Read Papiamento Huan 16 Bible Online

Huan 16 - Papiamento bible

Huan 16

¹Mi a bisa boso e kosnan akí pa boso fe no tambaliá.

²Nan lo ekspulsá boso for di snoa i sí, lo bini un tempu ku ken ku mata boso, ta pensa ku e ta sirbi Dios di e forma ei.

³Nan lo hasi asina, pasobra nan no a konosé ni Tata ni Ami.

⁴Ma Mi a bisa boso e kosnan akí pa ora e momento yega, boso kòrda loke Mi a bisa. Mi no a bisa boso e kosnan akí for di kuminsamentu, pasobra Mi tabata huntu ku boso.

⁵Pero awor Mi ta bai serka Esun ku a manda Mi i niun di boso no ta puntra Mi unda Mi ta bai.

⁶Awor ku Mi a bisa boso, boso kurason ta yen di tristesa.

⁷Ma Mi ta sigurá boso: ta kumbiní boso ku Mi ta bai, pasobra si Mi no bai, Esun ku ta yuda boso no ta bini serka boso. Ora Mi bai, Mi ta mand'É pa boso.

⁸Ora E bini, lo e konvensé e hendenan di mundu di kiko ta piká, hustisia i huisio.

⁹Di nan piká, pasobra nan no a kere den Mi;

¹⁰di nan hustisia ku no ta sirbi, pasobra Mi ta bai serka mi Tata i boso lo no mira Mi mas;

¹¹i di nan huisio, pasobra gobernadó di e mundu akí ta husgá kaba.

¹²Mi tin hopi kos mas di bisa boso, ma boso lo no por soportá nan awor akí.

¹³Ma ora e Spiritu di bèrdat bini, lo E guia boso na bèrdat kompleto i konta boso tokante kos ku ta bai pasa. Pasobra loke E bisa no ta sali di E mes, ma E ta papia tur loke E tende.

¹⁴Lo E duna Mi gloria, pasobra loke E konta boso E ta haña sa di Mi.

¹⁵Tur loke Tata tin ta di Mi; p'esei mes Mi a bisa boso ku loke Spiritu Santu papia E ta hañ'É di Mi.

¹⁶Aki poko tempu boso no ta mira Mi mas; ma despues di un tempu kòrtiku boso lo mira Mi atrobe.’

¹⁷P'esei algun di su disipelnan a puntra otro: ‘Kiko E ke bisa nos ku “aki poko tempu boso no ta mira Mi mas, ma despues di un tempu kòrtiku boso lo mira Mi atrobe” i tambe ku “pasobra Mi ta bai serka mi Tata?” ’

¹⁸Nan tabata puntra otro: ‘Kiko E ke men ku “un poko tempu”? Nos no ta komprondé ta kiko E ta papia!’

¹⁹Hesus a komprondé ku nan ker a pidiÉ un splikashon i El a bisa nan: ‘Boso ta buska nifikashon di “Aki poko tempu boso no ta mira Mi mas; ma despues di un tempu kòrtiku boso lo mira Mi atrobe.”

²⁰Mi ta sigurá boso: boso lo lamentá den un mundu ku lo gosa. Ma ounke boso lo ta tristu, boso tristesa lo kambia den legria.

²¹Ora un muhé ta bai duna lus, e ta tristu, pasobra e ora a yega, ma unabes ku e yu a nase, e no ta pensa mas riba e ansha ku el a pasa aden. Asina kontentu e ta ku un hende a bini na mundu!

²²Meskos asina boso tambe ta pasa un tempu difísil awor akí, ma lo Mi bolbe mira boso i boso kurason lo yena ku alegria, un alegria ku niun hende no por kita for di boso.

²³E dia ei boso lo no pidi Mi niun splikashon mas. Mi ta sigurá boso: Tata lo duna boso kiko ku boso pidiÉ den mi nòmber.

²⁴Te ainda boso no a pidi nada den mi nòmber; pidi i boso lo haña, ya asina boso legria lo ta kompleto.

²⁵Mi a usa parábola pa konta boso e kosnan akí; e ora lo yega ku Mi no ta papia asina mas, ma ku Mi ta papia bon kla tokante Tata.

²⁶E dia ei boso lo kuminsá pidi Tata den mi nòmber. Esei no ke men ku t'Ami lo mester pidi Tata pa boso.

²⁷Pasobra Tata mes ta stima boso, ya ku boso a stima Mi i a kere ku Mi a bini di Dios.

²⁸Mi a bini di Tata i Mi a bini na mundu; awor Mi ta bai laga mundu i Mi ta bai serka Tata.’

²⁹Su disipelnan a bisa: ‘Awor Bo ta papia kla i no den parábola!

³⁰Awor nos sa ku Bo sa tur kos i ku no ta na nodi pa niun hende pidi Bo splikashon. Esaki ta pone nos kere ku Bo a bini di Dios.’

³¹Hesus a kontestá nan: ‘Awor boso ta kere!

³²Mira, e ora ta yega, sí el a yega kaba, ku lo plama boso for di otro, kada hende den direkshon di su mes kas i boso lo laga Mi so. Ma Mi no ta Mi so, pasobra Tata ta huntu ku Mi.

³³Mi a bisa boso tur e kosnan akí pa boso tin pas den Mi. Na mundu boso lo pasa den tribulashon; ma tuma kurashi, Ami a derotá mundu!’