Read Papiamento Huan 14 Bible Online

Huan 14 - Papiamento bible

Huan 14

¹No bira sobresaltá; boso ta kere den Dios, kere den Mi.

²Den kas di mi Tata tin hopi lugá; Mi ta bai prepará un lugá pa boso. Si no tabata asina, lo Mi no a bisa boso.[17]

³Despues di prepará un lugá pa boso, Mi ta bolbe bini i tuma boso serka Mi pa boso ta kaminda Mi ta.

⁴Boso konosé e kaminda ku ta kondusí na e lugá ku Mi ta bai.’

⁵Tomas a bis'É: ‘Señor, nos no sa unda Bo ta bai; kon nos por konosé e kaminda pa yega aya?’

⁶Hesus a kontest'é: ‘Ami ta e kaminda, bèrdat i bida; niun hende no por yega serka Tata, si no ta pa medio di Mi.

⁷Si boso a siña konosé Mi, boso konosé mi Tata tambe. For di awor boso konosé Tata i boso a mir'É.’

⁸Filipo a bis'É: ‘Señor, mustra nos Tata; esei ta sufisiente pa nos.’

⁹Hesus a bis'é: ‘Mi tin asina tantu tempu huntu ku boso i bo no konosé Mi ainda, Filipo? Esun ku mira Mi, a mira Tata. Pakiko bo ta pidi antó pa Mi mustra boso Tata?

¹⁰Bo no ta kere ku Mi ta den Tata i Tata ta den Mi? Mi palabranan na boso no ta di Mi mes; ta Tata ta den Mi, ta hasi su mes trabou.

¹¹Kere Mi ora Mi bisa: Mi ta den Tata i Tata ta den Mi; òf a lo ménos kere pa motibu di mi obranan antó.

¹²Mi ta sigurá boso: esun ku kere den Mi, tambe lo hasi e obranan ku Mi a hasi i asta obra mas grandi ainda, pasobra Ami ta bai serka Tata.

¹³Kiko ku boso pidi den mi nòmber lo Mi hasi, ya asin'ei e Yu ta mustra gloria di Tata.

¹⁴Kiko ku boso pidi Mi den mi nòmber, Mi ta hasi.

¹⁵Si boso ta stima Mi, boso lo warda mi mandamentunan.

¹⁶Lo Mi pidi Tata i lo E manda un otro pa yuda boso, ku lo keda pa semper huntu ku boso.

¹⁷E ta e Spiritu di bèrdat, ku mundu no por risibí; pasobra nan no ta mir'É nan no konos'É. Ma boso konos'É, pasobra E ta keda serka boso i lo ta den boso.

¹⁸Lo Mi no laga boso manera wérfano; Mi ta regresá serka boso.

¹⁹Djis poko tempu mas i mundu no ta mira Mi, ma boso sí lo mira Mi. Pasobra Mi ta biba, boso tambe lo biba.

²⁰Ora e dia ei yega, boso lo sa ku Ami ta den Tata i ku boso ta den Mi, meskos ku Ami ta den boso.

²¹Esun ku aseptá mi mandamentunan i obedesé nan, ta stima Mi. Mi Tata ta stima esun ku stima Mi i Mi tambe lo stim'é i mustr'é ken Mi ta.’

²²Hudas, no Hudas Iskariot, a bisa: ‘Señor, kon bini Bo ta mustra nos ken Bo ta i Bo no ta mustra e hendenan ku no konosé Dios, ken Bo ta?’

²³Hesus a kontest'é: ‘Si un hende ta stima Mi, e ta obedesé mi palabra i mi Tata lo stim'é; nos lo bini serka dje i keda biba serka dje.

²⁴Esun ku no ta stima Mi, no ta obedesé mi palabranan. I e palabranan ku boso a tende, no ta di Mi, ma di mi Tata ku a manda Mi.

²⁵Mi ta papia e kosnan akí ku boso miéntras Mi ta huntu ku boso.

²⁶Pero esun ku lo yuda boso, esta Spiritu Santu ku Tata lo manda den mi nòmber, lo siña boso tur kos i rekordá boso tur loke Ami a bisa boso.

²⁷Pas Mi ta laga pa boso; mi pas Mi ta duna boso, ma no manera mundu ta deseá otro pas ora nan ta kumindá otro. No laga boso kurason bira intrankil, ni no kobardiá.

²⁸Boso a tende Mi bisa ku Mi ta bai, ma ku Mi ta bini bèk serka boso. Si boso ta stima Mi, boso lo ta kontentu ku Mi ta bai serka mi Tata, pasobra E ta mas importante ku Mi.

²⁹Mi ta bisa boso esaki promé ku e sosodé, ya boso ta kere ora e sosodé.

³⁰Mi no por sigui papia muchu mas ku boso, pasobra gobernadó di e mundu akí ta na kaminda. E no tin poder riba Mi,

³¹ma mundu mester sa ku Mi ta stima Tata i ku Tata ta stima Mi i ku Mi ta hasi loke Tata manda Mi hasi. Bon, lanta ariba, ban fo'i djaki!