Read Papiamento Huan 6 Bible Online

Huan 6 - Papiamento bible

Huan 6

¹Despues Hesus a bai na banda ost di lago di Galilea, tambe yamá ‘Lago di Tiberias’.

²Un multitut grandi a siguiÉ, pasobra nan a mira e señalnan milagroso ku El a hasi ku e enfermonan.

³Hesus a subi seru kai sinta huntu ku su disipelnan.

⁵Ora Hesus a hisa kara mira un multitut grandi ta bini serka djE, El a puntra Filipo: ‘Unda nos por haña pan kumpra pa duna e hendenan akí kome?’

⁶Hesus a papia asina djis pa wak Filipo su reakshon; E mes tabata sa kaba kiko E tabata bai hasi.

⁷Filipo a kontest'É: ‘Ni maske kumpra 200 moneda di plata[7] na pan, e no ta yega pa duna tur hende ni sikiera un tiki kuminda!’

⁸Un di su disipelnan, Andreas, ruman di Simon Pedro, a bis'É:

⁹‘Tin un mucha hòmber aki ku dos piská i sinku pan di puspas, pero esei no ta sufisiente pa e hendenan akí!’

¹⁰Hesus a bisa e disipelnan: ‘Laga e hendenan sinta abou.’ Kaminda nan tabata, tabatin hopi yerba i e hendenan a kai sinta. Tabatin un kantidat di sinku mil hende hòmber.

¹¹Hesus a kohe e pannan i despues di a gradisí Dios, El a laga parti nan pa e hendenan ku tabata sintá. El a hasi meskos ku e piskánan i e hendenan por a kohe kuantu ku nan tabata ke.

¹²Ora e hendenan a kome barika yen, Hesus a bisa su disipelnan: ‘Kohe e pidanan ku a sobra pa nada no bai dispidí.’

¹³Nan a rekohé loke a sobra di e sinku pannan di trigo, despues ku e hendenan a kome, i yena diesdos makutu.

¹⁴Ora e hendenan a mira e señal milagroso ku a tuma lugá, nan a bisa: ‘Enberdat, t'e hòmber akí ta e profeta ku mester a bini na mundu!’

¹⁵Hesus tabata sa ku nan tabatin intenshon di koh'É violentamente bai kunÉ pa hasiÉ rei. P'esei El a retirá atrobe den seru; El a keda e so.

¹⁶Ora solo a baha e disipelnan di Hesus a baha bai kantu di lago.

¹⁷Nan a drenta boto krusa e lago bai den direkshon di Kafárnao. Mientrastantu a bira skur i te ainda Hesus no a bini serka nan.

¹⁸Tabata supla un bientu fuerte tambe ku tabata hasi e awa brutu.

¹⁹Ora nan a rema te na un distansia di sinku pa seis kilometer, nan a mira Hesus ta kana riba laman i E tabata bini ora pa ora mas serka di e boto; nan a spanta.

²⁰Ma Hesus a bisa nan: ‘T'Ami, no spanta!’

²¹E ora ei nan tabata dispuesto pa laga Hesus drenta nan boto i inmediatamente despues e boto a yega tera na su destino.

²²Su manisé e multitut ku a keda na otro banda di e lago, kaminda Hesus tabata promé, a kòrda ku ta un boto so nan a mira e dia anterior. Tambe nan a ripará ku Hesus no a djòin e disipelnan den e boto ei, ma ku nan a bai sin djE.

²³Ma tabatin otro boto di e pueblo Tiberias ku a yega tera serka di e lugá kaminda e hendenan a kome pan despues ku Señor a gradisí Dios.

²⁴Ora e hendenan a ripará ku ni Hesus ni su disipelnan no tabat'ei mas, nan a drenta e botonan ei bai Kafárnao bai busk'É.

²⁵Ora nan a hañ'É na e otro banda di e lago, nan a puntr'É: ‘Rabi, fo'i ki ora bo t'aki?’

²⁶Hesus a kontestá nan: ‘Mi ta sigurá boso: boso no ta buska Mi pasobra boso a komprondé e señalnan milagroso, ma pasobra boso a kome pan i yena boso barika.

²⁷No traha pa kuminda ku ta kaba na nada, ma pa kuminda ku ta keda i ta duna bida eterno. Esei ta loke Yu di hende ta duna boso; pasobra ta riba djE, Tata, Dios mes, a pone su seyo.’

²⁸E hendenan a rospond'É: ‘Kiko nos mester hasi pa kumpli ku e obranan ku Dios ta deseá?’

²⁹Hesus a bisa nan: ‘T'esaki ta e kos ku Dios ke pa boso hasi: pone boso fe den Esun ku El a manda!’

³⁰Nan a kontestá: ‘Kua señal milagroso bo ta bai hasi antó, pa nos mira i pa nos kere den bo? Ki obra bo ta bai hasi?

³¹Nos antepasadonan a kome mana den desierto, manera Skritura ta bisa: “El a duna nan pan for di shelu pa nan kome.” ’

³²E ora ei Hesus a sigui bisa nan: ‘Mi ta sigurá boso: No ta Moises a duna boso e pan ku ta bini for di shelu; ta mi Tata ta duna boso e pan di shelu, e pan berdadero.

³³Pasobra e pan ku Dios ta duna, ta baha for di shelu i ta duna mundu bida.’

³⁴Nan a pidiÉ: ‘Señor, duna nos e pan ei antó, awor akí i semper!’

