Read Papiamento Echonan 10 Bible Online

Echonan 10 - Papiamento bible

Echonan 10

¹Na Sesarea tabata biba un tal Kornelio, un òfisir di e asina yamá ‘trupa italiano’.

²E tabata un hòmber deboto: e ku henter su famia tabata sirbi Dios. E tabata hasi hopi pa yuda e hudiunan pober i e tabata hasi orashon na Dios regularmente.

³Un dia, banda di[33] tres or di mèrdia, el a haña un vishon. El a mira kla kla kon un angel di Dios a drenta paden i bis'é: ‘Kornelio!’

⁴Yen di miedu el a fiha su bista riba e angel i kontest'é: ‘Bo sirbidó!’ E angel a bis'é: ‘Dios a aseptá bo orashonnan i bo yudansa na pober.

⁵P'esei duna algun hende òrdu pa bai Yope; laga nan puntra si un sierto Simon, tambe yamá Pedro, por bini serka bo.

⁶E Simon akí ta keda na kas di un kurtidó, tambe yamá Simon; su kas ta keda kantu di laman.’[34]

⁷Ora e angel a bai, Kornelio a yama dos hende ku tabata traha p'e i un wardaespalda ku tabata sirbi Dios.

⁸El a konta nan tur loke a pasa i a manda nan Yope.

⁹Su manisé diesdos or di mèrdia, ora nan tabata na kaminda i ya tabata aserkando Yope, Pedro a subi riba e dak plat pa hasi orashon.

¹⁰El a haña hamber i tabatin gana di kome algu. Miéntras nan tabata prepará kuminda, el a haña un vishon.

¹¹El a mira shelu habri, i algu manera un laken grandi tabata baha bini abou riba tera; na su kuater puntanan tabata fir e manda abou.

¹²Den dje tabatin tur sorto di bestia ku kuater pata, bestia ku ta lastra abou i para.

¹³El a tende un stèm bis'é: ‘Ban mira, Pedro, mata bo kome!’

¹⁴Ma Pedro a rospondé: ‘Di ningun manera, Señor! Nunka mi no a kome nada ku ta indigno òf impuru.’

¹⁵El a tende e stèm pa di dos bia: ‘Loke Dios a deklará puru, abo no mester konsiderá impuru.’

¹⁶Esaki a sosodé tres be, i despues a hala tur kos bèk den shelu.

¹⁷Miéntras Pedro tabata puntra su mes kiko por ta nifikashon di e vishon ku el a mira, e hòmbernan mandá pa Kornelio a informá unda kas di Simon e kurtidó tabata, i awor nan tabata pará dilanti porta.

¹⁸Nan a grita: ‘Tin un tal Simon akí, tambe yamá Pedro?’

¹⁹Miéntras Pedro tabata trata di komprondé e vishon, Spiritu Santu a bis'é: ‘Tende! Ata tres[35] hòmber na porta ei ta buska bo.

²⁰Ban mira, baha i bai huntu ku nan; no basilá, pasobra t'Ami a manda nan.’

²¹Pedro a baha bai serka e hòmbernan[36] bisa nan: ‘T'ami ta e hende ku boso ta buska. Pakiko boso a bini?’

²²Nan a kontestá: ‘E òfisir Kornelio a manda nos; e ta un hòmber hustu ku ta sirbi Dios, henter pueblo hudiu ta papia bon di dje. Un angel di Dios a bis'é invitá bo bini su kas pa e skucha loke bo tin di konta.’

²³Pedro a kombidá e hòmbernan bini paden pa pasa nochi einan. Su manisé Pedro a bai huntu ku nan; algun ruman di Yope a kompañ'é.

²⁴Siguiente dia el[37] a yega Sesarea, kaminda Kornelio tabata spera nan huntu ku su famia i amigunan será ku el a kombidá.

²⁵Ora Pedro tabata bai drenta, Kornelio a bai kontr'é, kai na suela su dilanti i bùig p'e.

