Read Papiamento Huan 15 Bible Online

Huan 15 - Papiamento bible

Huan 15

¹Ami ta e mata di wendrùif berdadero i mi Tata ta e vitó.

²E ta kita tur taki fo'i Mi ku no ta karga fruta, i E ta snui tur taki ku sí ta karga fruta, pa nan karga mas fruta ainda.

³Ya boso ta puru kaba, pa medio di e palabra ku Mi a papia ku boso.

⁴Keda den Mi i Ami lo keda den boso. Un taki no por duna fruta di su mes, sin ku e ta pegá na e mata. Meskos asin'ei boso no por karga fruta si boso no keda den Mi.

⁵Ami ta e mata di wendrùif; boso ta e takinan. Esun ku keda den Mi i Ami den dje, lo karga hopi fruta, pasobra boso no por hasi nada sin Mi.

⁶Esun ku no keda den Mi ta tira ta tir'é afó manera un taki i e ta para seka; ta hunta e takinan ei, tira nan den kandela i kima nan.

⁷Si boso keda den Mi i mi palabranan keda den boso, pidi e ora ei loke boso ke i boso ta hañ'é.

⁸Ora boso karga hopi fruta, Tata ta haña gloria i boso ta mi disipel.

⁹Meskos ku mi Tata ta stima Mi, asina Mi ta stima boso; keda den mi amor.

¹⁰Si boso obedesé mi mandamentunan, boso ta keda den mi amor. Meskos ku Ami ta obedesé e mandamentunan di mi Tata i ta keda den su amor.

¹¹Mi a bisa e kosnan akí pa mi legria por ta den boso i boso legria por ta kompleto.

¹²Esaki ta mi mandamentu: stima otro, manera Ami a stima boso.

¹³E amor di mas grandi ku un hende por tin pa su amigunan ta di entregá su bida pa nan.

¹⁴Boso ta mi amigu, si boso hasi loke Mi manda boso.

¹⁵Mi no ta yama boso sirbidó mas, pasobra un sirbidó no sa kiko su shon ta hasi. Ma Mi ta yama boso amigu, pasobra Mi a laga boso sa tur kos ku Mi a tende di mi Tata.

¹⁶No ta boso a skohe Mi, ma ta Ami a skohe boso i Mi a apuntá boso pa bai i karga hopi fruta; fruta ku ta keda. Loke boso pidi Tata den mi nòmber, E ta duna boso.

¹⁷Esaki antó ta loke Mi ta manda boso hasi: stima otro.

¹⁸Si mundu odia boso, sa ku el a odia Ami promé.

¹⁹Si boso tabata pertenesé na e mundu akí, mundu lo a stima boso manera e ta stima esnan ku ta pertenesé n'e. Pero boso no ta di mundu: Ami a skohe boso for di mundu i ta p'esei hende sin Dios ta odia boso.

²⁰Kòrda kiko Mi a bisa boso: un sirbidó no ta mas importante ku su shon; si nan a persiguí Mi, nan lo persiguí boso tambe. Si nan a obedesé mi siñansa, nan lo obedesé di boso tambe.

²¹Ma nan lo hasi tur e kosnan akí ku boso pa mi motibu, pasobra nan no konosé Esun ku a manda Mi.

²²Si Mi no a bin papia ku nan, nan lo no tabata kulpabel di piká. Awor nan no tin niun eksküs pa nan piká.

²³Esun ku odia Mi, ta odia mi Tata tambe.

²⁴Si Mi no a hasi e obranan ku niun hende no a yega di hasi nunka entre nan, nan lo no tabatin kulpa di piká. Pero ounke nan a mira awor loke Mi a hasi, tòg nan ta odia tantu Ami komo mi Tata.

²⁵Esaki a sosodé pa asina loke ta skibí den nan mes lei keda kumplí: “Nan a odia Mi sin motibu.”

²⁶Esun ku ta yuda boso, lo bini; E ta e Spiritu di bèrdat ku ta bini di Tata. Ami lo mand'É pa boso i lo E testiguá na mi fabor.

²⁷Boso tambe mester testiguá, pasobra boso tabata huntu ku Mi for di kuminsamentu.