Read Papiamento Huan 8 Bible Online

Huan 8 - Papiamento bible

Huan 8

²Su manisé trempan El a bolbe bai tèmpel i henter pueblo a reuní rònt di djE. El a kai sinta i siña nan.

³E dòktornan di lei i e fariseonan a trese un muhé ku nan a gara ta kometé adulterio i a pon'é para meimei di tur e hendenan.

⁴Nan a bisa Hesus: ‘Maestro, a gara e muhé akí ta kometé adulterio.

⁵Den nos lei Moises a duna òrdu pa piedra muhé asina. Ma Abo awor, kiko Abo ta bisa?’

⁶Nan a bis'É asina djis pa lag'É kai den trampa i haña algu pa akus'É di dje. Ma Hesus a bùk abou skibi den tera ku su dede.

⁷Ora nan a sigui insistí ku nan preguntanan, Hesus a lanta para bisa e hòmbernan: ‘Esun di boso ku ta sin piká tira e promé piedra.’

⁸Despues El a bolbe bùk abou sigui skibi den tera.

⁹Ora nan a tende loke El a bisa, nan a kita bai un tras di otro, esnan di mas edat na kabes. Nan a laga Hesus so, ku e muhé pará ketu bai einan.

¹⁰Hesus a hisa kabes bis'é: ‘Señora, unda nan a keda? Niun no a kondená bo?’

¹¹E muhé a kontestá: ‘Niun hende, shon!’ Hesus a sigui bis'é: ‘Wèl, Ami tampoko no ta kondená bo. Bai i no sigui biba den piká.’[9]

¹²Durante fiesta di Ramada Hesus a bolbe dirigí palabra na e hendenan: ‘Ami ta é lus pa mundu. Esun ku sigui Mi no ta kana nunka den skuridat, ma l'e tin lus ku ta duna bida.’

¹³E fariseonan a akus'É: ‘Bo ta testiguá na bo mes fabor; bo testimonio no ta bèrdat.’

¹⁴Hesus a rospond'é: ‘Asta si Mi ta testiguá na mi mes fabor, mi testimonio ta bèrdat. Pasobra Mi sa di unda Mi a bini i unda Mi ta bai. Ta boso no sa di unda Mi a bini ni unda Mi ta bai!

¹⁵Boso ta husga ku midí di hende, Ami sí no ta husga niun hende.

¹⁶Anto, asta si Mi husga mes, mi huisio ta kuadra ku bèrdat, pasobra no t'Ami so, ma ta Ami ku mi Tata ku a manda Mi, ta husga!

¹⁷Ta skibí den boso lei ku si dos hende testiguá na fabor di algu, e kos ei ta bèrdat.

¹⁸Ami ta testiguá na mi mes fabor i mi Tata ku a manda Mi, ta testiguá na mi fabor.’

¹⁹E ora ei nan a puntr'É: ‘Unda bo Tata ta?’ Hesus a duna nan pa kontesta: ‘Boso no konosé Mi, ni boso no konosé mi Tata; si boso tabata konosé Mi, boso lo a konosé mi Tata tambe.’

²⁰Hesus a bisa e kosnan akí ora e tabata siña hende den tèmpel, den bisindario di e kahanan pa ofrenda. Niun hende no a koh'É prezu, pasobra su ora no a yega ainda.

²¹Hesus a bolbe papia ku nan i bisa: ‘Mi ta bai i boso lo buska Mi, ma boso lo muri den boso piká. Boso no por yega kaminda Mi ta bai.’

²²E pueblo a bisa: ‘E di ku nos no por bai kaminda e ta bai! Ta mata e ta bai mata su kurpa?’

²³Hesus a kontestá nan: ‘Boso ta djakibou, esta di riba e mundu akí; Ami ta di ariba. Boso ta pertenesé na e mundu akí; Ami no.

²⁴P'esei Mi a bisa boso ku boso lo muri den boso piká; pasobra boso no a kere ku “AMI TA”.’[10]

²⁵E ora ei nan a puntr'É: ‘Ma ta ken bo ta antó?’ El a rospondé nan: ‘Mi a bisa boso esei na kuminsamentu kaba.[11]

²⁶Mi tin hopi kos di bisa i di husga di boso, ma Esun ku a manda Mi, ta papia bèrdat i Ami ta anunsiá na mundu solamente loke Mi tende di djE.’

²⁷Nan no a komprondé ku Hesus tabata papia di su Tata.

²⁸P'esei El a bisa nan: ‘Ora boso alsa Yu di Hende, boso lo sa ku “AMI TA” i ku Mi no ta hasi nada riba Mi mes. Mi ta papia solamente loke mi Tata a siña Mi.

²⁹Esun ku a manda Mi, ta huntu ku Mi; E no a laga Mi so, pasobra semper Mi ta hasi loke ta agrad'É.’

³⁰Hopi hende a kere den Hesus, ora El a bisa e kosnan akí.

