Read Papiamento Huan 7 Bible Online

Huan 7 - Papiamento bible

Huan 7

¹Despues Hesus a sigui biaha rònt Galilea. E no ker a biaha rònt Hudea, pasobra e outoridatnan hudiu tabata buska moda di mat'É.

²Awor fiesta di Ramada, un fiesta hudiu, tabata serka.

³P'esei su ruman hòmbernan a bis'É: ‘Sali for di e lugá akí bai Hudea pa bo disipelnan mira e kosnan ku bo ta hasi.

⁴Un hende ku ke ta konosí no ta tene loke e ta hasi sekreto. Ya ku bo ta hasi e kosnan akí, laga henter mundu mira ken bo ta!’

⁵Su rumannan a papia asina, pasobra nan mes no tabata kere den djE.

⁶E ora ei Hesus a bisa nan: ‘Mi tempu no a yega ainda, ma pa boso sí tempu ta hechu semper.

⁷Mundu no por odia boso, ma Ami sí e ta odia, pasobra Ami ta testiguá ku su aktonan ta malu.

⁸Bai fiesta di Ramada numa; Ami no ta bai e fiesta ei, pasobra mi tempu no a yega ainda!’

⁹I despues di a kontestá asina, El a keda Galilea.

¹⁰Despues ku Hesus su rumannan a bai fiesta di Ramada, E tambe a bai, ma den sekreto i no públikamente.

¹¹Outoridat hudiu tabata busk'É durante e fiesta; nan tabata puntra: ‘Ma ta na unda e hòmber ei ta?’

¹²Ketuketu tabatin hopi komentario riba djE den pueblo. Tin hende tabata bisa: ‘E ta un bon hende!’ i otro tabata komentá: ‘Nò, e ta kohe e hendenan kabes abou!’

¹³Sinembargo niun hende no tabata papia abiertamente di djE, pasobra nan tabatin miedu di e outoridatnan hudiu.

¹⁴Na mitar di e fiesta, Hesus a bai tèmpel kaminda E tabata siña e hendenan.

¹⁵E pueblo a keda asombrá i bisa: ‘Kon bini e hòmber akí sa tantu asina, anto e no ta studiá?’

¹⁶Hesus a kontestá nan: ‘Mi siñansa no ta bini di Mi mes, ma di Esun ku a manda Mi.

¹⁷Si un hende tin deseo di kumpli ku boluntat di Dios, e ta haña sa si loke Mi ta siña, ta di Dios òf si ta riba mi mes kuenta Mi ta papia.

¹⁸Esun ku ta papia riba su mes kuenta ta buska gloria pa su mes. Ma esun ku ta buska gloria pa esun ku a mand'é ta honesto i no tin maldat den dje.

¹⁹Moises a duna boso lei, ma niun di boso no ta obedesé e lei ei. Pakiko boso ta buska Mi pa mata?’

²⁰E multitut a kontestá: ‘Bo tin un demoño den Bo! Ken ta buska Bo pa mata?’

²¹Hesus a bisa nan: ‘Mi a hasi un milager riba sabat i boso tur a keda asombrá.

²²P'esei Moises a pone den lei ku boso mester sirkunsidá boso yu hòmbernan, ounke no ta Moises sino boso antepasadonan a kuminsá ku esei. I riba sabat tambe boso ta sirkunsidá mucha hòmber.

²³Awor si un mucha hòmber risibí sirkunsishon riba sabat pa no kibra ku lei di Moises, kon bini antó boso ta bira razu riba Mi, pasobra Mi a kura henter kurpa di un hende riba sabat?

²⁴No husga segun aparensia, ma ku hustisia.’

²⁵E ora ei algun hende di Herusalèm a bisa: ‘Ma no ta e hòmber akí nan ta buska pa mata?

²⁶At'é ta para papia públikamente, i niun hende no ta bis'é nada! No bisa mi ku e lidernan a realisá ku t'é ta e Mesias?

²⁷Pero nos sí sa di unda e hòmber akí ta bini, sinembargo ora e Mesias mes bini, niun hende lo no sa di unda E ta bini!’