³⁵Hesus a bisa nan: ‘T'Ami ta e pan ku ta duna bida! Esun ku bini serka Mi, lo no haña hamber nunka mas; esun ku kere den Mi, por konta ku nunka mas e no ta haña set.

³⁶Mi a bisa esei kaba, ku boso ta mira Mi i no ta kere.

³⁷Tur esnan ku Tata a duna Mi, lo bini serka Mi; i Mi no ta kore ku niun hende ku bini serka Mi.

³⁸Pasobra Mi no a baha for di shelu pa kumpli ku mi mes boluntat, ma pa kumpli ku boluntat di Esun ku a manda Mi.

³⁹Anto boluntat di Esun ku a manda Mi ta, pa Mi no laga niun di esnan ku El a duna Mi bai pèrdí, ma pa Mi lanta nan for di morto riba e último dia.

⁴⁰Pasobra ta mi Tata su boluntat pa tur ku mira su Yu i kere den djE, haña bida eterno i pa Mi mes lanta nan for di morto riba e último dia.’

⁴¹E pueblo a kuminsá murmurá kontra Hesus, pasobra El a bisa: ‘Ami ta e pan ku a baha for di shelu!’

⁴²P'esei nan tabata komentá: ‘Ma n' ta Hesus, yu di Hosé, esei? Nos no konosé su mama i su tata? Pakiko e ta pretendé anto ku el a baha for di shelu?’

⁴³Hesus a kontestá nan: ‘Basta murmurá entre boso.

⁴⁴Niun hende no por bini serka Mi, si mi Tata ku a manda Mi no hal'é serka Mi; anto Ami lo lant'é for di morto riba e último dia.

⁴⁵Ta skibí den buki di e profetanan: “Dios lo siña tur hende.” Tur ku a skucha Tata i siña di djE ta bini serka Mi.

⁴⁶No ku niun hende a yega di mira Tata; ta solamente Esun ku ta bini di Dios a mira Tata.

⁴⁷Mi ta sigurá boso: esun ku kere, tin bida eterno.

⁴⁸Ami ta e pan ku ta duna bida!

⁴⁹Boso antepasadonan a kome mana den desierto i nan a muri!

⁵⁰Ma esaki ta e pan ku ta baha for di shelu; si un hende kome for di dje, e no ta muri.

⁵¹Ami ta e pan bibu ku a baha for di shelu. Si un hende kome e pan akí, e ta biba pa semper. E pan ku Ami lo duna ta mi mes karni, ku Mi ta duna pa mundu haña bida!’

⁵²E ora ei e hendenan a kuminsá diskutí fuertemente ku otro i bisa: ‘Kon e hòmber akí por duna nos su karni kome?’

⁵³Hesus a rospondé nan: ‘Mi ta sigurá boso: si boso no kome karni di Yu di hende i bebe su sanger, boso lo no tin bida den boso.

⁵⁴Esun ku kome mi karni i bebe mi sanger tin bida eterno i Ami lo lant'é for di morto riba e último dia.

⁵⁵Pasobra mi karni ta berdadero kuminda i mi sanger ta berdadero bibida.

⁵⁶Esun ku kome mi karni i bebe mi sanger, lo keda den Mi i Ami den dje.

⁵⁷Esun ku kome Mi ta biba pa medio di Mi, pasobra Tata ku a manda Mi tin bida i Ami ta biba, pasobra E ta biba.

⁵⁸Esaki ta e pan ku a baha for di shelu; E no ta manera e pan ku boso antepasadonan a kome i despues nan a muri tòg. Esun ku kome e pan akí lo biba pa semper.’

⁵⁹Hesus a bisa tur e kosnan akí, ora E tabata siña e hendenan den snoa na Kafárnao.

⁶⁰P'esei hopi di e disipelnan ku a tende Hesus papia, a bisa: ‘E palabranan akí ta hopi duru! Ken por para skucha nan?’

⁶¹Hesus tabata sa ku nan tabata murmurá. El a bisa nan: ‘E kos akí ta ofendé boso?

⁶²Suponé ku boso mira Yu di hende subi bai bèk kaminda E tabata promé!

⁶³Loke ta duna bida ta Spiritu di Dios, naturalesa humano no por yuda ku nada. E palabranan ku Ami a papia ku boso, ta bini di Spiritu di Dios i nan ta duna bida.

⁶⁴Sinembargo tin algun di boso ku no ta kere.’ Loke ta pasa ta ku Hesus tabata sa di antemano ken ta esnan ku no ta kere i ken t'esun ku lo traishon'É.

⁶⁵El a añadí: ‘P'esei mes Mi a bisa boso ku niun hende no por bini serka Mi, si Tata no pèrmitié!’

⁶⁶Ora Hesus a papia asina, hopi di su disipelnan a bira bèk i no a sigui kana huntu kunÉ mas.

⁶⁷El a puntra e diesdos disipelnan: ‘Basta boso tambe no ke bai, no?’

⁶⁸Simon Pedro a kontestá: ‘Señor, serka ken nos tin ku bai? Abo tin e palabranan ku ta duna bida eterno!

⁶⁹Nos ta kere i nos a haña sa tambe ku Abo ta e Santu di Dios.’

⁷⁰Hesus a kontest'é: ‘N' ta Ami mes a skohe boso diesdos? Sinembargo entre boso tin un diabel!’

⁷¹Hesus tabata papia di Hudas, yu di Simon Iskariot. Pasobra Hudas, un di e diesdos disipelnan, mes lo traishon'É.