³¹Hesus a bisa e hendenan ku a kere loke El a bisa: ‘Si boso keda fiel na mi palabranan, boso ta mi disipelnan di bèrdat.

³²Boso lo konosé e bèrdat i e bèrdat lo hasi boso liber.’

³³Nan a bisa Hesus: ‘Nos ta desendiente di Abraham i nunka nos no tabata katibu di niun hende! Kon Bo por bisa: “Boso lo bira liber?” ’

³⁴Hesus a rospondé nan: ‘Mi ta sigurá boso: tur hende ku peka ta katibu di piká.

³⁵Awor un katibu no ta keda pa semper den un famia; un yu sí.

³⁶P'esei si Ami, e Yu, hasi boso liber, boso lo ta liber di bèrdat.

³⁷Mi sa ku boso ta desendiente di Abraham, ma tòg boso ta buska Mi pa mata, pasobra mi palabranan no a haña aseptashon serka boso.

³⁸Ami ta papia di loke Mi a mira serka mi Tata; ma boso ta hasi loke boso a tende di boso tata.’

³⁹Nan a bolbe kontestá Hesus: ‘Nos tata ta Abraham!’ E ora ei Hesus a bisa nan: ‘Si boso tabata yu di Abraham, boso lo a hasi loke Abraham a hasi.

⁴⁰Ma awor boso ta buska Mi pa mata, Ami ku a bisa boso e bèrdat ku Mi a tende di Dios. Abraham sí no a aktua di e forma akí!

⁴¹Ma boso ta hasi loke boso tata ta hasi.’ Nan a bis'É: ‘Nos no ta yu djafó, Dios mes ta nos úniko Tata!’

⁴²Hesus a bisa nan: ‘Si Dios tabata boso Tata, boso lo a stima Mi, pasobra Mi a bini di Dios i Mi t'aki. Mi no a bini riba Mi mes, ma t'E a manda Mi.

⁴³Pakiko boso no ta komprondé loke Mi ta papia ku boso? Pasobra boso orea no por soportá loke Mi ta bisa boso.

⁴⁴Diabel ta boso tata i boso ke pone e deseonan di boso tata den práktika. E ta un matadó for di kuminsamentu, i nunka e no a aten'é na bèrdat, pasobra e no tin bèrdat den dje. Ora ku e gaña, e ta gaña di naturalesa, pasobra e ta un gañadó i tata di mentira.

⁴⁵Ma Ami sí ta papia bèrdat, p'esei mes boso no ta kere Mi.

⁴⁶Kua di boso por proba ku Mi ta kulpabel di piká? I si Mi ta papia bèrdat, pakiko boso no ta kere Mi?

⁴⁷Esun ku ta bini di Dios, ta skucha palabra di Dios. Ma boso no ta di Dios, p'esei mes boso no ta tende!’

⁴⁸Hesus su kontrinkantenan a bis'É: ‘Nos no tin rason di bisa ku Bo ta un samaritano i ku bo ta poseé pa demoño?’

⁴⁹Hesus a bisa: ‘Mi no ta poseé pa demoño, ma Mi ta honra mi Tata i boso ta rebahá Mi.

⁵⁰Mi no ta buska honor pa Mi mes; tin Un ku ta buska pa Mi haña honor i t'E ta husga.

⁵¹Mi ta sigurá boso: si un hende obedesé mi palabranan, lo e no mira morto nunka.’

⁵²Nan a bis'É: ‘Awor sí nos sa ku bo ta poseé pa demoño! Abraham a muri i e profetanan tambe, ma abo ta bin bisa ku si un hende obedesé bo siñansa, e no ta mira morto nunka.

⁵³Ku Abraham nos tata mes a muri, akaso bo ta mas importante kuné? E profetanan tambe a muri; ta ken abo ta kere bo ta?’

⁵⁴Hesus a kontestá nan: ‘Si Mi ta buska moda di alsa mi mes, e gloria ei no tin niun balor. Ma ta mi Tata ta duna Mi gloria, Esun mes ku boso ta yama “Nos Dios”!

⁵⁵Ma boso no konos'É; Ami sí konos'É. Anto si Mi bisa boso ku Mi no konos'É, Mi ta un gañadó meskos ku boso, pasobra Mi konos'É i Mi ta obedesé su palabra.

⁵⁶Boso tata Abraham a bira kontentu, pasobra e tabatin speransa di mira e ora di mi binimentu. El a mir'é i a keda kontentu!’

⁵⁷Nan a bis'É: ‘Ni sinkuenta aña bo no tin ainda, anto ya bo a haña Abraham mira?’

⁵⁸Hesus a rospondé: ‘Mi ta sigurá boso: “AMI TA” promé ku Abraham tabat'ei.’

⁵⁹P'esei e hendenan a piki piedra pa piedr'É, ma Hesus a skonde i sali for di tèmpel.