²⁸P'esei miéntras Hesus tabata siña e hendenan den tèmpel, El a bisa na bos altu: ‘Sí, boso konosé Mi i sa di unda Mi ta bini. Mi no a bini riba mi mes kuenta; tin un ku a manda Mi[8] i boso no konos'É.

²⁹Ma Ami sí konos'É, pasobra Mi a bini di djE i t'E a manda Mi.’

³⁰P'esei nan a buska moda di kohe Hesus prezu, ma niun hende no por a pone man riba djE, pasobra su ora no a yega ainda.

³¹Hopi hende den e multitut a kere den djE; nan a bisa: ‘Akaso e Mesias, ora e bini, lo por hasi mas señal milagroso ku e hòmber akí a hasi?’

³²E fariseonan a tende e multitut komentá e kosnan akí tokante Hesus; pa e motibu ei nan i e saserdotenan importante a manda guardia pa bai kohe Hesus prezu.

³³P'esei Hesus a bisa: ‘Lo Mi pasa djis un temporada kòrtiku mas huntu ku boso i despues Mi ta bai serka Esun ku a manda Mi.

³⁴Boso lo buska Mi, ma boso lo no haña Mi. Boso lo no por bini, kaminda Mi ta!’

³⁵E hendenan di pueblo a puntra otro: ‘Ta unda E ke bai ku nos lo no por hañ'É? Ta serka nos hendenan hudiu den estranheria, esnan ku ta biba huntu ku e griegonan, E ta bai pa E siña e griegonan?

³⁶Ta kiko E ke men ku “Boso lo buska Mi, ma boso lo no por bini kaminda Mi ta”?’

³⁷E último dia di fiesta di Ramada, esta e dia di mas importante, Hesus a lanta para bisa na bos altu: ‘Esun ku tin set, mester bin bebe serka Mi.

³⁸Manera Skritura ta bisa: “Esun ku kere den Mi, riu di awa ku ta duna bida, lo brota for di profundidat di su ser.” ’

³⁹Hesus tabata papia tokante Spiritu Santu ku esnan ku ta kere den djE lo a bai risibí. Ma na e momentonan ei Spiritu Santu no tabat'ei ainda, pasobra no a alsa Hesus na un posishon di honor ainda.

⁴⁰Algun hende den e multitut a tende e palabranan di Hesus i nan a bisa: ‘Enberdat, e hòmber akí ta e Profeta!’

⁴¹Otro a bisa: ‘E hòmber akí ta e Mesias!’ Ma otronan a komentá: ‘E Mesias n' ta bini di Galilea, tòg?

⁴²Akaso Skritura no ta bisa ku e Mesias lo ta desendiente di rei David i ku lo E bini di Betlehèm, siudat di David?’

⁴³Awor e multitut tabata den desakuerdo pa Hesus su motibu.

⁴⁴Algun di nan ker a koh'É prezu, ma niun hende no a hasi nada.

⁴⁵P'esei ora e sòldánan di tèmpel ku mester a kohe Hesus prezu a bai serka e fariseonan i e saserdotenan importante, esakinan a puntra nan: ‘Pakiko boso no a trese Hesus?’

⁴⁶E sòldánan a kontestá: ‘Niun hende no a yega di papia manera e hòmber akí ta papia!’

⁴⁷E fariseonan a puntra nan: ‘Basta E no a tira santu den boso wowo tambe!

⁴⁸Akaso boso a yega di topa un miembro di konseho supremo òf un fariseo ku ta kere den dje?

⁴⁹Ma e pueblo akí no konosé lei; nan ta maldishoná!’

⁵⁰Awor Nikodemo, un di e fariseonan ku a yega di bishitá Hesus, a remarká:

⁵¹‘Segun nos lei nos no por husga un hende sin tend'é promé i sin konosé su aktonan.’

⁵²Ma nan a kontest'é: ‘Ta di Galilea bo tambe ta? Bai studia Skritura i bo ta mira ku niun profeta no ta bini di Galilea!’

⁵³Tur hende a bai nan mes kas,