Read Papiamento Huan 4 Bible Online

Huan 4 - Papiamento bible

Huan 4

¹E fariseonan a tende ku Hesus tabata haña i batisá mas disipel ku Huan.

²Ounke en realidat no tabata Hesus mes tabata batisá hende, ma su disipelnan.

³Ora Hesus a haña sa loke a yega na orea di e fariseonan, El a sali for di Hudea i regresá Galilea.

⁴Pa yega Galilea e mester a pasa via Samaria.

⁵Na Samaria El a yega un siudat ku yama Sikar, ku ta keda serka di e fèlt ku Yakob a duna su yu Jozef.

⁶Ei tabatin e pos di Yakob i Hesus ku tabata kansá di biaha, a kai sinta banda di e pos; tabata banda di diesdos or di mèrdia.

⁷Un muhé samaritano a bin saka awa i Hesus a bis'é: ‘Duna Mi un tiki awa di bebe.’

⁸Ta asina ku Hesus su disipelnan a drenta siudat pa bai kumpra kuminda.

⁹E muhé a kontestá Hesus: ‘Bo ta hudiu i ami ta samaritano, ta kon bo por pidi mi kohe awa pa bo bebe?’ T'asina ku hudiu i samaritano no tabata parti un pan ku otro![6]

¹⁰Hesus a kontestá e muhé: ‘Si bo tabata konosé e don ku Dios ta duna i tabata sa ken ta pidi bo un poko awa pa bebe, abo lo a pidiÉ awa i lo El a duna bo awa ku ta duna bida!’

¹¹E muhé a rospondé: ‘Shon, bo no tin hèmber i e pos ta hundu. Di unda bo ta saka e awa ei ku ta duna bida antó?

¹²Ta nos tata Yakob a duna nos e pos akí; tantu e mes i su yunan, komo su bestianan di kria a bebe for di dje. Akaso bo ta pretendé di ta mas ku Yakob?’

¹³Hesus a kontestá: ‘Ken ku bebe for di e awa akí ta bolbe haña set,

¹⁴ma es ku bebe for di e awa ku Ami dun'é, lo no haña set nunka mas. E awa ku Ami dun'é lo bira manera un fuente di awa ku ta brota i kore pa duna bida eterno.’

¹⁵E ora ei e muhé a bis'É: ‘Señor, duna mi e awa ei! Ya mi no ta haña set ni mi no tin nodi di bin kohe awa aki mas.’

¹⁶Hesus a bisa e muhé: ‘Bai yama bo kasá i bini bèk aki.’

¹⁷El a kontestá Hesus: ‘Mi no tin kasá.’ E ora ei Hesus a sigui bis'é: ‘Ku rason bo ta bisa ku bo no tin kasá.

¹⁸Pasobra bo tabatin sinku hòmber i esun ku bo tin awor akí, no ta bo kasá. Bo a papia bèrdat!’

¹⁹E muhé a kontestá: ‘Shon, mi ta mira ku bo ta un profeta.

²⁰Nos antepasadonan a adorá Dios riba e seru akí, ma boso ku ta hudiu ta bisa ku Herusalèm ta e úniko lugá, kaminda mester adorá Dios.’

²¹Hesus a bis'é: ‘Kere Mi, señora, e ora ta yega ku boso lo no adorá Tata ni riba e seru akí ni na Herusalèm.

²²Boso ku ta samaritano ta adorá Dios sin sa ken E ta. Nos ku ta hudiu ta adorá loke nos konosé, pasobra ta di e hudiunan salbashon ta bini.

²³Ma e ora ta serka di yega, sí, el a yega awor akí kaba, ku e hendenan ku ta adorá Dios di bèrdè, lo ador'É den spiritu i bèrdat. Pasobra Tata ta buska hende asina pa ador'É.

²⁴Dios ta spiritu; p'esei esnan ku ta ador'É mester hasié den Spiritu i bèrdat.’

²⁵E muhé a bis'É: ‘Mi sa ku e Mesias, esun ku nan ta yama “Kristu”, mester bini. I ora e bini, lo e splika nos tur kos.’

²⁶E ora ei Hesus a bis'é: ‘T'Ami, ku ta papiando ku bo, t'É!’

