaya, ni lo E no kaba ku boso. Lo E aten'É na e promesa ku El a hasi boso antepasadonan, dia El a sera e aliansa ku nan.

³²Studia pasado, kuminsá ku e dia ku Dios a krea e promé hende na mundu. Sondia henter mundu di ost pa wèst: Nunka algu asina a yega di sosodé? Nunka niun hende a yega di tende di algu asombroso asina?

³³Nunka tabatin un pueblo ku a tende Dios papia for di den kandela i tòg a keda na bida?

³⁴Nunka tabatin un dios ku a tribi libra un pueblo for di un otro pueblo i hasi e pueblo ei su pueblo, manera SEÑOR, boso Dios, a hasi pa boso na Egipto. Ku boso mes wowo boso a mira kon El a trese desaster, señal, milager i guera; kon El a aktua ku man fuerte i ku man poderoso di manera ku e hendenan a spanta hopi.

³⁵Boso a haña e kosnan akí mira, pa pone boso rekonosé ku SEÑOR so ta Dios.

³⁶For di shelu su stèm a zona pa instruí boso. Na tera El a mustra boso e kandela grandi i for di e kandela ei boso a tend'É papia.

³⁷Pasobra El a stima boso antepasadonan i a skohe nan desendientenan, E mes a saka boso ku gran poder for di Egipto.

³⁸El a kore ku e nashonnan mas grandi i mas fuerte ku boso pa hiba boso nan pais i duna boso e pais komo propiedat, manera ta te dia djawe.

³⁹P'esei rekonosé awe i graba den boso kurason ku SEÑOR so ta Dios, ayariba den shelu i akibou na tera; no tin otro dios.

⁴⁰Kumpli ku su leinan i su mandamentunan, ku mi ta ordená boso, pa bai boso i boso desendientenan bon i pa boso biba hopi tempu den e pais ku SEÑOR, boso Dios, ta duna boso pa semper.’

⁴¹Moises a skohe tres siudat na parti ost di Yordan,

⁴²kaminda un hende ku mata un otro hende sin e por yuda i sin ku tabatin enemistat entre nan, por hui bai. E por keda na bida si e hui bai den un di e siudatnan akí:

⁴³Bèsèr den desierto, den region di sabana, pa tribu di Ruben, Ramot na Guilead pa tribu di Gad i Golan na Bashan pa tribu di Manase.

⁴⁴Aki ta sigui e lei ku Moises a duna e israelitanan.

⁴⁵Huntu ku e stipulashonnan di e aliansa e ta kontené e leinan i e reglanan ku Moises a preskribí e israelitanan durante nan biahe for di Egipto.

⁴⁶Moises a anunsiá nan na e otro banda di Yordan, den e vaye dilanti di Bet-Peor, den pais di Sihon, rei di e amoritanan, ku tabata biba na Hèshbon. E rei akí Moises i e israelitanan a derotá durante nan biahe for di Egipto i

⁴⁷nan a kita tantu su pais komo esun di Og, rei di Bashan. Sihon i Og tabata e dos reinan amorita ku tabata goberná na parti ost di Yordan:

⁴⁸Nan region tabata kore for di e siudat Aroer na riu Arnon te na seru di Sirion — esta Hermon —

⁴⁹inkluso henter e vaye na parti ost di Yordan, i te na Laman Morto na zùit, te na pia di e serunan di Pisga.