²⁶Ma Pedro a pon'é para riba su pia i bis'é: ‘Lanta riba, ta un ser humano mi tambe ta!’

²⁷Papiando nan a drenta paden; ei Pedro a topa un grupo grandi di hende.

²⁸Pedro a bisa nan: ‘Boso sa ku ta prohibí pa un hudiu anda ku un hende no hudiu òf bishit'é. Ma ami Dios a mustra ku mi no mester konsiderá niun hende indigno òf impuru.

²⁹P'esei ora boso a manda buska mi, mi no tabatin nada kontra pa bini. Awor laga mi puntra boso: pakiko boso a manda buska mi?’

³⁰Kornelio a bis'é: ‘Tabata mas o ménos e mesun ora akí, esta tres or di mèrdia, kuater dia pasá, ora mi tabata resa na mi kas. Diripiente un hòmber bistí na paña briante a bin para mi dilanti

³¹i bisa: “Kornelio, Dios a skucha bo orashonnan i E no a lubidá bo yudansa na pober.

³²P'esei manda hende Yope pa buska Simon, tambe yamá Pedro, ku ta keda na e kas di Simon kurtidó di kueru, kantu di laman.”[38]

³³Mesora mi a manda buska bo i bo tabata asina bon di bini. Awor ata nos tur huntu den presensia di Dios, kla pa skucha tur loke Señor[39] a manda bo bisa.’

³⁴Pedro a tuma palabra i bisa: ‘Enberdat! Awor mi ta komprondé ku Dios no ta hasi distinshon di persona,

³⁵ma ku E ta aseptá di kualke nashon tur hende ku ta respet'É i ta hasi loke ta korekto.

³⁶T'esaki ta e mensahe ku Dios a manda pa e pueblo di Israel, esta e bon notisia di pas, mandá pa medio di Hesu-Kristu, ku ta Señor di tur hende.[40]

³⁷Boso sa di e gran evento ku a tuma lugá rònt pais Israel, kon el a kuminsá na Galilea despues di e yamada ku Huan a hasi riba e hendenan pa nan risibí boutismo,

³⁸i boso sa tambe kon e ora ei Dios a ungi Hesus di Nazarèt ku Spiritu Santu i a kolm'É ku poder. E tabata pasa hasi bon obra tur kaminda i kura esnan ku tabata bou di yugo di diabel, pasobra Dios tabata kunÉ.

³⁹Nos tabata testigu di tur loke El a hasi na tera di e hudiunan i na Herusalèm. Nan a mat'É dor di krusifik'É.

⁴⁰Pero Dios a lant'É di tres dia i a lag'É aparesé na sierto hende.

⁴¹E no a aparesé na henter e pueblo, pero na nos ku Dios a skohe di antemano pa ta testigu, nos ku a kome i bebe kunÉ despues ku El a lanta for di morto.

⁴²El a ordená nos prediká na pueblo i testiguá ku t'E ta Esun ku Dios a apuntá komo hues di esnan bibu i esnan morto.

⁴³Ta di Hesus tur profeta ta testiguá ku pa medio di su nòmber tur esnan ku kere den djE, lo risibí pordon di piká.’

⁴⁴Miéntras Pedro tabata papia ainda, Spiritu Santu a baha riba tur hende ku tabata skucha e palabra.

⁴⁵E rumannan hudiu ku a kompañá Pedro for di Yope a keda babuká di mira ku Dios a drama don di Spiritu Santu tambe riba esnan no hudiu.

⁴⁶Pasobra nan tabata tende nan papia lenga straño i alabá Dios su grandesa. E ora ei Pedro a bisa:

⁴⁷‘Ken por kita e hendenan akí di risibí awa di boutismo unabes ku nan a risibí Spiritu Santu meskos ku nos?’

⁴⁸I el a ordená pa batisá nan den nòmber di Hesu-Kristu. Nan a pidié pa keda poko dia mas serka nan.