²⁷Na e momento ei e disipelnan di Hesus a yega i nan a keda asombrá ku E tabata papia ku un hende muhé. Sinembargo niun di nan no a puntra Hesus: ‘Kiko Bo ke di dje?’ òf ‘Pakiko Bo ta papia kuné?’

²⁸E muhé a laga su tinashi atras i kita bai. El a drenta siudat i bisa e hendenan:

²⁹‘Bin mira un hòmber ku a bisa mi tur kos ku mi a yega di hasi! Por ta t'é ta e Mesias?’

³⁰E hendenan a sali for di siudat pa bai serka Hesus.

³¹Mientrastantu e disipelnan tabata roga Hesus: ‘Rabi, kome algu.’

³²El a kontestá nan: ‘Mi tin un kuminda di kome ku boso no konosé.’

³³E ora ei e disipelnan a puntra otro: ‘Ken por a trese kuminda pa E kome?’

³⁴Ma Hesus a bisa nan: ‘Mi kuminda ta: kumpli ku boluntat di Esun ku a manda Mi i kompletá e trabou ku El a enkargá Mi.

³⁵Boso mes no sa bisa: “Ta falta kuater luna so pa ta tempu di kosecha.” Wèl, Ami ta bisa boso: Hisa kara wak e kunukunan; nan ta kla pa kosechá kaba!

³⁶Ya esun ku ta kosechá ta haña su pago i e ta huntando e kosecha, destiná pa bida eterno. Di e manera ei esun ku ta sembra i esun ku ta kosechá ta kontentu huntu!

³⁷Pasobra e dicho: “Un ta sembra i otro ta kosechá” ta palabra bèrdat.

³⁸Mi a manda boso kosechá loke boso no a traha duru p'e; boso ta benefisiá di otro hende su trabou.’

³⁹Den e siudat ei hopi samaritano a pone nan fe den Hesus, pasobra e muhé a testiguá: ‘El a bisa mi tur kos ku mi a yega di hasi!’

⁴⁰P'esei ora e samaritanonan a bai serka djE, nan a rog'É pa keda serka nan. I Hesus a keda dos dia.

⁴¹Hopi hende mas a kere den djE ora nan a tende su mensahe i

⁴²nan a bisa e muhé: ‘Nos no ta kere mas a base di loke nos a tende di bo, awor nos mes a tend'É i nos sa ku enberdat E ta e salbador di mundu!’

⁴³Despues di a pasa dos dia na Samaria, Hesus a sali bai Galilea.

⁴⁴Ora El a yega Galilea, e hendenan a risibiÉ bon, djis pasobra nan a mira tur loke El a hasi dia nan mes a bai fiesta di Pésag na Herusalèm. Ta manera Hesus mes a yega di bisa: ‘Un profeta no ta haña honor den su mes pais.’

⁴⁵

⁴⁶Asina Hesus a bolbe yega Kana na Galilea, kaminda El a yega di kambia awa den biña. Aya tabatin un ofisial di gobièrnu, ku tabatin un yu malu na Kafárnao.

⁴⁷Ora el a tende ku Hesus a bini Galilea bèk for di Hudea, el a bai serka djE i rog'É pa bai Kafárnao kuné, pa kura su yu ku tabata serka di muri.

⁴⁸Hesus a bis'é: ‘Boso, galileo, no ke kere si boso no haña señal milagroso mira!’

⁴⁹E ofisial a bis'É: ‘Señor, ban ku mi promé mi yu muri!’

⁵⁰E ora ei Hesus a bis'é: ‘Bai numa, bo yu ta biba.’ E hòmber a kere loke Hesus a bis'é i el a bai.

⁵¹Na kaminda pa kas, su kriánan a bin kontr'é i bis'é: ‘Bo yu ta bibu!’

⁵²E ofisial a informá ta ki ora e yu su kurpa a drecha i nan a kontest'é: ‘Su keintura a bai banda di un or di mèrdia.’

⁵³E tata tabata sa ku ta e ora ei Hesus a bis'é: ‘Bo yu ta biba!’ Asina e i henter su famia a kere den Hesus.

⁵⁴Esaki tabata e di dos señal milagroso ku Hesus a hasi, ora El a regresá Galilea for di Hudea.