Read Papiamento Huan 5 Bible Online

Huan 5 - Papiamento bible

Huan 5

¹Despues Hesus a bai Herusalèm komo aya tabatin un fiesta religioso di hudiu.

²Ei, serka di Porta di Karné tabatin un tanki di awa ku na arameo yama Betesda. E tanki di awa tabatin sinku galeria ku pilá.

³Entre e pilánan tabatin hopi hende malu, drumí abou; tabatin hende siegu, lam i mankaron. [Nan tabata warda e awa move,

⁴pasobra tempu tempu tabatin un angel di Señor ta baha den e tanki di awa i pone e awa move. E ora ei e promé hende malu ku baha den e tanki di awa, asina e awa move, tabata kura di kualke malesa ku e por tabatin.]

⁵Un hòmber ku tabatin 38 aña malu kaba, tambe tabat'ei.

⁶Hesus a mir'é drumí ei bou i E tabata sa ku e hòmber tabata malu pa hopi tempu kaba; p'esei El a bis'é: ‘Bo ke bira bon?’

⁷E hòmber a kontest'É: ‘Shon, mi no tin niun hende pa hinka mi den awa ora e move; ora mi bai pa baha aden, ya otro hende a baha aden promé ku mi.’

⁸E ora ei Hesus a bis'é: ‘Lanta kohe bo dragbar i kana numa!’

⁹Mesora e hòmber a bira bon, kohe su dragbar i kuminsá kana. E kura a tuma lugá riba sabat;

¹⁰p'esei e outoridatnan hudiu a bisa e hòmber ku a kura: ‘Awe ta sabat, no ta pèrmití pa bo karga bo dragbar.’

¹¹E hòmber a rospondé: ‘T'esun ku a kura mi, a bisa mi kohe mi dragbar i kana.’

¹²Nan a puntr'é: ‘Ken a manda bo hasi esei?’

¹³Ma e hòmber ku a kura no tabata sa ta ken, pasobra tabatin un multitut grandi ei i Hesus a kita bai.

¹⁴Despues Hesus a topa e hòmber den tèmpel i a bis'é: ‘Tende, bo a keda bon awor; mira pa bo no sigui den piká, sino algu pió ta pasa ku bo!’

¹⁵E ora ei e hòmber a bai bisa e outoridatnan hudiu ku ta Hesus tabata esun ku a kur'é.

¹⁶Nan a kuminsá persiguí Hesus, pasobra E tabata hasi e tipo di kos ei riba sabat.

¹⁷Hesus a defendé su kurpa i bisa: ‘Te awor mi Tata ta traha kontinuamente i Ami tambe mester hasi mi trabou.’

¹⁸Loke Hesus a bisa, a pone outoridat hudiu bira mas determiná ainda pa mat'É; pasobra Hesus no a kibra ku lei di sabat so, ma tambe El a bisa aserka ku Dios ta su Tata. Pues El a hasi su mes igual na Dios.

¹⁹P'esei Hesus a tuma palabra i sigui bisa nan: ‘Mi ta sigurá boso: Yu no por hasi nada riba su mes; E ta hasi solamente loke El a mira su Tata hasi. Loke Tata hasi, e Yu tambe ta hasi.

²⁰Pasobra Tata ta stima su Yu i E ta mustr'É tur kos ku E mes, ku ta Tata, ta hasi. Lo E mustra su Yu kos mas grandi ainda pa E laga boso keda asombrá.

²¹Meskos ku Tata ta lanta morto duna nan bida, asin'ei tambe su Yu ta duna esun ku E ke bida.

²²E Yu tin outoridat, pasobra Tata mes no ta husga niun hende, ma El a entregá tur huisio den man di su Yu.

²³Ya asina tur hende ta honra e Yu, manera nan ta honra Tata. Es ku no ta honra e Yu no ta honra Tata ku a mand'É tampoko.’

²⁴Hesus a sigui bisa nan: ‘Mi ta sigurá boso: esun ku skucha Mi i pone su fe den Esun ku a manda Mi, tin bida eterno. El a pasa di morto pa bida kaba; lo no konden'é.

²⁵Mi ta sigurá boso: e ora lo yega, sí, el a yega kaba, ku esnan ku ta morto lo skucha stèm di Yu di Dios i esnan ku tende di djE, lo haña bida!

²⁶Pasobra meskos ku Tata ta fuente di bida, asin'ei tambe El a hasi su Yu fuente di bida.

²⁷El a duna su Yu poder pa husga, pasobra t'E ta Yu di hende.

²⁸No keda asombrá pa loke Mi ta bisa; pasobra ta yega e ora ku tur ku ta morto den graf lo skucha su stèm

²⁹i nan lo sali. Esnan ku a hasi bon, lo lanta for di morto i haña bida eterno, ma esnan ku a hasi maldat lo lanta for di morto pa risibí kondenashon.

³⁰Ami no por hasi nada riba Mi mes; Mi ta husga manera Dios bisa Mi pa husga i mi sentensia ta hustu. Pasobra Mi no ta buska moda di hasi mi mes boluntat, ma boluntat di Esun ku a manda Mi.’

³¹Hesus a sigui bisa nan: ‘Si Mi so testiguá na mi mes fabor, mi testimonio no ta bèrdat.

³²Ma tin un otro ku ta testiguá na mi fabor i Ami sa ku loke E ta bisa di Mi ta bèrdat.

³³Awor boso a manda hende serka Huan i Huan a testiguá loke ta bèrdat.

³⁴No ku Mi ta aseptá testimonio di hende, ma Mi ta papia e kosnan akí pa boso haña salbashon.

³⁵Huan tabata manera un lampi sendé ku ta bria i boso tabata dispuesto pa gosa djis un tiki so di su lus.

³⁶Sinembargo Ami tin un testigu muchu mas importante ku Huan. Pasobra ta e trabounan ku mi Tata a duna Mi pa hasi ta testiguá ku Tata a manda Mi.

³⁷I mi Tata mes, ku a manda Mi, a testiguá na mi fabor, ma boso no a yega di tende su stèm nunka ni boso no a mira su kara,

³⁸ni boso no ta warda su palabra den boso kurason, pasobra boso ta nenga di pone boso fe den Esun ku El a manda.

³⁹Boso ta skrudiñá Skritura kere ku den nan boso por haña bida eterno. Anto ta di Ami mes Skritura ta papia!

⁴⁰Ma boso no ta dispuesto pa bini serka Mi pa boso haña bida.

⁴¹Mi no ta aseptá elogio di hende,

⁴²ma Mi sa ki tipo di hende boso ta; den boso kurason no tin amor pa Dios.

⁴³Mi a bini den nòmber di mi Tata, ma boso no ta aseptá Mi. Mare ta otro hende a bini den nan mes nòmber, e ora ei sí boso lo a aseptá nan!

⁴⁴Boso ta gusta haña elogio di otro hende, ma boso no ta buska elogio di e úniko Dios; wèl ta kon boso por kere Mi antó?

⁴⁵No pensa ku ta Ami ta bai akusá boso dilanti di mi Tata. Ta Moises lo akusá boso, e mesun Moises den ken boso a pone boso speransa.

⁴⁶Pasobra si boso a kere Moises, boso lo a kere Ami tambe; ta di Mi el a skibi!

⁴⁷Si boso no ta kere loke e mes a skibi, kon boso ta kere antó loke Ami bisa?’